1 Ínnee Koorinti máqannaasa maasára maaqí qiaqa. Ásauku mundírafa Yísufa maasá miná aináinira faiqiuqa Ánutuna óoqai kukéeqara ánoona ufara rakísiaqee qímaqoosa máridaqa. 2 Aináina faqaafa narí aináinasaa rakísi marí fasiqanara akooqóo andeeqára fasiqa kái máraannoo. Narí aináinasaa ámiqimasee rakísi marína̱ kai narí ufa írimari faiqiná kai mara quqáannoo. (Qinée Pauroosa Ánutuna rakísira faiqiara foora máridaqa. Qinée ínniki aináinidaqa qeeqá írirana qeeqá úriqararanasaa rusísee ínniki aináini máriqiafana.)

3 Qinée ínniki aináini marunaqa ínnee qiní aináinirana amanífaqa sía ínni qimaníranara írianaura úriqararafa Ánutuna ufa kái írianaura maqásaa fasiqa moó fannoo íriranannai qiní aináinirana amanífaqa qeeqá úriqararana miná ufara kái írianaura. Qinée qeeqá faqa qeeqá aináiniranara andeeqáida fee sía fee andeeqáida fee qímasee sía qeeqá íriranara írianaura qiní aináinirana andeeqée mari uriqararafa kái miná íriranara kái írianaura. 4 Ínnee qiníara qiafanoo qiqá dáakirafa sía ummaara dárifaqa káqimbidaqa. Qiní dáakirafa qiní dárinoo fee sía fee dárinoo sía qiníara andeeqára ainainira fee qídanoofau Karaambáiqa mifá kai qiní saikára íridanoo ufa qíannoo. 5 Ínnee minára irisée sía maasára kasaaqaíndari ufa qiaqa. Karaambáiqa innaarúnaindari qúminna faasaaná kai taikára ufa qímannimirafa máriannoo. Mi-karí karaambáiqa sía óoqai akooqóo máriu irirana kukéeqara írirana óosana óosana írirana minakínaana uqéereeqeenoo aiqámausa nífusaa kooroománnimaqaannoo. Aiqáma fasiqa anaasee naundurákinaa óosana áuqeefandiannana deedaqírana akooqóo aiqámausa nífusaa mara quqásainaqa qáfeefaranoo. Mi-karí aiqáma fasiqa anaasee nári maqásaa andeeqára nírana márirana amana kái Ánutuna amooqírana máreefaranoo. Mi-karí Ánutufa maasá saiká óosana aiquqummásee minára ufa qíannoo. Maasá miná ufamáu fímariafanausa márunnanara ínnee sía ufannái maasá saiká kasaaqaíndari áruaqa.

6 Óo qiní qíkaqaafasaa máriasa ínnee aiqámausa andeeqásee Ánutuna ákara ufamau fuaqée qímasee Apooroosasandiri maaqandá kíkiqususee qímannimiaqeera maaqandá qímannimiranara qíqa. Ánutuna ufa ínni indaarúnnikamma nímaqee maríasara sía moorá ámiqira fee qímasee moorá mandá fee qímasee rairaiqíaqa sía miqíaqa. 7 Ínniki akaqáusa náriara úriqararausee qímariana únna qímariasa máriafanoo. Yáfee mi-uriqararána níminoo fee, Ínniki mári ainainna aiqáma Ánutufa kai níminau. Ínnee minára íriaqa, náqaa fee qifaqée qeeqá kai máraafanausa firaaqóo úriqaraqa máridee qídee. Ánutufá kai aiqáma ainaina níminau.

8 Ínnee Koorinti máqannaasa únna qímasee aiqáma ainaina máraafanausee qímariafanoo, ínnee ínneeqara únna qímasee aináina faqaasee qímariafanoo, dóo ínnee únna qímasee karaambáiqara foora máriafaqa maasá sía. Ínnee Koorinti máqannaasa karaambáiqa máriaqaana. Ínnee kúqaa karaambáiqa márifaqau maasá maqee mandáinainaki márunnana taikáseefau ínni faqa kúqaa karaambáiqaikiqa márini.

9 Maasá Yísufa niqiqoo fásiqausa Ánutufa uréeqarana nimiqoosámmia foo qímasee qeeqá kai óonu máfi íridaqa nimiqáifaqa maasá minakí máridaqa. Maasá namuqáa nísaukukíara foora márianaqa aiqámausa faiqí faqa qangiroo faqa nífusaa ataasá átaasa qídaqa dárifandínausa miqírausa maasá máridaqa. 10 Maasá niqiqoo fásiqausa ásauku mundírana ufasáara fúrufarirausee qímariafaqa ínnee Koorinti máqanna Yísuna ufara suqímariasa ásauku mundírana ufakína ínnee ínneeqara írirana faqaasee qímariafanoo. Maasá Yísuna ufa qímannimi marunausa kudoosaápeera foora únaqa ínnee nímudaanai qídaqa afeeka máriafanoo. Maasá faiqí nífusaa fídiaqaa ímariasara foora máridaqa ínnee misá nífusaa úriqararausa máriafanoo. 11 Maasá Yísufa niqiqoo fásiqausa óoqai faqa maqee márunnana faqa dáara ráidanoo nammáriara sía amanaikídanoo maasá mandá qámunna rakéekaa írana afisídaqa, misá maqee maqee unnaanásamu óonisamu sáamusamu maasá dáridaqa maasá máaqa síaisa káqi maqúsamau faiqaqá nídaqa. 12 Maasá qeeqá kadáapiriranannai tooqaamu dárirananai minánnai aináinamasee náidaqa. Faiqí maasá díquraraafaqa maasá ámiqi ámiqimmannimaqaidaqa. Misá mandáikamáqimaqaafaqa maasá káqi kai miná máraqa fídaqa. 13 Misá mandúfa maasára qiafaqa maasá ámiqira ufa kai misá qímannimidaqa. Maasá maa-maqa maaqánakinaasa madaapeerá foora máridaqa óoqai miqíqa ániusa maqee faqa aiqáma máqannaasa madaapeé áqi maría madikara foora márisa máridaqa.

14 Qinée Pauroosa ínni Koorinti máqusanaasa sía nisaurírana nímiaqeera mi-ufána qímannimisee ákara rídaqa, qeeqá qímuqusa qeeqá faiqi námu máriafaqara foora naamúa qidaqa. 15 Ínnee ásauku mundírana ufamau fídaqa ínni ufasáa rakísirausa fuki faakí qímariasa núkudara foora máriafaqa qinée moodáa ínni níkausara foora máridaqa. Óoqai indaarú qinée ámiqira fasaasa ufa máree anirée ínni Koorinti máqannaa nímiafanaqa irisée ásauku mundírana Yísuna ufamau fímariafaqa miqíafannanara ínniqa níkausaikiqa máridaqa.

16 Qinée minára irisée qeeqá qímuqusa óokiqari reendeenámandee ínni qímannimidaqa ínnee ínni níkausa qiní daanna raaqa. 17 Ínnee qiní daanna raanée qímasee Timootina aqiqáananoo ínnee iannái fúannoo. Maaqandá karaambáiqa aináiniranaki máridaqa mifá qiní qímuqusa andeeqára qímaakuara foora máridanoo. Mifá ínnee iannái óonuree qiní fúka márirana ásauku mundírana Yísunaki márira óosana qímannimiannoo. Aiqáma maqusa maqusa nídaqa Yísuna ufa írimariasa suqúsaida naamúaqimáqaafannana Timootifa mi-ufána ínni náaqoo áuqaannoo.

18 Ínnikiqari akaqáusa qiní Pauroosara sía kafáa maí anirée maasá qíqafaannoo qifoo qímasee nóori uqéerarausa nímariafanoo. 19 Karaambáiqa eedóo qínaqa ínnee iannái óonu níndafaanaura. Óonureeqa ínnikina nóori uqéeree maríasa sía misá náriara firaa ufa qínnanara óonu qáfaanaura misá áuqi maría ainainna kai márinaqa qáfaanaura. Ánutuna afeeka misáki márinaqa áuqeemarinnana kai qáfaanaura Ánutuna afeeka sía misáki mári ifoo qídaqa. 20 Ánutuna innaarúnai ququsaki fímariana maa-maqánasaa márirana sía fífau ufasáa mundínoo máridanoo Ánutuna afeeka dadaaqínoo áuqiranasaa mundínoo máridanoo. 21 Óo Koorinti máqannaasa Yísuna ufa írimariasa áaqeemariana ínneeqá kai íriaqa, unnaanásamuara foora úqirausee ánianauree ínniara qímuqusirana faqa reendeénirana faqa miqandée úqirausa ánianauree. Ínneeqá kai irisée ínneeqa márirana andeeqásee máriaqa.