1 Faiqí ánaaseera nímuqusirafa úriqararafa máridanoo fee qídaqa minára ínni Koorinti máqannaasa qímannimidaqa, Ínnee minára irisée faiqí ánaaseera nímuqusirafa máraanauree qímaseeqa miná márarara kai kadáapiruaqa. Ánutuna maraquna ními mari afeeka óosana óosana faqa akoofásaikirana óosana óosana faqa, mináuqa faqa ínnee ínneeqa írirana ummárararee qímasee afeekaíkiaqa. Miqídaqa faiqí ánaasee Ánutuna ufa qímannimira afeeka minára úriqarara fee qímasee firaaqóo randásee máraaqa. 2 Faiqí moó fannoo narí sía írinna ánaamurusa ufakíqari qímannimimarifa sía faiqífau qímannimidanoofau Ánutuna faqa ufa qídanoo. Faiqí sía miná ufa íridaqa moosá ufa márifaqa. Mifá Ánutuna maraquna afeekannái kukéeqara ánoona ufa qídanoo. 3 Faiqí moó fannoo Ánutuna maraquna fannoo dadaaqifanóo Ánutuna ufa narí ufakíqari qímannimifanoo nímuqusaki mandáikisa miná ufa íriafanoo dadaaqírana faqa poodúqarana faqa ámiqi ámiqirana faqa máraidaqa. 4 Moosá ufakíqari narí sía íri maria ufanakiqari qímannimimari fasiqafa narí kai narí dadaaqídanoo, Ánutuna ufa nári ufakíqari qímannimimarifa aiqáma Yísuna ufara suqímariasa dadaaqídanoo uqéeraidanoo.

5 Qinée ínniara ánaamuru ufakíqari sía írianakiqari aiqámausa minakíqari ufa qiaqée qídaqa. Mi-oosanná úriqararafa maaqímminoo máridanoo Ánutuna ufa nári ufakíqari qímannimirafa Ánutuna maraquna nímimarifa qinée ínniara minára firaaqóo qiaqée qídaqa rídaqa. Ánutuna ufa nári ufakíqari qímannimimarifa úriqararafa máridanoo, ánaamuru ufakíqari sía íria ufanakiqari qímarifa uréeqarafa máridanoo, mi-moo ufánakiqari qímarinnana faiqí moó fannoo anirée nári ufakíqari mi-ufána qímanniminanoo andeeqásee írifanoo amaná máriannoo miqímasee Yísuna ufara suqímariasa dadaaqírana máreefaranoo.

6 Óo qiní qíkaqaafasaa kásooqaqee ínnee iannái óonureeqa ánaamuru ufakíqari qímannimisee náqimandee dadaaqianáuree. Sía dadaaqírafa máriannoo. Ánutuna maraquna fannoo aamúaqira ufa qímannimira fee, qímannimiranee, írira ufa fee Ánutuna maraquna dadaaqíra ufa qímannira fee naamúaqira ufa fee nári ufakíqari qímannimianaqa aiqámausa dadaaqírana máreefaranoo. Moosá ufakíqari sía dadaaqírana máreefaranoo.

7 Fífau sía kási marí ainainna ufíreena faqa kookáanauru faqa piripúnna faqa márifaqa sía mináuqakiqari ámiqimmandee fuaqáidaqa minakíqari idí sía ámiqimmandee fuaqáifanoo idírainna fasiqa anaaseesa náqi fee mándee írifaree, sía írifara. 8 Rákira karaambaiqa fannoo sía ámiqimándee kaanina uqéeraifaqa náqimandee rákirana aiqámausa uqéereefaree, sía uqéeree faranoo. 9 Ínnee miqíkai íqa maraquna fannoo náakinaqa ánaamuru ufakíqari sía írianakiqari ufa qífaqa náqimasee aní ufa óosana írifaree sía uqanna írifaranoo. Aní ufa fannoo fífau úfaira foora úqidanoo. 10 Maa-maqa maaqánakina moómoosa ufa máridanoo aiqámausakina misá ufa ánoona máridanoo. 11 Ánaamuru moó fannoo fíndifi nári ufakíqari qiní qímaqimifaqa qinée síamma írianaura. Qinée mi-fasiqánara ánaamuru fee qianá mifá qiníara ánaamuru fee qíannoo. 12 Ínnee Koorinti máqannaasa káaqa Ánutuna maraquna fannoo nímimari afeekanara kai firaaqóo rímariasa máriafanoo. Mi-afeeka iriránakiqari maanára kai afeekaíkiaqa. Yísuna ufara suqímariasa misára dadaaqíqa firaaqóo uqéeree maría ainainnára kai nídinaqa uqéeraaqeera qídaqa.

13 Faiqí moó fannoo maraqunannái ánaamuru ufakíqari qímannimidanoo narí faqa faiqí ánaasee faqa sía írifanoo kafáa Ánutunara innaaru qínanoo moo áfeeka áminanoo sía írimaria ufanakiqari qímarina ánoona irisée quandásee kooroommásee kafáa nári ufakíqari qímanniminaqa dóo íriaqeera. 14 Maraquna fannoo dadaaqínaqa sía íria ufanakiqari innaaru qíananoo qiní qimana fannoo kai kúqaa innaaru qíannoo qiqá írirafa sía innaaru qíannoo. 15 Qinée minára náqi fee qianáuree qinée maaqímmianaura, qinée qeeqá qimana faqa qeeqá íriranannai faqa innaaru qianáura. Qinée Ánutunara idí ráidaqa qeeqá qimanannái faqa qeeqá íriranannai faqa Ánutunara idí raanáura. 16 Ínnee Yísuna ufara suqímariasa suqímarifanoo moó fannoo Ánutuna maraquna fannoo áakinanoo narí amana fannoo kai ánaamuru ufakíqari innaaru qínanoo moo káqiqee fasiqa fannoo ani márida íridanoo náqimasee mifá iriséenoo Ánutunara mifá faqa eedóo qíannoo fee. Mifá sía uqanna amaná aní ufa óosanara íriannoo. 17 Aní Ánutunara dúfi dúfi qíra ufa ámiqimmasee qínanoo moo fásiqa fannoo sía ámiqimasee írinanoo aní ufa fannoo sía miná dadaaqíannoo.

18 Qinée Pauroosa maanára Ánutunara dúfi dúfi qídaqa, qinée firaaqóo moómoo kari ínni fíqaramásee ánaamuru ufakíqari dáadumai máridaqa innaaru qídaqa. 19 Yísuna ufara suqímariasaki suqídaqa qinée sía miqídaqa. Misáki máridaqa nári ufakíqari misá naamúaqianee qídaqa moodáannai qísauku ufa kái amana kái qúsa qímannimiranara dídidanoo. Moosá ufakíqari misá sía íri maría ufanakiqari kísaaqasaa qímannimianaqa sía írifoora qíkooqaidanoo.

20 Óo qiní qíkaqaafasaa sía ínni írirafa faiqi ánaaqi íriranara foora máriani, faiqí firaasá íriranara foora máriani. Óosana óosana mandainainara minára kai ínni írirafa faiqi ánaaqindíara foora nisakadikí qikairí síaisa máriaqa. 21 Tamummáqara fasiqauqa minára maaqí qímasee ákara ríqau.

Tamummáqara fasiqa ufa miqímminoo márifaqa qinée Pauroosa minára maaqí qídaqa.

22 Qinée maraqunannái ánaamuru ufa qíranara maaqí qídaqa Yísunara sía írimariasa irisée minára kúqaa fee qiaqée qímasee náriara Ánutuna nárira ufa ámeemaanai márianara íriaqeera mi-ufáfa máridanoo. Yísunara dóo írimariasara sía misárau máridanoo, dóo misá íridaqa. Maraqunannái Ánutuna ufa nári ufakíqari qímannimirafa Yísuna ufa írimariasa íriaqee ainainna máridanoo, miná ufa sía írimarinausa sía miná írifaranoo miná ánoonara randée faranoo.

23 Yísuna ufara suqímariasa aiqáma suqúsee máridaqa aiqámausa moodáa kari ánaamuru ufakíqari dapi dápi ufa qímarifanoo káiqee fasiqa fee aamína fasiqa fee minakí ani kéeqafiqa ínniara fúrufari maríasee qímasee sandáannoo. 24 Aiqámausa suqídaqa Ánutuna ufa nári ufakiqari narí qímami narí qímami qímarifanoo káqiqee fasiqa fee aamína fasiqa fee ínniki kéeqafinoo írinoo narí mandóosanara aundurái óonumafi íriannoo. Narí írinnufafa narí raqúru ámiannoo. 25 Narí mandírirafa aundurái kukéeqanoo márinafa aiqáma kooroomámbinanoo mifá anuka kummárammafinoo Ánutuna amooqídanoo maaqí qíannoo kúqaa Ánutufa maaqóo ínni faqa máridanoo fee qíannoo.

26 Óo qiní qíkaqaafasaauqa, máa̱ qinée qúnna ufana ánoona koorooianáura. Ínnee innaaru qíraree qímasee suqídaqa moó fannoo idí moo óosana áraannoo moó fannoo naamúaqira ufa óosana áraannoo, moó fannoo Ánutunaindaraa ufa irisée qímannimiannoo moó fannoo ánaamuru ufakíqari qímannimisainanoo moo fásiqa maraquna fannoo dadaaqínanoo mi-ufána ánoona kooroománnimiannoo. Aiqáma ainaina Yísuna ufara suqímariasa dadaaqírafá kai máriani. 27 Misá ánaamuru ufakíqari qímannimiani qímasee qaaraqánda kai fee qaaramoó kai fíndifinana moodáa moodáa fannóo kai qímannimiaqa, miqóoqari moó fannoo misá úfa ánoona nári ufakíqari kooroommásee qímannimiani. 28 Yísuna ufara suqíranaki koorooímarinna fasiqafa sía márinana sía ánaamuru ufakíqari qímannimiani. Narí kai narí aundurákiqari Ánutuna faqa ufa qínafa amaná narí kai qíani. 29 Qaaraqánda fee qaaramoo fee Ánutufa ufa níminnana qífaqa aiqámausa suqímariasa irisée misá ufa rainá rainámmasee íriaqa. 30 Ínni ufa suqíranaki faiqí moó fannoo óoqu marínafa Ánutunaindaraa ufa marasáinanoo ufa qímanniminna fasiqafa óoqu márinanoo mifá fíndifi qímannimiannoo.

31 Ínnee aiqáma amaná Ánutuna ufa qímannimiaqa moodáa kai moodáa kai fíndifidaqa amaná qímannimifaranoo, miqímandaifaqa aiqámausa misá írirana iriséeqa dadaaqírana máreefaranoo.

32 Maraquna fannoo ínni náakifaqa Ánutuna ufa qímannimirana dadaaqírana nímifaqa sía dapi dápi fúrufariaqa ínnee ínneeqá kai ínneeqa nífauru naundurásaa rakísimariasa márianara ámiqimasee rakísiaqa. 33 Ánutufa sía maasára dapi dápi fúrufariranaki máriaqeera dáarama quqéenoo asooáranaki andeeqásee máriaqeera dáarama narí úfa íriranaki quqéenoo. Ánutuna ufara suqímariasa máaqanna máaqana moodáa óosana qímannimiafanaqa máree maríafaqa ínni faqa qímannimidaqa. 34 Yísuna ufara suqíranaki ánaasee sía fíndifi ufa qímannimiaqa, káqi óoqufaaqee máriaqa. Yuda máqannaasa sándufamau kai fíqa faiqí ufa ámeemaanái kai máriaqa. 35 Ánaasee moo áinainara iráraree qímaseenoo sía páamma qímasee iráannoo, kásooqaqeenoo máaqaki óonureenoo narí afaaqisáa iráannoo. Yísuna ufara suqíranaki ánaasee fíndifi ufa qínafa asaurírafa máriannoo.

(Koorinti máqannaasa akaqáusa Pauroona ufara sía anoona ufa fee qímasee nári íriranamau fímarufanoo Pauroofa minára maaqí qímasee qímanniminoo qinau.)

36 Óo Koorinti máqannaasa Ánutuna ufa fannoo ínnikiqari fee indaarú kambíqeenoo fee ínnee ínneeqara maasá kai máreeunoo fee qídee. 37-38 Ínnikqari moo fásiqa fannoo naríara Ánutuna tamummáqara fasiqausee qímaseenoo fee maraquna qímimari afeekana faqaasee qímaseenoo fee mi-fasiqáfa qinée Pauroosa ákara rúmannimunnufanara kúqaa Ánutuna naamúaqira ufa fee qínafa ánoona máriannoo. Qiní maa-ufánara sía íridee qínafa ínnee minára únna qíra fasiqa máridanoo fee qímasee miná ufa faqa sía íriaqa.

39 Óo qiní qíkaqaafasaa Koorinti máqannaasa ínneeqa Ánutuna ufa faiqí ánaasee qímannimiranara máraanauree qímasee afeekaikída miná márarara kai kadáapiruaqa, akaqáusa sía írimaria ufanakiqari maraqunannái qímannimifaqa sía qáoo qiaqa. 40 Ínnee ufa suqíranaki íriranamau kai andeeqásee maqee maqee fuaqa.