2
Efesus Abiw Mutuk Fian Ilo Fut Dabalayemse em Weng te.
1 Efesus abiw mutuk fian em sios kunum waneng biim kalan kunum* 2:1 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”. elo weng kale fut tem boko, bokolewomelew: “Nakalem ben kel fial yuk teing aluwbomi, ben kel ilam ailbin gol sen biim mutuk kakabi kunum ne weng kale bokokemomeli:* Fitew Dase 1:16
2 ‘Kom bukesomi, ken kukuw aluwsomi, yom kal anggil ilum kululiw ding em kalaing kuw keko, kitil mokabiliw kukuw be ne kal kebi te. Feinka! Ku kukuw wa kekabiliw kawtiw ilo gal keyemeko, im deiw elo net kelewkabelew te. Kelewsomelewi, mali dasuw weng bokoko, ‘Nukal kalan kunum nute te!’, angbiliw kunum ilo kilele diwyemeko, ‘Dasuw bakabiliw kunum yute te!’, angeko, kal kebelew te.* 1 Sion 4:1 3 Kaneko beli, ku nem wiin kitil kuw aluweko, belew angomi, mali kawtiw i beem mongom e kulo kal anggil ilum dukakembiliw kate, ku beit kelinba keko, kitil kuw keko, mokabelew te.
4 Kate, nem weng mak kuso be te. Emisik ding dim bakate, ku nelo ‘Fein!’, nangeko, ibolow mutuk fian so dunemselew kate kameem belew ding dim kale, ku nelo dunemselew ibolow mutuk fian be kolewsomi, beit kebelew te. 5 Feinka! Kukalem ken kukuw kemalew kukuw kolewselew kasike kame, ku iti ken kukuw beem ibolow fukunemolewka! Fukunsomelewi, ibolow famdeko, suaem kaneselew emdiw iti aluwbamolewka! Ku kelinba kelew tewe, ne fongate akate alik ilam ailbin sen biim mutuk elo telesomi, komie ne kulu kokemoki kasike, alik alik yu fein banimokoliw te.* Fitew Dase 3:3
6 Kate, kom kukuw mak e nakalem kukuw emdiw kebelew te. Ku dasuw kukuyemkabe kunum Nikolas so beem angin iso alik biilo kaim alel yetemkabelew te.
7 Kaneko kasike, kentem ken so kunum waneng yu Sunbin-Finik em sios kunum waneng ilo bokoyemkabe weng beelo kilele kililoliwka! Nimin kunum waneng ite mak kitil keko, kawin dim kaleem wa kukuw de mit daliw tewe, ne ilo Sunbin-Got em abiil tikin alakabe beem sang mutum abiw Baladais elo yemdeko, sunsun finik so duyemkabe ais dem beem wanin sak duyemii, i kulokoliw te.’,
dangeko, fut tem bololewka!”, nangse te.* Talfut Kese 2:9; Fitew Dase 22:2,19
Semena Abiw Mutuk Fian Ilo Fut Dabalayemse em Weng te.
8 Semena abiw mutuk fian em sios kunum waneng biim kalan kunum† 2:8 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”. elo weng kale fut tem boko, bokolewomelew: “Nakalem kuw sua sua akal, sow em fefe akal sunsun boki kunum nete te. Kuansomi, iti fomkamin baba teinsi kunum nete weng kale bokokemomeli:
9 ‘Ne kom belew be kilele kal kebi te. Kom betbet kal anggil ilum kulabelew beso, kal dim em mesesem eisneng sukum belew bakati kal kebi te. Kate, ku fein ibolow beem dulum elote sukum kelinba keko, emso kunum atew kebelew te. Kebelewi, mali kawtiw i ‘Nu Suda kawtiw nute te!’, kangeko, kulo desi kekembiliw beem ilum akal ne kal kebi te. Kate, kanebiliw kawtiw bi Suda kawtiw bate. I Seten-Ataanim em angin kebomi, kanebiliw bakate.* 2 Kolin 11:14-15; Fitew Dase 3:9
10 Ku kilele kilila! Sukum king kel ding atew kemoke ding dim e, Seten-Ataanim e kitil keko, mali kom sios biliw kunum waneng ilo sok am tem da koyemeko, ilo kal ilum fian mak duyemeko, ‘Im fein ibolow e kitil kebiliw beni ba?’, angeko, kiskis koyemboke te. Keyembelei, mali kawtiw i mali fein ibolow so kunum waneng ilo yeniwi, i kuanokoliw te. Kate, im fein ibolow e beit kelinba keliw tewe, ne im kanebiliw beem yan e ilo wiin fian so duyemeko, sunsun finik so bin duyemoki te.* 2 Timoti 4:8; Sekow 1:12
11 Kaneko kasike, kentem ken so kunum waneng yu Sunbin-Finik em sios kunum waneng ilo bokoyemkabe weng beelo kilele kililoliwka! Nimin kunum waneng ite mak kitil keko, kawin dim kaleem wa kukuw de mit daliw tewe, kanekabiliw kunum waneng bi auk teben em kuankemin be nam kuaniw te.’,
dangeko, fut tem bololewka!”, nangse te.* Fitew Dase 20:14; 21:8
Fegamum Abiw Mutuk Fian Ilo Fut Dabalayemse em Weng te.
12 Fegamum abiw mutuk fian em sios kunum waneng biim kalan kunum‡ 2:12 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”. elo weng kale fut tem boko, bokolewomelew: “Biol mali so mali so atul nam aluwkabi kunum nete weng kale bokokemomeli:
13 Kom belew abiw dim be ne kal keli te. Seten-Ataanim em teinkemin abin ayem akati ka kel be te. Feinka! Em be abiw be, i nem weng afak bin keko, mali ilo nem sang bakayembe fein kunum Antibas elo aliwi, e kuanse te. Em kuane ding kabalak e, ku nem wiin kilele kitil keko, net aluweko, kom fein ibolow be beit kelinba keselew te.
14 Kate, nem weng alew mak kuso be te. Weng be kanekote: Mak e, Fegamum biliw mali kawtiw mak i Balam em kukuyemkabe weng aluwko, gelewkabiliw kasike. E sua kel Balak elo bokolewomele: “Isalael kawtiw im kakamin deiw kel kal ilum mak dukayembolewka!”, dangei, Balak e beem weng geleweko, Isalael kawtiw ilo kukuyemei, isik i dasuw-got ilo daol bil keyemeko, im wanin daol wanesomi, osow kukuw fian kemaliw te.* Teing Bakamin 22:1–24:24; 25:1-2; 31:16; 2 Fita 2:15 15 Iti weng mak e, mali kawtiw mak i Nikolas em angin im kukuyemkabiliw weng gelewkabilw te. Feinka! I kanebiliwi, ne atemeko, kal kebi te.
16 Keko kasike, fongate akate i ibolow famdeko, im kanekabiliw kukuw be kolewoliwka! Kelinba keliw tewe, ne fongate akate teleko, nem bontem dim matem tele beem biol atul nam beso ilo yenii, i kuanokoliw kasike.* Fitew Dase 3:11
17 Kaneko kasike, kentem ken so kunum waneng yu Sunbin-Finik em sios kunum waneng ilo bokoyemkabe weng beelo kilele kililoliwka! Nimin kunum waneng ite mak kitil keko, kawin dim kaleem wa kukuw de mit daliw tewe, ne ilo abiil tikin em okmobe Mana wanin mak yemenoki te. Yemensomi, tum kais nam mak em dim e wiin kikis mak bosi tum akal ilo amen amen duyemoki te. Beem dim bosi wiin kikis be alik alik kunum waneng i bongguko, nam kal keliw kate, ikalem amen amen kuw wiin beelo kal kelokoliw te.’,
dangeko, fut tem bololewka!”, nangse te.* Aneng Kolew 16:4,14-15,33-34; Aisaya 62:2; Sion 6:31,48-50
Tayataila Abiw Mutuk Fian Ilo Fut Dabalayemse em Weng te.
18 Tayataila abiw mutuk fian em sios kunum waneng biim kalan kunum§ 2:18 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”. elo weng kale fut tem boko, bokolewomelew: “Nem kiin e ais dong atew kesomi, yan tom e ais abuliw balas anggolko, mian fong emdiw filik falak bamneng so kekabi kunum nete weng kale bokokemomeli:* Fitew Dase 1:14-15
19 ‘Ne kom ken kekabelew kukuw be kilele kal kebi te. Kom ibolow mutuk dulew dulew kukuw e, kom fein ibolow kenemkabelew e, kom mali ilo dakayembin kukuw e, kom kal anggil ilum deimin kukuw e, alik alik kebelew be ne atemeko, kal kebi te. Feinka! Kom kame gelewkabelew ken kukuw be suaem ken kukuw gelewemalew kukuw beelo bakileweko, fian kebelew te.
20 Kate, weng mak kuso bete te. Kukuw wa kekabu waneng mak yom mutuk ka bu te. Um kukuw wa be Sesebel** 2:20 Sua kel, Sesebel u Isalael kawtiw im emisik kak kunum Akaw em kalel ute te. U Sunbin-Got em angin ilo maka keyemeko, dasuw-got im wiin ete kuw daoyem kemalu waneng ute te. um kanemalu kukuw wa atew te. U dasuw weng bokolomelu: ‘Nete Sunbin-Got em bontem dim bakamin waneng nete te!’, angeko, nem weng afak kunum waneng kebiliw biim ibolow elo teifulu koyemeko, ilo osow kukuw so, dasuw-got ilo daol bil keyemeko, im wanin daol wanbin kukuw so, kukuyemkabu te.* 1 Kamokim 16:31; 2 Kamokim 9:22 21 Ne sukum ding keko, ‘U ibolow famdeluka!’, angeko, ding fenbi kate, u ibolow famdesomi, osow kukuw be ibik kulewinba kebu te. 22 Kasike, ku kilila! Wakamin wa betbet fian mak duumoki te. Keko beemdiw, mali kawtiw mak ibolow famdeko, umdiw osow kukuw wa be kolewinba keliw tewe, ne ilo ikati betbet fian mak duyemoki te. 23 Duyemsomelii, ukalem muluwel iso makuw yenii, ikal kuanokoliw te. Beem mongom ete alik alik sios kunum waneng ikal nem kaneli kukuw bete atemsomi, kal keliwete: Nete kuw yom mutuk amen amen kukuw kebiliw be kal kesomi, diwyemeko, kanebiliw beem yan duyemkabi Sunbin-Got nete te.* Sim Fut 7:9; Selemaya 17:10; Fitew Dase 20:12-13
24 Kate Tayataila abiw mutuk fian beem sios kawtiw kesomi, ‘Seten-Ataanim em ibolow win sang fian mak bete te!’, dangbiliw dasuw kukuyemin beelo aluwbinba kebiliw kunum waneng mali mak ikal biliw te. Biim dulum elote ne ilum mesesem eisneng makso mak nam duyemi te. 25 Kaneko kasike, yom aluwbiliw eisneng be yu kitil kuw keko, kilele net aluweko, unbiliwi, nem toloki ding fen boliwka!* Fitew Dase 3:11
26 Nimin kunum waneng ite mak kitil keko, kawin dim kaleem wa kukuw de mit dako, nem ibolow kuw gelewko, nem weng afak kawtiw keliw tewe,
ne ilo wiin fian duyemeko, mali kawtiw im kamok ke yetebin kunum keyemoki te.* Sim Fut 2:8-9
27 Keyemii, i ibolow kaisuw nam kawtiw kebomi, wiin so duyemkabe ain kaung be kuluko,
mali wa kebiliw kawtiw ilo ok sen kawtol tabol tabol dukulin tew keyemokoliw te.* Sim Fut 2:8; Aisaya 30:14; Selemaya 19:11
28 Aatim nelo wiin so kenemse beemdiw nakati kaneliw kunum waneng yulo wiin so kunum waneng keyemboki te. Kaneko kasike, nimin kunum waneng ite mak kitil keko, kawin dim kaleem wa kukuw de mit daliw tewe, ne ilo fial wanggakil be duyemoki te.* Fitew Dase 22:16 29 Kentem ken so kunum waneng yu Sunbin-Finik em sios kunum waneng biilo bokoyemkabe weng beelo kilele kililoliwka!’,
dangeko, fut tem bololewka!”, nangse te.
*2:1: 2:1 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”.
*2:7: Talfut Kese 2:9; Fitew Dase 22:2,19
†2:8: 2:8 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”.
*2:9: 2 Kolin 11:14-15; Fitew Dase 3:9
*2:10: 2 Timoti 4:8; Sekow 1:12
‡2:12: 2:12 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”.
*2:14: Teing Bakamin 22:1–24:24; 25:1-2; 31:16; 2 Fita 2:15
*2:17: Aneng Kolew 16:4,14-15,33-34; Aisaya 62:2; Sion 6:31,48-50
§2:18: 2:18 Gilik im weng sin e kale kel “Anggeloi” bose te. Weng beem mongom mak e “Sunbin-Got em yemdakamin finik ite te”, mak e “kalan unemin kunum ite te”.
**2:20: 2:20 Sua kel, Sesebel u Isalael kawtiw im emisik kak kunum Akaw em kalel ute te. U Sunbin-Got em angin ilo maka keyemeko, dasuw-got im wiin ete kuw daoyem kemalu waneng ute te.
*2:20: 1 Kamokim 16:31; 2 Kamokim 9:22
*2:23: Sim Fut 7:9; Selemaya 17:10; Fitew Dase 20:12-13
*2:26: Sim Fut 2:8-9
*2:27: Sim Fut 2:8; Aisaya 30:14; Selemaya 19:11