Yù Olu nga Túrâ ni Pablo sù ira Manguruk nga taga Tessalonika
Yù Meyannung sawe Túrâ ni Pablo
Gári, netádday yù purubinsia na Masidonia sù ngaw páppatulán na Roma. Á Tessalonika yù karakalán na ili sù purubinsia na Masidonia, nga paggianán nayù ira mammaguray ta purubinsia. Á aranni ta ili na Pilippay yù ili na Tessalonika.
Á páno ri Pablo kári Silas kâ Timotio ta Pilippay, nga mappassiár nga mangilayalayâ sù bilin ni Namarò, naddagâ ira ta Tessalonika, tapè mangilayalayâ ira sù ira tatolay tán. Á aru yù ira nga ari Kudio nga nanguruk sù bilin ni Namarò megapu sù pangilayalayâ di Pablo.
Á ari nabayák di Pablo nga mangilayalayâ lage na jimittál yù ira ikáttole ra nga Kudio nga mapassil sù ari Kudio nga manguruk, á pinappatapátu ra yù ira ngámin nga tatolay tán nga ari manguruk, tapè jigirigátad da di Pablo. Á yáyù nga nánaw laguk di Pablo nga minay ta Korinto. Á manganánnuán, jinok ni Pablo si Timotio ta umay mattúllun sù ira manguruk nga maggián ta Tessalonika.
Á panoli ni Timotio ta gián ni Pablo ta Korinto, kinagi na yù ngámin nga meyannung sù ira manguruk nga maggián ta Tessalonika, nga jigâ da ánna yù napasigaggà nga ángngikatalà da kâ Apu Kesu, ánna yù ngámin nga akka-akkuád da ta pagiddak da sù pattoli ni Apu Kesu. Á yáyù nga initúrâ ni Pablo yù itabarang na nira nga taga Tessalonika.
Yù Mayán nayù Túrâ
Yù Pangayâ ni Pablo megapu sù ira Manguruk nga taga Tessalonika (1:1–3:13)
Yù Napiá nga Ággangnguá tam nga Ipagayáyâ ni Namarò (4:1-12)
Yù Mesimmu sù ira Manguruk nga Námmatay (4:13-18)
Magiddak ittam ta Pattoli ni Apu Kesu (5:1-11)
Yù Maporián nga Itabarang ni Pablo (5:12-28)
1
Yù Pangayâ ni Pablo megapu sù ira Manguruk nga taga Tessalonika
1 Sikami nga mattúrâ di Pablo kári Silas kâ Timotio. Á túratám mi sikayu nga maggián ta ili na Tessalonika, nga wáwwagi mi megapu ta ángnguruk tam kári Namarò nga Yáma tam kâ Apu Kesu Kiristu nga Yápu tam. Á parè bì ta ikállà na kayu ni Apu tapè magimammà kayu, ánna napiá yù ággián naw.
2 Á sigídá mi kayu ipakimállà kâ Namarò, ánna maddáyaw kami kuna megapu nikayu ta ngámin nga pakimállà mi. 3 Á paddáyo mi kâ Namarò nga Yáma tam, ipanonò mi kuna yù ngámin nga napiá nga akkuán naw megapu sù ángnguruk naw kâ Apu Kesu, ánna yù kaláppà naw nga mangabbák sù ira kábulun naw megapu sù ayâ naw kâ Namarò. Á ipanonò mi gapay kuna yù pagattam naw ta jigâ megapu sù napasigaggà nga ággiddanáma naw kâ Apu Kesu Kiristu nga Yápu tam.
Yù Pangikatalà nayù ira taga Tessalonika
4 Wáwwagi mi, nga iddukan ni Namarò, ammu mi ta kuruk nga sikayu yù piníli na, gapu ta nanguruk kayin. 5 Ta ari yù ubobuk na tolay yù naginná naw, nu ari galâ yù kuruk nga napiá nga dámak, nga inilayalayâ mi nikayu megapu sù pakáwayyá nayù Mangilin nga Ikararuá. Á ari kami mabbábáng ta pangilayalayâ mi nikayu, ta ammu mi ta makáwayyá yù ubobuk ni Namarò. Á sikayu, ammu naw yù napiá nga nonò mi nga inipasingam mi ta pakipaggiám mi nikayu, ánna yù napiá nga ángngabbák mi nikayu. 6 Á panguruk naw sù bilin, pinárigán naw kami ánna pinárigán naw si Apu Kesu nga Yápu tam, mássiki nu narigirigâ kayu megapu sù panguruk naw. Á pinagayáyâ na kayu nayù Mangilin nga Ikararuá megapu sù bilin nga inalawâ naw.
7 Á yáyù nga sikayu yù párigán nayù ira ngámin nga manguruk nga maggián ta purubinsia naw nga Masidonia ánna purubinsia na Akeya. 8 Ta melayalayâ yù napiá nga bilin ni Apu Namarò ta ngámin nga lugár na Masidonia ánna Akeya megapu nikayu. Á ari lâ tán nga lugár, nu ari gapay ta nassamâ ta ngámin nga lugár yù dámak nga meyannung sù ángngikatalà naw kâ Namarò. Á yáyù nga awán laguk ta máwák mi nga makkagi. 9 Á ta ngámin nga angayám mi, ubobugan nayù ira tatolay yù napiá nga pangálliuk naw nikami ta ánge mi nikayu. Á iparámak da gapay yù pabbabáwi naw sù pakimore naw ta sináddios, tapè si Namarò lâ yù passerbián naw, nga kuruk nga táttádday nga sigga-inángà ta áddè ta áddè. 10 Á ubobugad da gapay ta iddi-iddagán naw yù pattoli nayù Anâ ni Namarò nga maggapu ta lángì. Aggina si Apu Kesu nga pinaginnanole ni Namarò, á iyígù na ittam sangaw, tapè ari ittam mekanakanâ sù pangukum ni Namarò.