1 Yusketai iin ejarmaktinka.

Tura iin kakamtikramratnuka nuketai.

Ii shamakur pujakrincha,

iin yainmaktinka nuketai.

2 Tura asamtai nungka yumpunmataisha,

tura mura ainau juun entsa kunarin ujungmau amataisha shamkashtinuitji.

3 Tura juun entsa tampari timiá wej wajamtaisha,

tura mura ainau Yuse kakarmarijai muchitinamtaisha shamkashtinuitji.

4 Kichik entsa ni kanaichirijai Yus ni yaktarin pujuinaun waramtikui.

Nu yaktaka chikich yakat ainaun nangkamasang nekas Yuse yaktarintai.

5 Yuska nu yakta japen pujau asa,

chikich aints ainaun yumpungkai tusa wainui.

Kintajai metek tsawaaramtai,

Yuska ni aintsri ainaun yayaawai.✡ Ap 22.1-2

6 Yus chichaamtai,

chikich nungkanmaya ainauka nuna antukar shiniinawai.

Tura apu ainausha kurainawai.

Tura nungkaka ningki yumpuunui.

7 Yus timiá kakaram aa nuka iijai pujawai.

Jacobo Yusringkia iin ejarmaktinuitji.

8 Yus wainchati takatan mash nungkanam turamia nuka jiitaram.

9 Mash nungka ainamunam meset inaisataram tusa surimrukmiayi.

Tura asa tishimuk ainaun kupikmiayi.

Tura nangki ainauncha charukmiayi.

Nuniasha mesetnum wekaatai ainauncha keemakmiayi.

10 Nintimrataram.

Turasha juuwaitai Yus tusaram nekarataram.

Yus chichaak:

Wikia mash nungkanmaya ainaun inawaitjai tawai.

11 Yus timiá kakaram aa nuka iijai pujawai.

Jacobo Yusringkia iin ejarmaktinuitji.