Pol Uqa Jaqec Je Lecisdoc
Korin Tamanec Jaqiaden
Aqunec Je
Korin tamanec dana cajaca leih age Polnu je me qee madein. Odocob Pol eunu waug qon. Uhulec iwaladec dana leih age tamanec dunuh limeig age Pol eu aposel bahic qee ec madegina, odocob ageha Pol meen qaig Korin tamanec age Jerusalem tamanec eunu utein eu uqa sosogon on ec madegina. Odocob wele Pol uqa Korin tamanec feciadecnu ageca nui lecisdugian ec maaden. Euqa uqa qila ageca nui osol dih dugian ec je sulduaden. Eunu uhulec iwaladec age Pol uqana je eu tutuc qee egina. Eunu Pol uqa je tutuc mecnuca, uqa Korin tamanecca wawaga osol bilecnuca jaqec je i jaqiaden.
Jaqec je i sanan mecna Pol uqa je gagadic wele Korin tamanec maaden eunu madena. (Age 2.4 feiga.) Uqa je gagadic maadecnu qee gale dol, euqa age Polnu je me qee madein. Odocob age Polna je dumeig agena kobol tutuc mein, eunu qila Pol uqa waug ceelena.
Dac 1-7na Pol uqa eetanu uqana jic nuecnu cisdoc ibuldon eu sildiadena. Dac 8-9na Pol uqa Korin tamanec age Judia Kristen dana cajaca cesuladecnu meen qaig gabandu hedoqagannu cesusadena. Dac 10-13na Pol uqa aposel bahic eu maadena. Odimei uqa Korin tamanecca nuec bahic nuimei uqana aposel cabi Krais uten eu ugian ec jaqen. (Age 13.10 feiga.) Uqa ageca hugian euna uqa dana silail megina eundec gauc qee culadeiaun qa ulauladigian. (Age 13.2 feiga.)
Je Dunuhnu Dado Mec
1. Pol uqa uqana aposel cabinu madena (dac 1-7)
A. Feele adec je (1.1-2)
B. Pol uqa Anut cesuldon eunu hetaga don (1.3-11)
C. Pol uqa Korin ono qee nuel eunu sildiaden (1.12-2.4)
D. Korin age dana cahuldona eu uqana silail dahiniga celigian (2.5-11)
E. Anutna gagadic odocna aposel age cabi ogina (2.12-17)
F. Korin tamanec age Kraisnadec jaqec je oso (3.1-11)
G. Anutna kobolkobol eu cataniec fegina (3.12-4.6)
H. Aposel age hal ceteh meca dunuh bilina cinigwe (4.7-16a)
I. Kristen ege dewenige eu talah jowe mahana biluquna, eu bataweceb ege jo oso saona nijia euna bileqan (4.16b-5.10)
J. Dana cesuladeceb age Anutca wawaga osol migiannu Kristenna cabi (5.11-6.10)
K. Pol uqa Korin tamanec uqana simwe je camasac maadena (6.11-7.4)
L. Taitas Polca humei uqa Korinnu jena Pol wahohogdon (7.5-16)
2. Pol uqa Korin tamanec age Judia Kristen dana cajaca cesuladecnu meen qaig gabandu hedoqagannu cesusadena (dac 8-9)
A. Pol uqa Korin tamanec age meen qaig ben adoqagannu cesusadena (8.1-15)
B. Pol uqa Taitas cabi hijagulca age Korin meen qaig gabandocnu cesuladoqagannu suladen (8.16-9.5)
C. Dana oso uqa meca cehena eu uqa meca cedigian (9.6-15)
3. Pol uqa aposel bahic ihacadimei uhulec aposel age uqana cabi cilehdocnu odoin eunu je wadacduadena (dac 10-13)
A. Pol uqa uhulec aposel age uqa agena gadac dunuh len ec madein eunu je wadacadena (dac 10)
B. Pol uqa uqadodoc binan sulecnu gad je madena (dac 11-12)
C. Pol uqa Korin age agena wawaga meleec temdoiga ec madena (13.1-10)
D. Cit qoc je (13.11-14)
1
1 Ija Pol, ija Jisas Kraisna aposel. Ija Anut uqana cisdocna aposel calem. Ija ege wawige meleec cotige Timotica ele Anutna tamanec age Korin ono bileginaca, Anutna dana cajaca qagoc cunug age Akaia hatu cunugna bileginaca jaqiadowona. 2 Memige Anutca Jisas Krais Tibudca alena eelgec uum igec malol bilecca ageca biliale.
Pol uqa Anut cesuldon eunu hetaga don
3 Ege egena Tibud Jisas Krais uqa Memeg Anut binan suluqale! Uqa ege Anut Memige, odocob uqa egenu waug qoc cesulgecca gug. 4 Uqa culumen cunug egeca calena euna wahohoggena. Eunu ege leih age culumen filfilna bilegina eu wahohogadecnu ihoc eu odiwe Anut wahohoggena. 5 Ge, sogoec ben Krais gahidon eu egeha gahidoqona. Eu odiwe ege Kraisca gabandoc biluquna euna Anut gehca wahohoggena. 6 Ege wahohogadecnuca Anut cahahaadecnuca eunu culumen gahidoqona. Anut uqa age wahohogadecnu ege wahohoggena. Eunu age culumen ege gahidoqona eu gahidogina saen euna age gagadic tawecnu Anut cesuladena. 7 Ege doqona, Anut age egeca wahohoggigian eu odiwe age egeca culumen gahidoqona. Eunu age gagadic tawoqagannu ege wawige meleena.
8 O wawige meleec cotiel, culumen Esia hatuna egeca hocob gahidom ec doqagannu gale gena. Ge, culumen ben bahic egena gagadic odoc wooldoc ege cilehgen. Culumen eu cilehgegen ege cal mecnu himec cisdom. 9 Eu mele, ege gesilgec dana ege cal mecnu wele maden ec tebandom. Euqa ege egena gagadic odocnu cain cisdoqaun, ege Anut, uqa dana cal mecnadec tuliadeceb ceseli cajegina, eu uqana gagadic odocnu cisdoqannu culumen eu egeca calen. 10 Culumen me qee i qigeceb cal mecnu ihoc qa Anut cahahagen. Odocob hibna Anut uqa haun cahahagigian. Ceteh me qee fadalgecnu egeca hohob Anut uqa gaid cahahagigian ec wawige gagadic tatawi meleena. 11 Eunu age Anut egenu inondodoig cesulgegina. Odocob Anut uqa egenu inondoc mati wadacdugian. Odocob Anut uqa ege eelgigian. Odocob mati age jejenega suli u egenu Anut hetaga doqagan.
Pol uqa Korin ono qee nuel eunu sildiaden
12 Ija ceteh inu culai madigina, ija dana cajaca cunug Anutna kobol tutucnaca kobol gunnaca odadem ec wawi madena. Ija dana agena cisdoc silecna qee odadelem qa Anutna eelgec uum igecna odadem. Odocob ija kobol ina Korin age wooladi odadem. 13-14 Ge, ija je jaqiadecemin dogina saen euna age je sanijimeig uqana gug du cuhadoqagannu eu himec jaqiadigina. Ija je fil qee jaqiadelem. Eu mele, je leih ija jaqiadem eu age uqana gug qee fogo adel. Euqa age ijana je jaqiadec cunug uqana gug fogo adigian eunu wawi meleena. Odocob Jisas Tibud uqana ceseli hoc deelna age ija kobol odadem eunu culinige oqagan eu odiwe ija agenu culunuga ugen.
15 Kobol ija odadigina eu age gale adena eunu wawi gagadic meleen. Odocob gug inu age eeladec lecis oqagannu ija age casac li feciadigen ec cisdom. 16 Ija age casac li feciadimig cuculadi Masedonia hatuna nuigen ec cisdom. Odimig onodec ceseli haun feciadigen ec cisdom. Odecemin age ijana jic cesultecebil ija cuculadi Judia hatuna nuigen ec cisdom. 17 Eu odi cisdom eunu age ija wawi lecisca ec cisdoginafo? Ija jic cobocnu cisdugina saen euna ija dana mahanadecwe cisdugina ec cisdoginafo? Ija “Ese, ese,” ecca, “Qee, qee,” ecca saen osolna ihocihoc madigina ec cisdoginafo? Qee bahic! 18 Anut uqana je cunug madena eu toodu odona. Eu odiwe ijaha je cunug maadem eu odi “Ese, qee,” ecca osoben qee maadelem. Ija je mele himec maadem. 19 Ge, ijaca, Sailasca, Timotica ege age gemona Anut Melah, Jisas Krais uqana je qasali maadom. Odocob age dogina, Krais uqa “Ese, qee,” ecca osoben madec dana qee. Euqa Krais uqa ese ec madecebfi eu ese ec himec madena. 20 Anutna je hahun mati nijia. Odocob Krais uqa Anutna je hahun cunugnu “Ese” ec madena. Eunu ege Anutna je du hedumeb ege Krais ijanna dih ege “Mele” imeb Anut binan suluquna. 21 Odocob Anut uqa ege ageca osoben gagadic migimei ege Jisasca gabangeceb gagadic tawoqona. Odocob Anut uqa ege nesilgeceb uqana aposel biluquna. 22 Odimei uqa uqana sisi mec egeca migen. Odimei uqana Kis ege wawigena igen. Kis Gun eu Anut hibna ceteh igigiannu gale dona eu uqana naha matu. Eunu ege gaga inu Anut uqa hibna ceteh i igigian ec mele bahic doqona.
Pol uqa mahucwe Korin ono qee nuel
23 Ija Anut ijanna maadigina. Ija uhuladifig Anut uqa ijana uhulec eu camasac mudigian. Eu mele bahic, ija je haun maadimig culumen adecnu qee gale tel, eunu ija mahucwe Korin ono qee nuelem. 24 Ege agena wawaga meleec euna ilo biluquna ec qee madoqona. Age agena wawaga meleecna gagadic tawegina. Eunu age ceeloqagannu ege ageca osoben cabi oqona.