Na Usu-usu Ana Pol Tanaa
Pilimon
Gere Mamaani 'Iniai Bukani
'Oha na 'e sae na haa i taha nagau arunga ta'aa di'u 'inia, 'a gere bwara 'anai 'adoma'i nugasia. Ni marehosi 'ia Pol 'a aidangisia na'i 'oha na hauai usu-usuni tanaa Pilimon.
'Ia Pilimon 'e ta'i sae toto'ora na awa na'i 'omaai Kolosae. 'Iia 'a to'oraai kae ruma ma to'ora'i ro'u i mwani slev nara tau'aro tanaa. Hoita, 'a 'ariwou ma'e ta'i 'iniraaui slev ana'isi 'a beriai ha'a ma hora'a. Mia Pilimon 'a taesu'a 'ana 'iniai here na hauasi.
'Ariwou ma'e ta'i 'oha na 'ia Pilimon 'a daa i usu-usu baania Pol. Na'i 'ohasi 'a kae heimwaota'i di'u na'i 'oha na aidangisia do 'ia Pol 'a heisadoi beia Onesimas na horasi. 'Irarua raru awa goni na'i rumaniho'o, ma na'i madoraa nararu awa 'isi 'ia Onesimas 'a rihosi ma hinihini. 'Ariwou ma garangi'ai 'oha nara ga'i ha'ahura'ahia Onesimas baaniai rumaniho'o. 'Ia Pol 'a hadahada wetewete tanaa do'ai 'ari aho'i beia Pilimon. 'Ia Pol 'a 'irisia do'ia Pilimon 'ai 'adoma'i nugasia Onesimas, mai waia aho'i siri na'i raronai ruruha ana. 'Ia Pol 'a 'unua do 'iia 'ai taha mau beia Pilimon na'i muri 'anai 'omesia do mwane maho ra 'ari odo-odo.
Na'i Baebol 'a ai'a ha'arangasia goro hura'a taha nagu haua Pilimon na'i murinai 'oha na 'oha'iniai usu-usuni. Ma'ata ni taha na'ia Pol 'a usu'i na'i usu-usuni ra rawamataa goro. 'Ia Pol 'a 'unua do na'i 'oha nagai ha'atari'aa ta maho tanaa ta sae gai aho'i 'ari beia 'anai ha'angonia 'anai 'adoma'i nugasigia. Mana'i 'oha narai haa'i taha na taritari'a tanagia, gai to'oraai 'adoma'i nugasi tanaraaui nei nara haa'i taritari'a tanagia. Na'i 'oha na'oi 'oha'iniai Pilimon, 'oi 'adoma'i sibasiba 'inia tei na 'o ga'i 'adoma'i nugasia 'inia ta maho.
1
1 Tana'o Pilimon, sae goro agua na garaa tatau'aro tanaa God:
'Inaua Pol nau hauai usu-usuni na'i madoraa nau awa i rumaniho'o 'iniai taroha'inia agua i Taroha Goro 'inia Jisas Kraest. Mia Timoti, do'oragaau na'i Kraest, 'a awa beiau ro'u 'ohani. 2 'Oi 'unuai ha'atee wa'ewa'e ameeu tanaai asimeeu beia Kraest, 'ia Apia, ma ro'u tanaa Akipas, na wetewete 'anai ura bwarasiraaui maerongagaa'i. Ha'atee wa'ewa'e ameeu tanaraau hako ro'u i noni hinihini nara ririhunga'i na'i ruma amua. 3 Mau ha'arahesi mia God i Amaga, mea Araha aga, 'ia Jisas Kraest, rarui ha'agorohi'amou mararui ha'a-awahi'amou goro.
Heita'ahi Mana Hinihinina Pilimon
4 'Oha nau ha'arahesi 'a'auhi'o Pilimon, 'au ha'atee ha'agorohia taraua God. 5 'Inia 'au rongo to'oana i heita'ahi na'o haa tanaraau hako i noni hinihini mana hinihinimu beia Jisas, Araha aga. 6 Mau ha'arahesi dona hinihinimu beia Kraest 'ai 'a'auhi'o 'anai hauai taha na odo-odo. 'Onaa 'ai o'asi, 'ai ha'a-aidangisi'o ro'u wou 'ini'i mwani maho goro 'ia God na haa'i tanagia na'i tahingaga beia Kraest. 7 'Au ha'atee ha'agorohia ro'ua God 'iniai heita'ahi amua tanaraaui noni ana'i na ha'a-wetewete'i 'adoma'idaa'i. 'Au wa'ewa'e di'u 'inia, ma ha'a-wetewetea di'u ro'u wou i 'adoma'igu.
Pol 'A Ha'angonia Pilimon
Do 'Ai 'Adoma'i Nugasiai 'Inona Onesimas
8-9 Tarana naasi, 'au raba ha'angoni'o 'anai hauai maho na odo-odo do'o ga'i haua. 'Onaa 'au rabasia, 'au ga'i matai ha'a-'usu'usu'o moi, 'inia 'inau 'e Ha'ataari ana Kraest. Ma'ata, wai ha'angoni'o moi 'iniai heita'ahi agaraa hairiu. 'Onaai 'iraraa amua, 'inau 'au wari'a, mau awa na'i rumaniho'o 'inia i tatau'aro agua tanaa Kraest. 10 Naasi, 'au ha'angoni'o do'oi arunga ta'ahia Onesimas,* 10 Ni 'ado'ado 'anai Onesimas na'i ha'atee ni Grik naasi hei'a'auhi. 'inia 'iia 'au waia mai tanaa Kraest na'i madoraa nau awa 'ini na'i rumaniho'o, ma 'iia 'a 'onaa do 'e gare agua. 11 'Iia ai'a 'a'auhi'o ga'u na'i na'o, me na'i 'ohani 'iia 'a matai 'a'auhigaraa di'u.
12 Ma rei'uaa nau ta'ahia di'u, me wai ha'ataaria'a aho'i wou tana'o. 13 'Au 'irisia do 'a ga'i awa moi 'ini beiau mai 'a'auhiau na'i 'oha nau awa i rumaniho'o 'iniai taroha'inia agua i Taroha Goro. Me 'iniai ai'a awa amua 'ini, 'iia 'a ga'i hauai tau'aro na i'oe 'o ga'i haua. 14 Ma'ata, 'a ai'a goro do'ai 'a'auhiau 'oha nau ai'a ha'a-tohonga'inia bei'o. 'A goro 'onaa 'oi ha'awatea, ma'ata 'oi watea beiai 'adoma'imu hako, 'a gasi 'onaa do'au ha'a-'usu'usu'o moi 'inia.
15 Gasi 'ia God 'a ha'awatea Onesimas do'ai hora baani'o suria ta gere madoraa moi, neina 'oha nai aho'i mai, naasi 'aigui awa tarau'a bei'o. 16 'Iia ai'a do'e slev moi tana'o, ma'ata 'ohani 'iia 'e huunai do'oramu na'i Kraest nau ta'ahia di'u. Ma na'i 'ohani, ni heita'ahi amua tanaa 'ai di'ua ro'u i heita'ahi agua. 'Inia 'oi ta'ahia, ai'a do 'onaa moi sae tatau'aro me 'ai 'onaa do 'iia 'e do'oramu ro'u beia Kraest.
17 'Inau 'e ta'i bei'o na'i ruruha ana Kraest. Naasi 'au rabasia do'oi ha'amaotoa aho'ia Onesimas 'onaai ha'amaotoau na'o ga'i haa. 18 'Onaa 'e mareho na ha'atari'aa tana'o ma'ua 'e ha'a na ai'a su'ua, 'inau na waigui orisia aho'i tana'o. 19 'Anai ha'ata'inia do 'inaua Pol wai su'u'i aho'i tana'o i mareho 'isi, 'au usua dio i tatarani 'inia i rimagu haariau. Sae tatau'aro agua 'agu ai'a usu-usu'a tanaau. Hoita, ma'oi aidangisia do'e maho na i'oe 'o ai'a su'ua ro'u mau tanaau na raha di'uai kaoni ana Onesimas. Naasi i 'a'auhi'o nau haa 'anai ha'a-aidangisi'o 'inia i tahinga haoru beia Kraest.
20 Hoita, do'oragu beia Kraest, 'au ha'angoni'o 'anai ha'amaotoa aho'i. 'A goro 'oi ha'a-wa'ewa'eau na'i tahingagu, 'inia 'igaraa 'e ta'i beia Kraest. 21 'Au hauai usu-usuni 'inia 'au 'iraraa do'oi ha'isuriai maho nau ha'angoni'o 'inia. Mau 'iraraa ro'u do'oi goro 'inia Onesimas di'u'i maho nau 'unu'i 'isi.
22 Ma'e ta'i mareho ro'u nau raba 'unua tana'o. 'Au 'irisia do 'oi ha'aagaua ta dora taragu na'i ruma amua, 'inia 'au hinihini do'ia God 'ai arami'i ha'arahesi amoo'i 'iniau. Ma bwa'i orea mawai ataha aho'i bei'amou.
Ha'atee Ha'ahako
23 'Io. 'Ia Epafaras 'a 'unuai ha'atee wa'ewa'e ana tana'o. 'Iia 'a awa ro'u beiau na'i rumani ho'oni, 'iniai haua ana ro'u i tatau'aro ana Jisas Kraest. 24 'Ia Mak, 'ia Aristakas, 'ia Dimas mea Luk, mwane rau 'a'auhiau 'anai taroha'iniai Taroha Goro, rau 'unua tanaau dowai ha'ataaria ro'u wou i ha'atee wa'ewa'e adaau tana'o.
25 'Au ha'arahesi mia Jisas Kraest, i Araha aga, 'ai ha'agorohi'amou hako.