2
Karu apirsait ein nabuan ate, ro hit tmoeꞌ on mee?
1 Nahunu te, au ꞌtoit ki he hi mꞌonen amteek areꞌ too mfaun ein ok-okeꞌ. Karu hi mbaiseun Uisneno te, mtoit Je he In nturun areꞌ too mfaun ein anbin susat. Ma mtoit makasi msaꞌ, natuin In es reꞌ nmoeꞌ rais reko neu sin ok-okeꞌ. 2 Amteek ambi ꞌoen ein amsaꞌ anmatoom nok uisf ein ma ꞌnaakf ein. Nok ranan naan, hit arkit bisa tmoni tbi mamut, rameꞌ es nok es, ma taininaꞌ natuin Uisneno In romin, ma tmoni tbi raan amneot, on reꞌ tuaf-tuaf reꞌ naꞌbees neu Ne. 3 Amꞌonen on reꞌ naan ate, reko. Naan anharineb Uisneno reꞌ nsoi nafetin kit. 4 In nroim he areꞌ too mfaun ein ok-okeꞌ napenin aꞌhonis, ma nahinin mee ja es reꞌ amneot ma amnonot, esan reꞌ:
5 Uisneno meesꞌ aah.
Ma nmuꞌi haa nete ranan meesꞌ aah, reꞌ narameꞌ Uisneno nok mansian arkit, es reꞌ Yesus Kristus.
Naiꞌ Yesus naan, mansian batuur-batuur.
6 In nnonaꞌ In tuan ee he nsoi nafetin kit naꞌko hit saant ein ok-okeꞌ.
Nateef nok in oors ate, Uisneno nfei rais reko naan kninuꞌ-kninuꞌ neu areꞌ too mfaun ein. 7 Rarit Uisneno npiir naan kau ꞌjair In haef, he ꞌnao utoon tuaf reꞌ ka atoin Yahudis fa aꞌbi mee-mee, ma unoniꞌ sin he sin npirsain neu Usif Yesus ma nmonin natuin raan amneot ma amnonot. Saaꞌ-saaꞌ reꞌ au utoon sin reꞌ ia, batuur on naan. Au ka upoi fa, tua!✡ 2 Naiꞌ Timotius 1:11
8 Au ꞌroimk ii on nai: anbi mee-mee, karu hi mibua he mꞌonen ate, hi ro he mitaibaꞌ nekaf es nok es. Kais ammaktoꞌon. Kais ammatoe. Karu hi miꞌaitiꞌ hi ꞌnimam oras hi mꞌonen, hi neekm ein ro he kniunꞌ ein.
9-10 Bifee ngguin on naan amsaꞌ. Au ꞌroim he sin nꞌator sin tuak ein te, suuk nahuum, ma npaken amsaꞌ seor nahuum. Kaisaꞌ nbagaya he biak ein antarun mataf neu sin, aꞌnaak fuun ein reꞌ ansoiꞌ ma nbuiꞌ sin humaꞌ-humaꞌ, aiꞌ npaken tai maꞌosaꞌ reꞌ ka natuin fa atoran, aiꞌ natoon ok bainesiꞌ nok sin npaken moroꞌ-mutiꞌ ma mutiara sin. Reꞌ nmoeꞌ bifee ngguin namasan naan, es reꞌ neek akninuꞌ, ma sin aꞌmoeꞌk ein rekon. Reꞌ naan es reꞌ natai neu bifee ngguin he naꞌbesan neun Uisneno.✡ 1 Naiꞌ Petrus 3:3 11 Karu too srain ein nabuan ma nnenan noniꞌ te, bifee ngguin ntook nokan ma nneen nokan rek-reko anmatoom nok noinꞌ ein naan. Kais taꞌseꞌo ma taꞌroot. 12 Anbi au te, ka reko fa karu bifee ji nait in tuan ma naprenat atoniꞌ, ma nanoniꞌ sin. Reko nneis bifee ngguin sin neek ein natean ma kais mafeef ein bainesiꞌ. 13 Fin Uisneno nmoeꞌ naiꞌ Adam nahuun. Rarit, naꞌ bi Hawa.✡ Retaꞌ Ahun-hunut 2:7, 2:21-22 14 Ma ka naiꞌ Adam fa es antoup uab poi nahuun naꞌko niut reuꞌf ein sin aꞌnakat, mes bifee. Anmurai oras naan, mansian ii ntanhai Uisneno In atoran.✡ Retaꞌ Ahun-hunut 3:1-6 15 Maski on naan amsaꞌ, mes bifee ngguin napenin aꞌhonis, natuin sin nahoin ein. Asar sin npirsain batuur-batuur neu Kristus, anmonin nbin rais manekat, anmuꞌin neek akninuꞌ, ma sin aꞌmoink ein pantas ma kais anbainesin.* Atoin ahiint ein anmatoom nok Uisneno In Suur Akninuꞌ nak, “bifee ngguin napenin aꞌhonis, natuin sin nahoin ein” in aꞌmoufn ii esan reꞌ: 1) Anmuiꞌ naan riꞌaan es, es reꞌ Naiꞌ Yesus, reꞌ anfei ranan he areꞌ too mfaun ein napenin aꞌhonis; 2) bi Hawa reꞌ napein rais poi ma nmoꞌe nsaan, mes in es anjair beiꞌ-kaꞌo neu mansian pah-pinan amsaꞌ; 3) bifee reꞌ anmoin nok atoran ka nmaet fa oras nahoniꞌ (mes aꞌmoufuf reꞌ ia ka maꞌtaniꞌ fa).
✡2:13 Retaꞌ Ahun-hunut 2:7, 2:21-22
*2:15 Atoin ahiint ein anmatoom nok Uisneno In Suur Akninuꞌ nak, “bifee ngguin napenin aꞌhonis, natuin sin nahoin ein” in aꞌmoufn ii esan reꞌ: 1) Anmuiꞌ naan riꞌaan es, es reꞌ Naiꞌ Yesus, reꞌ anfei ranan he areꞌ too mfaun ein napenin aꞌhonis; 2) bi Hawa reꞌ napein rais poi ma nmoꞌe nsaan, mes in es anjair beiꞌ-kaꞌo neu mansian pah-pinan amsaꞌ; 3) bifee reꞌ anmoin nok atoran ka nmaet fa oras nahoniꞌ (mes aꞌmoufuf reꞌ ia ka maꞌtaniꞌ fa).