4
1 Kasike, nakunum kumel kunum waneng yutaka! Yu kitil keko, nukalem Kamok Fian Yesus em deiw auleko, kilele gelewboliwka!
Ne yulo ibolow mutuk fian duyemeko, ibolow danong keko, “Yom fukun tolo yo!”, yangeko, kakabi te. Nimtew angom? Ne yom Yesus em deiw gelewkabiliw kukuw be atemeko, kakat fian kulukabi kasike. Feinka! Alik alik yu nem bukeko, aluwkabi beem yan ken ati kebiliw te.* 1 Tesalonaika 2:19-20
2 Yuodia so, Sintike so, kuso yu kililoliwka! Yu ibolow ki makmak keloliwka! Nimtew angom? Kuso yu yukalem Kamok Fian em angin kebiliw kasike.
3 Sisigos* 4:3 Mali kal kunum i kale Gilik weng sin em weng Sisigos kuluko, famdeko, wiin beem mongom ete kuw fut tem ka kel bokabiliw te. Wiin beem mongom e kanekote: “Neso Fangfangdakabe Nakunum” ete te. kutaka! Ne kitil weng mak kulo bokokemomeli: “Ku waneng alew biim weng anyam be kileleko, banim keyema!”, kangi te. Nimtew angom? Waneng biso, neso, Kelemen eso, mali kawtiw im wiin Sunbin-Got em Finik so Kulomin Fut Ayem em tem ka kel bosiliw kawtiw iso, alik alik nu fangfangdako, aluwbamin ki dakabomi, Sunbin-Got em Weng Kal Ken Ati be de kakawkabuluw kasike.* Iluk 10:20
4 Filibai angin yutaka! Yu nukalem Kamok Fian eso fewtokoko, biliw kasike, yu diwkuw diwkuw kalfongeko, boliwka! Iti kililoliwka! Yu kalfongeko, boliwka!
5 Yom menew ibolow be kawtiw alik alik ilo kilele kukuyemboliwka!
Nukalem Kamok Fian e mewso tolomin keme te.* Kibulu 10:25; Sekow 5:8-9
6 Yu kanelom sakik ibolow banban kemokoliw te!
Kate, ilum ding akal, ken ding akal, diwkuw diwkuw yu Sunbin-Got elo “Kaneyema!”, dangbiliw beem dulum elote eso weng bokoko, dakalakamin weng dakalako, “Weso! Seyo!”, dangboliwka!* Matyu 6:25-34; Kolosi 4:2
7 Kaneliw tewe, Sunbin-Got e akalem menew ibolow be yulo fein duyemoke te. Em yulo duyemkabe ibolow menew be yom ibolow banban kebiliw be atin kuw kasi koyemeko, yom Kulais Yesus eso fewtokobiliw ibolow so, ibolow fukunin beso, alik alik be kilele kilmoko, ateyemboke te.* Aisaya 26:3; Sion 14:27; Kolosi 3:15
8 Ibolow mutuk fian duyemkabi nakunum kumel kunum waneng yutaka! Nem weng banim kolomin dim kabalak e, yu kaneko eisneng beem dulum elote kuw ibolow fukunemoliwka!
Dasuw banim keko, fein kukuw kemin beem dulum elo,
sulin so kukuw beem dulum elo,
kiol kuw bin beem dulum elo,
tokotoko kukuw beem dulum elo,
sen so banim eisneng beem dulum elo,
mali im kiin dim e kiol kuw keko, sulin so kebe eisneng beem dulum elo,
alik alik mesesem mesesem eisneng beem dulum elote kuw diwkuw diwkuw ibolow fukunemoliwka!
9 Nakunum kumel kunum waneng yutaka! Yu nem weng yulo kukuyemii, yu kiliko, atemeko, kilele kal kebiliw kukuyemin weng be diwkuw diwkuw gelewemoliwka! Gelewbiliwi, ibolow menew em sen mongom kayak Sunbin-Got e diwkuw diwkuw yuso boke te.* Ulom 16:20
Filibai im Dokolewiwi, Kalfongse em Weng te.
10 Ne kalfong fian keko, nukalem Kamok Fian elo “Weso! Seyo!”, dangbi te. Nimtew angom? Yu iti nem ibolow fukuneko, nelo dokonemsiliw kasike. Fein! Yu diwkuw diwkuw nem ibolow fukunkabiliw kate, yu nelo dokonemomin deiw mak ateminba kemaliw te. Kate kame, yu deiw mak atemeko, nelo kilele dokonemsiliw te.
11 Yu kanelom ibolow fukuneko, bokolomeliw: “Fol e mesesem mesesem sukum kebe kasike kame, e nulo fut be dabalayem kebe kasike!”, ange ange kebokoliw te! Itel bate! Feinka! Aluwkabi mesesem mesesem eisneng beem dulum elote ne diwkuw diwkuw nanbow angeko, ibolow menew so bi kasike. 12 Sunbin-Got e nelo kukunemse kasike kame, mesesem mesesem eisneng sukum kebi ding akal, mesesem mesesem eisneng banso kebi ding akal, wanin sukum kebi ding akal, wanin yom kele ding akal, nomin eisneng mak nem dim tele tewe, ne ibolow nanbow angeko, kakabi te. 13 Feinka! Nomin eisneng mak nem dim tele tewe, ne akalem kitil em dim e ibolow ki keko, alakabi te.* 2 Kolin 12:10 14 Kate, yu ken kukuw kuw kukunemsomi, nem kal ilum kenemse ding dim kabalak e, nelo ibolow folok kenemeko, neso fangfangdasiliw te.
15 Filibai abiw mutuk fian kunum waneng yutaka! Yukati kal keliwete: Mikmik ding dim kabalak e, nem Masedonia aneng fian be koleweko, Sunbin-Got em Weng Kal Ken Ati be bakayem tem bakayem tem de unemali ding dim bakate, mali Sunbin-Got em sios kunum waneng i neso makuw fangfangdalinba kemaliw kate, yukalem ete kuw neso makuw dulew dulew kukuw gelewemaluw te.* 2 Kolin 11:9 16 Nem Tesalonaika abiw mutuk fian ka kel bisi ding dim bakate, yu nelo banban ding dunemkabiliw kasike, ne sukum kelinba kebisi te. 17 Iti nelo dokonemomin beem dulum elote ne weng be bokoyeminba kebi kate, yom nelo iti dakanembiliw beem dulum elote “Sunbin-Got e yulo yan ken ati mak so mak so duyemoka!”, angeko, ibolow fukunakabi te. 18 Kate kame, ne mesesem mesesem eisneng banso keko, ki keli te. Nimtew angom? Efafoloditus e mesesem em teing dim elo dukusiliw mesesem eisneng be de teleko, nelo dunemei, ne banban beki beki kuw kebi kasike. Yom kanebiliw kukuw be Sunbin-Got em kiin dim e ken kamge eisneng atew kelei, e ibolow kalfong so kimilew kebe te. 19 Nakalem Sunbin-Got e on kisol so auk so kitil so Sunbin-Got kasike, e sukum kebiliw mesesem mesesem eisneng be atin kuw ki keyemboke te. Nimtew angom? Kulais Yesus e yulo akalem angin keyemse kasike.
20 Nukalem Aatim Sunbin-Got em wiin fian be diwkuw diwkuw daolew kemuma! Feinka!
21-22 Yu nem abin kuluko, yom dim biliw Sunbin-Got akalem wiin so galmose kunum waneng alik alik ilo “Biliw yako!”, yangoliwka! Sunbin-Got em neso biliw kunum waneng kaliso, mali kale biliw Sunbin-Got akalem wiin so galmose kunum waneng iso, mali Ulom abiw mutuk fian em emisik kamok fian akalem am fian ka kel biliw Sunbin-Got em kunum waneng bi so, alik alik bikati yulo “Biliw yako!”, yangiw te.
23 Kamok Fian Yesus Kulais em ibolow folok e yom dim alakabiliw finik biso boke te!
Bete kuw. Nem fut weng boyemi fut kame kilaka.
*4:3: 4:3 Mali kal kunum i kale Gilik weng sin em weng Sisigos kuluko, famdeko, wiin beem mongom ete kuw fut tem ka kel bokabiliw te. Wiin beem mongom e kanekote: “Neso Fangfangdakabe Nakunum” ete te.
*4:5: Kibulu 10:25; Sekow 5:8-9
*4:6: Matyu 6:25-34; Kolosi 4:2
*4:7: Aisaya 26:3; Sion 14:27; Kolosi 3:15