Me Je i
Luk Jaqen
Aqunec Je
Me je i cel dana bahic jaqen eu je oso qee nijel. Euqa Luk buk i jaqen eunu ihacena eu ceteh mati nijia. Lukna me jeca Aposel Agena Cabi occa ale caca. Dana osol buk lecis i jaqen. Aposel Agena Cabi ocna Luk uqa saen leihna “ege” ec jaqen, eu Aposel 16.10-17, 20.5-15, 21.1-18, 27.1-28.16 feiga. Eunu Luk uqa Aposel jaqen. Odocob Aposel bukna Luk uqa “O Tiofilas ijana buk casac jaqem,” ec jaqen. Buk uqa casac jaqen eu Lukna me je. Luk uqa Juda dana qee, uqaha dokta.
Me je Luk jaqenna ege Jisas uqa Isrel agena Cahahaadec eu Anut uqa ija suldocomin hugian ec wele maden eu foqona. Odocob Jisas uqa dana cajaca mahamaha cunug bilegina eundecha agena Cahahaadec eu foqona. Tibudna Kis uqa Jisas sawen dana cajaca me je maadecnu suldon eu Luk jaqen. (4.18 feiga.) Eu mele, Lukna me jena Jisas uqa dana cajaca age culumen filfil gahidoginanu walol dodon cesuladen eunu je mati nijia.
Ceteh Jisas odon eu gaid dana cajaca odadeceb age ceelein. Age buk sanan mecna feiga, eu 1.42-48, 2.10. Eu odiha Jisas sao jobon ohis ten saenna dana age ceelein. Age buk cit qocna feiga, eu 24.52. Ceteh haun Luk jaqen. Uqa inondoc kobolca, Kis Gunna cabi occa, Jisas dana cajaca agena silail cagasiadenca, caja age odoinca, talacunugaca eunu je ben jaqen.
Je mati eu Lukna me jena nijia euqa buk fil osona qee nijel. Eu odi Jisas uqa mahana calennu saena (dac 1-2), uqa Sameria dana osonu galolo je eunu saena (dac 10), dana melah oso jahunec galolo je eunu saena (dac 15), odocob Sakiasna dodo eunu saena (dac 19).
Lukna me je eu Jisasna cabi oc sanan mec. Luk uqaha Aposel Agena Cabi oc jaqen. Eu Jisas uqa sao jobon ohis teceb aposel odoinnu dodo.
Je Dunuhnu Dado Mec
1. Aqunec je (1.1-4)
2. Jisas mahana calen (1.5-2.52)
A. Jisas calecnu madec (1.5-56)
B. Wa Joadec Jon calen (1.57-80)
C. Jisas calimei mel ben men (dac 2)
3. Jisas uqana cabi ocnu saciadon (3.1-4.13)
A. Wa Joadec Jon uqa Jisas aqunidon (3.1-20)
B. Jon uqa Jisas wa jouden (3.21-22)
C. Jisas uqana sihul ijanaga (3.23-38)
D. Seten uqa Jisas temdu fen (4.1-13)
4. Jisas uqa Galili hatuna cabi on (4.14-9.9)
A. Uqana cabi Galili ono sanan men (4.14-41)
B. Uqana Galili hatuna coboc osoldoc (4.42-5.39)
C. Juda agena cuha deelnu je fee dadanec (6.1-11)
D. Jisas uqa aposel 12-pela nesili ehaden (6.12-16)
E. Uqa maha tutucna me je iwaladen (6.17-49)
F. Uqa Kapaneamnaca Nennaca kobolkobol odoc leih odon (7.1-18)
G. Wa Joadec Jon uqa Jisas je oso sisildon (7.19-29)
H. Jisas Farisica je madein (7.30-50)
I. Uqana Galili hatuna coboc lecisdoc (8.1-3)
J. Anutna culnu galolo je (8.4-21)
K. Uqa Galili wa gad cagoc leti nuen (8.22-39)
L. Uqana Galili hatuna coboc cijeddoc (8.40-9.9)
5. Jisas uqa Galili hatu culdimei cudun filfil nuen (9.10-50)
A. Uqa Galili wa gad cagoc leti uqa cudun ono isec nuen (9.10-17)
B. Uqa Sisaria Filipai taunna nuen (9.18-50)
6. Jisas uqa Judia hatu ono cabi on (9.51-13.21)
A. Uqa Sameria hatuna cocobi Judia hatu ono nuen (9.51-62)
B. Uqa dana 72 suladeceb belein (10.1-24)
C. Uqa Sameria dana oso uqa Juda dana cesuldonnu galolo je ec loo je iwaladec dana madon (10.25-37)
D. Uqa Betani jobon li Mata Mariaca fecialen (10.38-42)
E. Uqa Judia hatu ono dana cajaca iwaladen (11.1-13.21)
7. Jisas uqa Peria hatu ono cabi on (13.22-19.27)
A. Jic cebec sosog (13.22-30)
B. Leih Jisasca limeig Herod qagahigia ec madon (13.31-35)
C. Jisas uqa Farisi oso uqana jona len (14.1-24)
D. Age Jisas toodocnu madifeig casac cisdu cuhadoiga (14.25-35)
E. Sipsip jahunecca, meen qaig oso jahunecca, dana melah oso jahunecca galolo je (dac 15)
F. Dana cabi cofdoc docnu galolo je (16.1-18)
G. Lasaras dana cehewanca (16.19-31)
H. Iwaladec je filfil (17.1-10)
I. Jisas dana 10-pela lepraca me maden (17.11-19)
J. Anutna cul hugian (17.20-37)
K. Caja wij dana gesilecca galolo je (18.1-8)
L. Farisica takis cedec danaca galolo je (18.9-14)
M. Jisas mel sim eeladen (18.15-17)
N. Dana ilo cehewanca uqa Jisasca hocob madesin (18.18-30)
O. Jisas uqa cal mimei ceseli cajigian ec maden (18.31-34)
P. Jisas dana ameg galuc mec me muden (18.35-43)
Q. Jisas uqa Sakias madon (19.1-10)
R. Cabi dana 10-pela age meen qaig oinnu galolo je (19.11-27)
8. Deel 6-pela hedocob Pasowa Sab Jec Ben Deel caligiannu ninijen Jisas uqa age qocobil cal migiannu Jerusalem ono nuen (19.28-23.56)
A. Jisas uqa kingwe Jerusalem dunuh len (19.28-44)
B. Jisas uqa tempel jo soidon (19.45-48)
C. Jisas uqa Juda dana benben gami fee dadani hedoin (dac 20)
D. Jisas uqa Oliw Aluhna cit qoc saennu maden (dac 21)
E. Jisas uqana malogom gami Pasowa sab jein (22.1-38)
F. Jisas Oliw Aluhna Memeg inondon (22.39-46)
G. Age Jisas hewudein (22.47-65)
H. Age Jisas gesildoin (22.66-23.25)
I. Age Jisas na babalecna tuitu qocobil cal men (23.26-56)
9. Jisas cal mecnadec ceseli cajen (24.1-53)
A. Jisas ceseli cajen (24.1-12)
B. Jisas ceseli caji hedocob cabi on (24.13-49)
C. Jisas sao jobon ohis ten (24.50-53)
1
Luk uqa je i Tiofilas jaqiton
1-4 O Mei Tiofilas, je age sahecebil dom eu mele eunu jaqihigennu me bahic cisdom. Dana mati age ceteh i ege gemo calennu je jaqecnu odoin. Eu odiwe dana age Anutna jenu cabi dana ceteh i sanan mecnadec amagana fefegin hon ageha ceteh eunu je qasali maadein je eu suldugein. Eunu ijaha hahawannadec lili qila hon ceteh i cunugnu sisilimig gug domnu je tutuc himec jaqihigina.
Ensel Sekaraia aideg Ilisabet Jon basigiannu madon
5 Odocob saen Herod uqa Judia hatu agena king bibilen nawel tawec ihanec dana oso, ijan Sekaraia, bilen. Sekaraia uqa Abaisa amnadec, eu ihanec dana agena am oso. Uqa aideg ijan eu Ilisabet. Uqa Eron ihanec dana sihulnadec. 6 Ale Anut amegna ititom bilesin. Ale Tibudna loo jeca, uqana jeca eu cunug toodu bibilesi cobosin. Eunu Tibud alenu jeca qee. 7 Euqa Ilisabet uqa goud. Uqa Sekaraiaca ale toia bahic. Eunu ale melca qee bilesin.
8 Saen osona Sekaraia uqa uqana ihanec dana am age tempelna Anut amegna cabi oogin 9 agena cabi siwec saenna Sekaraia uqa Tibudna tempel gun hamol limei ja dedemanca hudecnu cabi eunu age satu udocna gesilimeig uqa utein. Odocob uqa uqana cabi muguh mec eu umei tempel dunuh len. 10 Odocob uqa ja dedemanca huhuden dana mati bahic age maha gumu inondudu tawein. 11 Saen euna Tibudna ensel uqaca hon. Uqa ihanec cabal ja dedemanca nijen eu meulana isec tawen. 12 Odocob Sekaraia uqa eu fimei filiciti ben bahic cucuien. 13 Odocob ensel uqa madon, “Sekaraia, Anut hinana inondoc dah men. Eunu cain cucuiagaun. Hina aiden, Ilisabet, uqa mel oso basihigian. Odocob hina mel ijan Jon qogan. 14 Odocob hina ceelii celeboegan. Hina aiden mel eu baseceb dana mati bahic ceeloqagan. 15 Ge, uqa hibna dana binanca Tibud amegna cobigian. Uqa wainca ceuca qee jeiaun. Saen uqa anag waugna bibileb uqa Kis Gun cacawac mec biligian. 16 Odocob uqa Isrel dana cajaca maadeceb age tului falicdumeig Tibud, agena Anut, uqaca ceseli hoqagan. 17 Odocob uqa memegail melemegailca gabanadigiannuca, feeec dana maadeceb age tului falicdumeig dana ititom agena cisdoc toodoqagannuca, Anutna dana cajaca Tibudnu qagu madeceb amaga mimi biluqagannuca uqa Ilaijana dumanca, uqana gagadic odocca umei Tibud aqunitu cobigian,” don.
18 Odocob Sekaraia uqa ensel sisildon, “Ija dana toia. Ija aideniha toia. Eunu hinana je eu melefo ija adi dugen?” don.
19 Odocob ensel jejeg hewi madon, “Ija Gebriel, ija Anut cemenug tawigina. Anut ija sulteceb hina je me i mahigennu huga. 20 Faga, ijana je eu uqana saenna bahic fegan. Euqa hina je eunu wawin qee meleelnu hina con je madec eu qee migian. Hina con odi himec bibileb li saen ijana je hahun mahiga eu caligian,” don.
21 Odocob dana cajaca age Sekaraia susumudi bileig age eetanu saen cecelac tempel gun hamol bilia? ec cisdoin. 22 Odocob uqa dunuhdec calimei je madecnu co ihoc men len ihoc qee lel. Eunu age uqa tempel dunuhna codoc oso fen ec doin. Odocob uqa qee je madec ebenna dih dado maden.
23 Odocob uqa tempelna cabi qee meceb uqa uqana jona ceseli nuen. 24 Odocob saen leih nueceb Ilisabet uqa waugca men. Eunu jagel 5-pela jona dih bilen. Uqa maden, 25 “Qila saen ina Tibud cesulteia. Anut ija majani dana cajaca amagana bilen eu qu qeleia,” en.
Ensel uqa Maria Jisas basigiannu madon
26 Odocob jagel 6-pelana Ilisabet waugca bibilen Anut uqa ensel Gebriel Galili hatu ono suldocob jobon oso, ijan Nasaret, ono nuen. 27 Uqa mel aid taula oso, uqa dana oso, ijan Josef, ugiannu bilen eu uqaca je hewi nuen. Josef uqa King Dewidna sihuldec. Mel aid taula eu ijan Maria. 28 Odocob ensel uqaca humei madon, “Feeleo, hina Anut amegna me bahic biligina! Tibud hinaca bilina,” don.* Grik jaqec je hilah leihna age je oso tubdu jaqein eu odi: “Uqa hina eelheia!” don.
29 Euqa Maria uqa ensel odi madocob uqa waug ben bahic culumen don. Odocob uqana je eu cel gugnu? ec cisdon. 30 Odocob ensel madon, “Maria, hina Anut amegna me bilec wele oga. Eunu cain cucuiagaun. 31 Faga, hina wawinca cobimeg mel oso basegan. Odimeg mel eu ijan Jisas qogan. 32 Uqa hibna dana binanca biligian. Odocob age Anut Ohis Bahic Melah doqagan. Anut Tibud odudeceb uqa king caligian. Uqa asag Dewid king bilen eu odi biligian. 33 Odocob uqa Jekobna sihul agena king bileceb catanigian. Uqana cul qee qee meiaun,” don.
34 Odocob Maria ensel madon, “Ija dana oso qee olom. Eunu ceteh eu adi caligian?” don.
35 Odocob ensel jejeg hewi madon, “Kis Gun hinaca humei u tacihigian. Odocob Anut Ohis Bahic uqana gagadic odoc jahulhigian. Eunu mel hina basigian eu age gun oqagan, age Anut Melah oqagan,” don.
36 “Faga, hina cotin Ilisabetnu cisdoga. Uqa toia bahic. Uqa mel basecwe qee egina qa qila uqa jagel 6-pelana mel waugna bilia. 37 Ge, ceteh oso Anut uqa odocnu ihoc qee oso qee nijel,” don.
38 Odocob Maria madon, “Faga, ija Tibudna cabi caja. Hina ija odi mataga eu ijaca caleiale,” don. Odocob ensel uqa cuculdi nuen.
Maria nuimei Ilisabet fen
39 Saen eu odina Maria uqa taun oso aluhna nijen eu Judia hatuna ono mahucwe nuen. 40 Uqa nuimei Sekaraiana jona limei Ilisabet alalagdon. 41 Saen Maria uqa Ilisabet alalagdodon waugna mel sim uqa bicolen. Odocob Anut uqa Ilisabet Kis Gun cacawac meceb 42 uqa jejeg gagadicca utai madon, “Hinana eeldoc eu caja cunug agena eeldoc wooladec. Mel sim basegan eu Anut uqaha eeldugian. 43 Ija adec ijana Tibud uqa anag ija mecitigiannu ijaca hoia? 44 Ge faga, saen ija dahini hinana alalagtec ec docob mel wawina bicolimei alegeeia. 45 Tibudna je ensel mahen eu odi caligiannu hina wawin meleen. Eunu hina ceelhec biligina,” don.
Mariana due
46 Odocob Maria maden:
“Ija wawi Tibud binan sulina.
47 Anut ijana Cahahatec.
Eunu ija doloni ceelena.
48 Ge, ija Tibudna cabi caja himec.
Euqa uqa ijanu dahig bilia.
Gec faga, qila hibnaca dana cajaca cunug age ijanu mati eeladec oin toqagan.
49 Anut Gagadicca uqa ceteh ben bahic ijanu odeia.
Uqa ijan eu gun.
50 Dana cajaca wele bileinca, qila bileginaca cunug age Anutnu cumunegina eu
Anut uqa agenu waug qona.
51 Uqa uen gagadicca huleldumei dana feeec hewadi bilisaadeceb buadein.
Agena cisdoc qee men.
52 Uqa king benben ilo cudunnadec hewadeceb mahana nein.
Odimei dana age mahana bilein eu suli u binanagaca maden.
53 Uqa dana wenca eundec ceteh me aden.
Odimei dana cehewanagaca age ceteh me oso qee adimei suladeceb cetehca qee belein.
54-55 Uqa weleca Ebrahamca, uqana sihul eundecca je hahun maaden eunu cisdon.
Uqa agenu waug qocnu dahig bileceb catanigian ec maaden.
Eunu uqa Isrel dana age Anutna cabi ogina cesuladen,” en.
56 Odocob Maria uqa jagel cijed odi Ilisabetca bilimesi uqa uqana jobon ceseli nuen.
Ilisabet uqa Jon basen
57 Odocob Ilisabet uqana mel basecnu saen caleceb uqa mel oso basen. 58 Odocob utuqanelca, uqana sihulca age Tibud uqa me bahic uqanu waug qon eu dumeig age uqaca ceelein.
59 Odocob deel 8-peladoc caleceb age mel eu deweg cagu qocnu age hoin. Odimeig age ijan Sekaraia eu memeg jomog qoqaga bili odoin. 60 Euqa anag maaden, “Cain! Uqa ijan Jon qoqagan,” aden.
61 Odocob age madoin, “Hinana sihulna eundec oso ijan edecca qee,” doin. 62 Odimeig age mel memeg ebenegana dado mumudeig cel ijan qoum? ec sisildoin.
63 Odocob Sekaraia uqa jamel oso jaqecnu maadeceb age utecebil uqa jaqiaden, “Uqa ijan eu Jon,” jaqen. Odocob age cunug tumatumaein. 64 Odocob saen euna dih Sekaraia uqa co je madec eu fihilicdon. Odocob uqa Anut binan sulen. 65 Odocob dana cajaca cunug age cemenug bilegina dumeig cucuiein. Odimeig age ceteh odi calennu je eu Judia hatuna dana cajaca cunug age doin. 66 Dana cajaca cunug age je eu dumeig age je eunu cocobi cisdoin, “Mel sim eu hibna adi biligian?” doin. Ge, Tibudna gagadic odoc uqaca bilen eunu doin.
Sekaraiana due
67 Odocob Anut odudeceb Jon memeg Sekaraia uqa Kis Gun cacawac meceb uqa je hahun madec odi maden:
68 “Ege cunug Anut binan suluqale, uqa Isrel egena Tibud.
Uqa uqana dana cajaca cahahagecnu egeca hoia.
69 Uqa uqana cabi dana Dewidna sihuldec odocob
Cahahagec Dana gagadic oso calen.
70 Weleca Anutna je hahun gun dana Anutna je eu conogana odi madein,
71 ‘Anut uqa egena cad eunadec cahahagigian.
Dana cunug age egenu gemanaga beceb sagaggegina age ebeneganadec cahahagigian.
72-73 Eetanu odi odigian? Ege asigeil agenu waug qugian.
Odimei je cagoc Ebraham madon eu uqana gun bal cehec je uqa dahig biligian,’ ein.
74 Eunu Anut magen, ‘Ija agena cad eunadec cahahaadigen.
Age cucuiecca qee ijana cabi dana biluqagan.
75 Eunu agena deel cunug cebac bilec age ititomca gunca ija amina coboqagan,’ gen.
76 ‘Melami, hina age Anut Ohisdec uqana je hahun madec dana hoqagan.
Hina Tibud uqana jic saciadocnu aqunitogan.
77 Hina Anutna dana cajaca age docnu maadegan,
“Anut agena silailnu uqa qee wadacadeiaun.
Eunu uqa cahahaadigian,” adegan.
78 Egena Anut uqa malolca. Uqa egenu waug qona.
Eunu uqa fulacdoc sao ohisdec suldocob egeca hugian.
79 Odimei dana age cal mec ihoc tuna bilegina age sao ohisdec fulacdoc fulacadigian.
Fulacdoc eu malol jic cobocnu ege dado migigian,’ en,” en.
80 Odocob mel eu deweg dologca osoben ben men. Uqa wadauna† Age je Matju 3.1na nijia eu feiga. bibilen leceb uqana saenna Isrel dana cajaca amagana camasac men.