M̃esi Napano Pol Bivitauiaio Ban
TAITAS
Verialiano Moti
Tukunuano bulati na niosi nei
Taitas, naio be toro m̃eaku tai napano maka ve taara na Israel, mia naio binimei be namoneano, naruei jo jakisor Pol ka rijai naio ka im̃auano na aberial Yesu Kristo kiano ioluano vou. Pol midu Taitas joa uleule nei Krit ka vitikar im̃auano na yimo lu ea vio na, a naio bivitauia m̃esi nei ba ban naio ka verii vite tolu.
Nana be moti, Pol ber ban Taitas ka sidomkar bajago na navuri-m̃araboiano nalo na yimo lu monoka atakiio. Naio ber jibena, bior ka tomu miroano na Krit, kialo bajago bija kialo meuliano maka rimemedu. Mia juo nene Pol berial m̃arabo ban Taitas napano naio monoka takiio ka verloglog tomu nalo ea taara dolu nalo joomo ea yimo lu. Nina tormoruo nalo a tiramoruo nalo a m̃eaku nalo bija naim̃auano kurano nalo. Mia naio berinavo tiramoruo nalo monoka averloglog tira m̃eaku nalo.
Mia maariano nene, Pol berial ban Taitas verloglogiano nalo napano naio monoka sian van tomu nalo, napano memedu ka namoneano nalo atakiio. Nalo monoka atu rivu vija tomu dolu nalo, a monoka ave bilbilu vatitig vijalo napano maka atu ala baravo, bija tomu na yimo lu nalo monoka ave re terakurano.
Torogio nalo na niosi nei
Iliano moti 1:1-4
Navurim̃araboiano nalo na yimo lu 1:5-16
Taara dolu nalo kialo im̃auano joomo ea yimo lu 2:1-15
Iliano na verloglog tomu nalo 3:1-11
Iliano maariano 3:12-15
1
Pol ber ilivorvoruano ban Taitas
1 Keneriku Taitas, kiniou Pol, najaaro laka ka nebiviuoso bereio ea m̃esi nei, ea Atua siano, napano nebe toro na kiano im̃auano, a ea Yesu Kristo siano, napano nebe kiano atevi.
Nojoa vio nei, nojo nomim̃au kia ga vo bija tomu nalo napano Atua bijauia bulaglo ruei abe kiano, kar napano nojidom ka kialo viekouoiano rimei sikili lie, a kialo jikiaiano ea ilirianiano rimei ve toru lie vo. Verver tibe na, mia kialo bajago mijikia rimei memedu tibe ka bajago na Atua kiano tomu lu dolu nalo, 2 a mia amijikia avokar meuliano napano maka rijikia ribisi bogo tai.
Kiado jidomiano ju jikili ruei ka mia kito rovakar meuliano na, kar napano Atua berkar nua beamu ka mia naio rila tibe na, a romijikia ka naio maka leleio rila sibi bogo tai. 3 Naio be kiado Atua na Ioruriano, ana bogo napano naio mial ka kiano bogo memedu, naio midu kiano iliano maluvo ka rila kiado m̃arabo na meuliano, a vonganei midu joa kiniou ka nava noioliolu tanea vio.
4 2Kor 8:23; Kale 2:3; 2Timo 4:10Ana Taitas, nina naruei kiaku m̃esi banso. Nemialso jibe jau kobe keneriku memedu napano kitojuo kiado viekouoiano ve takurano ga, mia kiaku volkouano karso naio ban jibe nei, ka Atua karam̃ado bija kiado Kristo Yesu na Ioruriano kialo tiniememiano a tum̃aroano to vijaso.
Taitas kiano im̃auano ea venuo nei Krit
5 Nebivitau biedu, nojidom nala iliano vitunu vanso ea im̃auano napano kojo komila ea Krit kia ga vo. Beamu laka, kitojuo naruei robe moti ka romidu ioluano binimei ea vio nei, a bogo napano najaluvo, im̃auano na togio toru jo kiano vo, ana nomiduso kojo ka kala im̃auano nalo rimei rivu lie beamu.
Jibe napano neber kaso ea bogo na, nojidom koselviv ea komeli nalo, koioua tomu tealo ka nalo amei ave navurim̃araboiano lu.
6 1Timo 3:2-7Nalo na, monoka ave tomu napano maka tokoriano tai toa kialo meuliano, monoka asoro ka koalo tira ve takurano ga, napano abe riano tulaka bijaio, a kenerilo nalo, nalo bunu monoka amonea Yesu, maka lele rimemedu kito reial parilo nalo sikili, p̃eli atu atup̃e kialo tormoruo juo kialo iliano. 7 Monoka tibe na bior napano tomu na tortoru na tum̃aro, abe tomu na vitikariano na Atua kiano im̃auano lu, ana nalo monoka ave tomu na memedu. Nalo asidomii re ka aver nalo abe toro tai, nalo monoka tinielo mimi sop̃eli re, nalo monoka amun m̃elea re uei na jikili, nalo ave re toro na tukurukuano, a nalo monoka asidom m̃elea re saba, maka leleio.
8 A ver tibe na, mia navurim̃ara-boiano kiano meuliano naio monoka mia tum̃abe? Bo ka naio vitikar valauo nalo ea kunuano, bija bajago novo nalo dolu na jibe nei. Bo ka naio rivuru vatitig im̃auano nalo, naio be masou laka, kiano jidomiano meravo bo, a naio jilanvuu bo ka kiano meuliano. 9 Ilirianiano nalo napano aberloglog ka naio, naio monoka rivakario sikili rivu, ka rila ka naio kija mijikia riverloglog lilie kanio rivano.
Kuvitikar ka namoneano sibisibiano nalo
Tomu tealo aber p̃eli kiado moneano be sibi, mia kiado verloglogiano novo nalo mijikia rila kialo iliano nalo maka rijikia sikili tu rivu leleio.
10 Tomu telabo nalo aju napano maka asidom ajog kito, ana aju amil miroano laka, ana aju amila dede ga ka avuru tomu dolu kialo jidomiano rive dolu. Ea Krit na, kitojuo rajaaro toru ka tomu miroano na Ju napano roburulo abinimei abe Yesu kiano tomu nalo, mia vonganei nalo dolu nei ajidom ka avurulo avan rivova bereio. 11 Jibe na, bo ka titai tokovio ka niolo, napano nalo aju amila bulag nono m̃aratavo tealo ruei. Nalo aju aberloglog tenalo napano maka amemedu ka averiio, a nalo aju amila dede ga laka ka alaio, maka rivior jidomiano novo, a kar jidomiano va nei ga ka p̃eli nalo ajikia avar veru ve telisu kario.
12 Ver p̃eli tomu nalo na Krit, kialo bajago jibe nei ga, bior toro tai ka rivivitau ea tukunuano re nua, napano naio be toro tai na kialo vio memedu, bogo tai naio beriilo, berinavo
Tomu na Krit nalo abe tomu na sibiano, nalo abova jovulu kiribue,
nalo abe tomu na yoviano, nalo abe tomu na ajidomii mabolo ga.
13 Toro nene, kiano iliano na jikili kija, a nemial jibe p̃eli be riano ga na, ana bo ver koil sikili vanlo, ver p̃eli, mia kialo moneano maka leleio rijikia rimei rimemedu rivu bogo tai. 14 Vonganei, nalo aju abokar jikili kulo Ju re beamu kialo tukunuano moruo nalo, a nalo aju ajaaro ka tomu tortoru dolu nalo kialo iliano napano nalo aju abukular ilirianiano, a kar venia nalo maka asidom amonmonea Atua kiano iliano lu novo nalo napano roju rejian banlo?
15 Toro napano kiano jidomiano meravo bo laka, tenalo napano miagiago maka rijikia rila kiano jidomiano rimei riagiago, mia saba nonovio meravo bo ka naio. Ana toro napano maka rimonmonea, napano kiano jidomiano miagiago, p̃eli titai meravo, mia maka rila kiano jidomiano rimei meravo, mia maka bunu titai napano meravo bo ka naio. Nina bior napano kiano jidomiano a kiano iviso nalo aba abova ruei.
16 Tomu nalo napano nojo nebivitauia nei, nalo aju aberial ka nalo amijikia Atua, a kialo im̃auano nalo na amila meravo ban kito ka nalo maka ajikia leleio. Kialo iviso minunu a mijalele, parilo kirisikili laka, nalo maka avare ka ala im̃auano novo tai leleio.