1 Yáaweefa kaifáa Mooseena qímaminoo qinau. Anée aneenná áfasaana faqa miná faiqi námu Nadabana faqa Abiuna faqa Eeriasana faqa náara másee Itammarana faqa Isaraee máqannaasa kinaana rainá náaduma quqásainaqa qiní aanáiqi kíra sáika máraaqa. 2 Aneenná áfasaana Áaroona misákina úriqarara áanaiqikira qamunna auqu ámia. Miqímmásáinanoo mi qamunnáfa ámiqirana faqa úriqararausee qírana faqa ámiani. 3 Moosee anée Áaroona qamunna akúnifándinna fásiqausa írirana fíqararausa qinée írirana nimiqáunausa misá kai suqúsee qímanniminaqa miná qamunna akúniaqa. Akunúsáifanóo miná afisúsee miqóoqari qiní aanáiqikira sáika máraani. 4 Anee qímanníminaqa nímuqusasaa rúfi mária ainainná faqa eefooda qámunna faqa kísaaqa qamunna áikusaa faqa ititéemari qamunnána faqa ákara faqáa síuta faqa ákiiqa rafáaqa fímari qámunna faqa áránándáuqanna rumbárana faqa minamúna áuquaqa. Misá miqímmaseeqa úriqarara áanaiqikira qámuna aní áfasaana faqa miná faiqi námu faqa áuqu nimisáifaqa misa qiní aanáiqi kíra saika máraaaqa. 5 Akúnirana akoofasáuqaindi sipsípa ásausi dirindáasi ákirana faqa pánnoona ákirana faqa faéena ákirana faqa kóora tíritanda faqa ámiqira tíritanda faqa mi ainaináusannai aanáiqikirausa qamunna áuquaqa. 6 Misá sipsípa asausi dirindáasi ákirana faqa pánnoona ákirana faqa faéena ákirana faqa kóora tíritanda faqa ámiqira tíritanda faqa aiqáma mi ainaináusannai eefooda qámunna áuquseeqa minásaa óosana óosana ákara ruaqa.

7 Eefooda qámunna anaanu qaaraqandá áururusaa áakandíaninnana áuqusee eefooda qámunnasaa dínni dínni rumbáaqa. 8 Miná ooíqanda íaninnana ámiqira qámunnannai eefooda qámunna áuquandee kai masee áuquaqa. Mifa eefooda qámunnasaa ákunirafa máriani. 9 Eefooda anaanusáa ákumáaqa óoni qaaraqánda pupúooni marasée dínni anaanusáa moó dínni anaanusáa moó quqásee Yakooboona faiqi námu qísauku qara taikásee qíkunni óoqu qaara marasée núqu mi ooni qandásaa ákara ruaqa. 10 Dínni pupú óonisaa dínni taikásee dínni ani moodáa marasée 6 núqu akara ruani, dínni pupú óonisaa miqíkai mándee 6 ákara ruani. Aiqáma narí kambíqoona amana kái núqu ákara ruaqa. 11 Óonisaa ákara rírana akoofása márina áfiqasaifanoo mifá qaara oonisaa Yakooboona faiqi námu núqu ákara rúani. Ákara rúmaseeenoo mi ooni qandá kóora qámbaana quqásainanoo atukaránoo máriani. 12 Miqímmásee áururusaa eefooda qámunna áakandammasainanoo Yakooboona faiqi námu qísauku qaara taikásee qíkunni óoqu qaara marasée 12 Isaraee máqannaasa kíkiqusinoo máriani. Miqímásaifanoo Áaroonafa misá núqu narí aururusáa máranoo nímarinaqa qinée Yáaweesa qeeqá faiqí ánaaseera aiqáma kári írianaura. 13-14 Áururusaa qaara ooni atukaramma qumáree mári kóoranasaa qaara qánda ámiqira kóora sáinanda súfirana moó áti moó óonisaa moó áti moó óonisaa ootúpaaqa.

15 Ínnee nímuqusa sáa rúfí máriana aanáiqikirausa áuqu nimisáifaqa minánnoo misá Ánutuna íriranara áidiranara írifaranoo. Eefooda qámunna áuqu áinainausannoo kai áuquseeqa moodáa karira akara kai ruaqa. 16 Qámbaana tukáandasaifanoo aiqáma áti amana amana kái 22 centimetres máriani. 17 Ínnee óoni ámiqirana firaa feefauru áqi máriana kai marasée qaara faqa qaara faqaki mi qamunnánasáa padíaqa. Índaarúqaa pádiranaki moó óoni áuqu rubi faqa moó óoni toopasa faqa moó óoni ganeeta faqa minamúna pádiaqa. 18 Miná ánaaqíannáa pádiranaki moo óoni áuqu eemeerara faqa moó óoni safairee fáqa moó óoni daimánna faqa minamúnannai pádiaqa. 19 Miná ánaaqíannaa pádiranaki moó óoni áuqu teerakoosa faqa moó óoni agatee faqa moó óoni áuqu ameetisa faqa minamúnannai pádiaqa. 20 Miná ánaaqíanaa pádiranaki moó óoni áuqu beerira faqa moó óoni kanirianna faqa moó óoni yasapaa faqa minamúnannái pádiaqa. Mi oonísa kóorandannai ámuqusa sáa ititánoo mári qamunnanasáa isooqa áraaqa. 21 Mi oonisa moodáa moodáa óoni fannoo Yakooboona faiqi námu qísauku qara taikásee qíkunni óoqu qaara marasée 12 Isaraee máqannaasa kikíqa úsinoo máriani.

22 Ínnee nímuqusasaa rufírana anaanu ámiqira kóorannai áuqira sánda séenandara foorá áuquseeqa afundásee dínni dínni átisaa qusuaqa. 23 Kóorannai anaanu qaaraqandá áuqusee ámuqusa sáa rufinna qamunnana mirínni átisaaqara qusúaqa. 24 Qaara qánda séennanda kóorannoo afundáranannai mi anaanu qandáki qusuaqa. 25 Mi sandána áti qárannai áururusaa kóorandannai ooni isooqa aruqaanáki ootúpaaqa. Miqímmásaifanoo áururusaa eefooda qámunnasaa rúmbaaqa. 26 Kafáa nímuqusa saa rufí mariana anaanu qaara qánda kóorannai áuqusee aunduráindari áti saa mi anaanúna rumbásaifanoo eefooda qámunna mámmaaqai máriani. 27 Kafáa qaaraqánda ánaanu kóorannai áuquseee áfunni qumu mári eefooda qamunnána saa aqaasanaí ámiqira qámunnannai súfirana ooí qándianinnana aaqá rumbáaqa. 28 Nímuqusa sáa díri mária qamunnana sáa anaanukí dirindáasiandannái súfira sanda qusuakí eefooda qamunna sáaqaraa ánaanuki qususée rumbáaqa. Miqímasaifanoo ámuqusa saa ititára qamunna sía kási kásiani. 29 Áaroonáfa náaquqara máaqaki kéeqafinoo mi qamunnána Isaraee máqannaasa núqu ákara rírana afisúsáinaqa qinée Yáaweesa aiqáma kári qeeqá faiqí ánaaseera írianauranoo. 30 Ámuqusaa ititára qamunna raqándaamasee uqára foora akunúsai máriani. Mi uqánaki óoni qaaraqánda miqandá núqu Urimma fáqa Tumimma fáqa Áaroonafa mi uqánaki uqárúmásee qini úiqaana maqáki ániani. Miqírárée qímaseenoo aiqáma kári nímuqusa saa díri mária qamunnána rufu máree aniréenoo mifá qiní írirana iriséenoo Isaraee máqannaasa qímannímiannoo.

31 Ínnee eefooda qámunna meeáqoo qáraana áuqirara dirindáasi ákira sípsipa asausinnái kái áuquaqa. 32 Anuka ámaaqa áuquaqa. Qamunna raqándaammásee akunúsaifanoo anuka upeekáina sía anaqíani. 33-34 Miná átimau raqándaammásee akúnúseeqa saqári aqama faqa káqikaa bíru kóorannai áuqirana faqa miná átimau qusúaqa. Dirindáasi ákira sipsípa ásausinnai faqa pánnoona ákiranannai faqa faéena ákiranannai faqa mi saqri aqamána amana áuquaqa. Áuquseeqa mi saqari aqamaná faqa kóorannai áuqira biru faqa qamunna átimau moó máfi quqée moó máfi quqée iaqa. 35 Áaroonafa aanáiqikira sáika áuqararee qímasee mi qamunnána afisúani. Mifá náaquqara máaqaki qinée umeé marúnnana qífusaa áninanoo fée quqásee fínanoo fée mi birúsa narísaa narísaa áriqa ufa qífanoo Áaroonafa sía kuqúannoo.

36 Ínnee ámiqira kóora marasée áqiníàndìrana áuqusee miná sáa ákara rúmaasee Yáaweena aináinira fáiqi fée qiaqa. 37 Ákiiqa ánaamu qúsirana áqini sáa quqásee dirindáasíàndannoo rumbáaqa. 38 Áaroonafa miná áqináaqa rumbásainaqa qinée Yáaweesa aiqáma Isaraee máqannaasa áaduma qiní qímiraree qínna áinainausara eedóo qímasee máráanaura. Misá akaqá áaqarana áuqamasee qímifaqa qinee Áaroona mi aqiniandiránara irisée sía minní sàanáura. Káqi máraanaura.

39 Ínnee ámiqira sánda sufuséeqa Áaroona siúta áuqusee miná ákiiqa ánaamu faqa áuqusee minánnoo kai áranandáuqa rumbárana faqa áuquseeqa minásaa óosana óosana ákarannoo afaaqa áuquaqa. 40 Áaroona faiqi námu siútauqa faqa níranandáuqanna rumbée máriana faqa níkiiqa ánaamu faqa káaqa ámiqiranáuqa áuqu nímiaqa. 41 Moosee anée maa qamunnáusa mara máree aneenná áfasaana Áaroona narí faiqi námu fáqa afisú nímaqaa. Oorifa fádameena misá níkiiqa ámoondunna adía nímaqasee náaduma mara quqásee mi saikána nímia. Miqímmásáinaqa misá qiní aanáiqikira sáika máraaqa. 42 Ínnee qúsa kárausisa nooíqakiqari nífúndana sáa óoqéeqárana áuqu nímiaqa. Miqímmásaifaqa misá sía nárì nifaaqa kooroo iaqéera. 43 Áaroonafa narí faiqi námu faqa qinée umee márunnanaki qiní úiqaana máqaki kéeqafinoo qiní qaindásaa náaquqara qóo aanáiqikira áinaina áuqararee qímasee aiqáma kári mi karausisána afisúaqa. Miqíqa sía nári nifaaqa kooroo íqa sía kúqifaranoo. Maa ufáfa Áaroona faqa miná sáa ani aruakínausa sáa faqa náaruara máriannoo.