1 Ii Apuringkia juuntaitai.

Ni yaktarin pujuinautikia tura ni murarin nekas pengker aa nuni kaunkarutikia ii Yusri:

Ameketme juuntam titinuitji.

2 Yakta pajenini mura Sión tutai timiá pengkeraitai.

Apu nekas kakaram aa nuna yaktari asamtai,

mash nungka ainau warartutintai.

3 Yuska yakat Jerusalénnumia ainau matsamtainum pujawai.

Turasha wikia atumin ejaktinuitjarme tusa,

ni aintsri ainautin nekamtikramamiaji.

4 Apu ainau Jerusalén yumpungtai tusar kaunkarmiayi.

5 Antsu nu yaktanka wainkar shaminak tupikiakiarmiayi.

6 Tura sapijminak kurainiarmiayi.

Nuniasha nuwa uchin jateemawa nunisarang najaimin armiayi.

7 Yus tsaa taakmanumanini nasen kakarman akupak,

yakat Tarsisnumia juun kanu ainaun kupiawa nunisang nu apu ainaunka kiishmakmiayi.

8 Ii yaanchuik antukmiaji nunaka miatrusang umiku wainkamiaji:

Yuska timiá kakaram asa,

ni yaktarin Jerusalénnum pujuinaunka tuke inaitsuk wainkatnuitai.

9 Yusru ami jeemin wayaarkia,

aminu anengkratairum tuke nintimu weaji.

10 Yusru ame timiá juun asakmin,

mash nungkanmaya ainau amin naarmin pachisar:

Ameketme juuntam turaminawai.

Ame timiá kakaram asam,

aints ainausha tuke inawaitme.

11 Mura Sión tutainum pujuinauka warasarti.

Tura ame aints ainaun pengker inau asakmin,

Judá yaktarin pujuinauka nukap warasarti.

12-14 Ii Yusringkia tuke pujawai.

Ningki iinka jintintramak pujustinuitai.

Sión mura tentakrum jea jeamkamuri ainau tura kayajai wenurmaurisha jiisrum,

ukunam akiinawartin ainauka nekaawarti tusaram etserkatnuitrume.✡ Heb 12.22-23