1 Ínnee Teesaroonika máqannaasa Ánutunaki máriasa karaambáiqa Yísuna ásauku mundíranaki faqa máriasa, ínnee Teesaroonika máqannaasa Yísuna ufara suqímariasa qinée Pauroosa faqa Sirasifa faqa Timootifa faqa ínni nímandaidaqa, ákara rúmannimaqaidaqa. Ánutuna káqi nímira áfaarirana faqa asooárana narí aundurá faqa ínni faqa máriani.

2 Maasá maaqóo márunna namusa ínniara iriséeqa maqee maqee Ánutufinnai dúfi dúfi qídaqa, maqee maqee ínniara innaaru qímannimaqaidaqa.

3 Maasá ínniara maqee maqee maasá qíkoona Ánutuna áaqoo áuqaidaqa. Ínnee Yísuna saqárikidaqa miqíanara Ánutuna ufírira áinainirana maqee maqee ímariafanoo. Ínnee Ánutunara faqa faiqí ánaaseera faqa nímuqusa ímarinara Ánutufinnai kadáapiri máriafanoo. Ínnee Yísunara asasammásee áfeesira írirafa karaambáiqa ásauku mundírana Yísunaki atukaramásee maríanara mináuqara faqa maasá irisée Ánutuna áaqoo áuqaida ínniara innaaru qímannimaqaidaqa.

4 Teesaroonika máqusanaasa qiní qíkaqaafasaa Ánutufa ínniara ámuqusímarifa ínni rusandeesámumasee mároonara maasá íridaqa. 5 Maasá Yísuna áufakiana sía nóonnai káifau ínni qímannimidau, Ánutuna afeekannái faqa miná náaquqara andeeqara maraqunannái faqa qeeqá faqa mi-iriránamau fídaqa minánnai faqa ínni qímannimiafannana minára Ánutufa ínni rusandeesámunara íridaqa kúqaa fee qídaqa. Maasá ínni faqa Teesaroonika máqusai máriafana qíqafoosa máridaqa ínni dadaaqírara andeeqáseeqa máriafanausa máridaqa ínnee minára írimariafanoo. 6 Ínnee maasá andeeqárana qáfamasee karaambáiqa faqa maasá faqa andeeqárana ámeeraaméerirana faqa maasá faqa andeeqárana ámeeraaméeri maríafanoo, ínni máqannaasa Yísuna ufa írunara miná ákiaqara ínni aupúrarana firaaqóo nímufaqa ínnee sía minára íriqau náaquqara maraquna nímimaru ásasirana asasammásee karaambáiqa ufa kai mároosa. 7 Ínnee Teesaroonika máqannaasa miqíqa aiqáma ánaamuru Yísuna ufa írimarusa ínneeqa andeeqára óosana uqannífiqoonara ínnee Maseedoonia máqa maaqakina márusa faqa Kirisa máqa maaqakina márusa faqa uqannífiqoosa máriafanoo.

8 Sía mi-maqa maaqa qandá kaifáu karaambáiqa ufa íriqau, aiqáma maqa maaqai ínnee Teesaroonika máqannaasa Ánutuna ufa írufa, mi-ufáfa aiqámai daráaninoo fífainínau. Maasá fífau ínniara mi-maqannáasa fíqu fíqu ídaqa qímannimiqa nímariafanaqa misá óoqai iriséeqa qímaqimiqa. 9 Óoqai maasá ínni Teesaroonika máqusai óonuráafanaqa ínnee maasá asasamándee óonu qífiqasee ámiqimasee maasá ufa írunara fáasai mi-anaamurúsa írimariqau. Ínnee ínneeqa dapi saqari Anutunara foorá innaaru qímaruna minnísee quándaki kúqaa ánoona kási marí Ánutufinnai ubeekáranara faqa fáasai mi-anaamurúsa iriséeqa minára aiqámausa qímannimimariqau. 10 Ínnee mifúnnai ubeekámafi miná ámaaku innaarúnaindari qúmiranara áfeesu afeesirafa káqi áfeesida márunara fáasai ánaamuru minára faqa írimariqau. Ánutuna ámaaku Yísufa kúqiranakinaana mara fíndifufa, maasá Ánutufa kásooqaqee náruaninnanakinaana Yísufa maasá asumu qumáree marífa ínnee mifá qúmuaninnanara áfeesida márunara aiqáma ánaamuru fáasaimma irisée qímaqimiafanoo.