1 Naꞌh Pahblu, naan tuhbi pooxtla xteenn Jesucristu; Dxiohs gulii naꞌh pur guelnabahan nin biaꞌhan Ñiꞌh gudiꞌhi Ñiꞌh laꞌh raꞌ bwiinn nin naa tuhsi cun Jesucristu. 2 Rucaꞌhn dxitsi riiꞌ loh luꞌh, Timoteu, lliiꞌnahn loh guelriachiistoꞌ nuꞌh xchiꞌdxyi Dxiohs. Rnaꞌbazahn loh Xtaada Dxiohs nuꞌh cun loh Daada Jesucristu gacanee Ñiꞌh yiꞌh, galahsastoꞌ Ñiꞌh yiꞌh, nee gusacwachidxyii za Ñiꞌh stoꞌ luꞌh.

3 Chin riagannastoꞌn yiꞌh chin rbwiidxyi-rnaꞌbaꞌhn loh Dxiohs, dxyih-nagueꞌla rudiꞌhihn guelzuxchiilli loh Dxiohs, nin cayuꞌnnahn xtsiꞌn Ñiꞌh gaduhbi xigaaba nayaaꞌhahn nin nuuꞌhuhn loh Ñiꞌh, ziga gahca nin bwiꞌhnn raꞌ guehtu xtatita raꞌn. 4 Riagannastoꞌn gaduhbi hohra xcweenta ñihsabwii loh luꞌh, yannah xclaaꞌdzihn gwaꞌhan loh luꞌh tin dxiagadxah laꞌn lastoꞌn guelriahxi pur xcweenta luꞌh, 5 laasii riagannastoꞌn guelriachiistoꞌ zaꞌca nin nahpa luꞌh; laꞌhgahca zan nin galoh gohpa raꞌ xnanihta Loida luꞌh laꞌn lastoꞌ raꞌ ba cun xmah Eunice luꞌh. Niꞌchin nin naꞌpahn siguhra neezaa luꞌh nuu guelriachiistoꞌ chi laꞌn lastoꞌ luꞌh nnah.

6 Pwihsi niꞌchin nin rñiꞌn loh luꞌh nnah, gaca nasiin luꞌh loh guelrahcabwaꞌ nin baniꞌhi Dxiohs yiꞌh chin badziiꞌbanaaꞌhahn yihca luꞌh, 7 pwihsi Dxiohs ayi baniꞌhi Ñiꞌh tuhbi Spíritu nin nadxyiꞌbi laꞌh nuꞌh, sino que tuhbi Spíritu nin nahpa guelrnabwaꞌ, nin rudiꞌhi guelnadziiꞌhi lasaaꞌ, cun nin rudiꞌhi ziga xa riahcazaꞌca loh xquelrihn bwiinn, 8 pwihsi ayi gatuhyi loh luꞌh guiñiꞌ luꞌh xchiꞌdxyi Daada Jesucristu, nee nin ayi za gatuhyi loh luꞌh pur naꞌh, pur nin nuu ñieꞌwꞌhn xcweenta Jesucristu; mas chaꞌyi guyuuꞌnee laꞌh nu loh guelrzaꞌcazii nin rahca para laꞌh raꞌ nin ruuꞌyidxyiꞌdxyi xchiꞌdxyi Dxiohs tin ziꞌchi gacanee Dxiohs yiꞌh, 9 laasii Dxiohs nin bataꞌh laꞌh nuꞌh loh duhlda, gudihdxyi Ñiꞌh laꞌh nuꞌh tin guibahan nayaa nuꞌh loh si Ñiꞌh. Gudihdxyi Ñiꞌh laꞌh nuꞌh ayi pur nin bidiꞌhnn dxiꞌh nuꞌh dziꞌn zaꞌca, sino que laasii ziꞌchi bwiꞌhnn Ñiꞌh lligaaba gaca nee neezaa pur nin balahsastoꞌ Ñiꞌh laꞌh nuꞌh pur Jesucristu galohyi chin nagahdxi guunn chaꞌyi Ñiꞌh guidxyiyuh. 10 Per chin biꞌ Jesucristu tin basiaꞌpitii Ñiꞌh xtuhlda raꞌ nuꞌh loh guidxyiyuh riiꞌ, baluuꞌyiloh balaaca chiꞌh nin ralahsastoꞌ Dxiohs laꞌh raꞌ nuꞌh. Ya bañichiloh Jesucristu guelrnabwaꞌ xteenn guelguhchi, ya xchiꞌdxyi Ñiꞌh nin ruluuꞌyi xa riapitii duhlda baluuꞌyi guelnabahan, nee cun guelnabahan nin banaa para tuꞌpazi.

11 Dxiohs gulii naꞌh tin gacaꞌhn tuhbi nin ruluuꞌyi xchiꞌdxyi Ñiꞌh riiꞌ, nee guxeꞌhla za Ñiꞌh naꞌh tin gacaꞌhn tuhbi xpooxtla Ñiꞌh cun tuhbi xmwehsu Ñiꞌh tin guluꞌyiꞌhn xchiꞌdxyi Ñiꞌh laꞌh raꞌ bwiinn raꞌ nin ayi naa raꞌ bwiinn Israel. 12 Niꞌchin nin cagatiꞌdxiloon guelrzaꞌcazii pur garaa raꞌ dxyiꞌdxyi raꞌ riiꞌ, per ayi ratuhyi loon laasii laꞌn naann chyu xchiꞌdxyi gwachiistoꞌn, nee naannzahn laꞌh Ñiꞌh zahca gapadziꞌtsi Ñiꞌh dziꞌn nin baniꞌhi Ñiꞌh guꞌnnahn cun para hasta laꞌn dxyihyi nin dxiꞌ Ñiꞌh stuhbi.

13 Gwazahnee guluuꞌyi luꞌh dxyiꞌdxyi zaꞌca nin baluꞌyiꞌhn yiꞌh, nee gwazahnee chechiistoꞌ luꞌh xchiꞌdxyi Dxiohs cun neezaa gantsiiꞌhi luꞌh lasaaꞌ raꞌ nuꞌh nin naa nuꞌh tuhsi loh xneziuh Jesucristu, 14 nee cun gwazahnee dziꞌtsi guelrahcabwaꞌ nin baniꞌhi Dxiohs yiꞌh pur Spíritu Saantu xteenn Ñiꞌh nin naanabahan laꞌn lastoꞌ nuꞌh.

15 Pwihsi ya naann luꞌh garaa raꞌ bwiinn Asia raꞌ guleꞌhestoꞌ raꞌ ba naꞌh; loh raꞌ deeꞌ nuudxaꞌga Figelu cun Hermógenes, 16 nee laꞌh Daada Jesucristu gacanee laꞌh garaa bwiinn lasaaꞌ Onesíforu laasii laꞌh bi riiꞌ, ziahan la bieꞌnee bi tuhbi guelnasiꞌsi lastoꞌn, ayi batuhyi loh bi pur nin nuuꞌhuhn lahtsidxiꞌba, 17 laasii chin badzihn bi loh guihdxyi Roma, badxiꞌhyi bi naꞌh tin badxeela bi naꞌh, 18 nee laꞌh Daada Jesucristu galahsastoꞌ laꞌh bi chi gadzihn dxyih nin guibiaꞌgarii Ñiꞌh, nee yiꞌh banaann luꞌh balaaca chiꞌh guhcanee bi laꞌh nuꞌh chin bidxuu nuꞌh guihdxyi Efesu.