1 Me gar’ar Naomi ngak Ruth, “Fakag, thingar gu gay be’ ngam figirngiy, nge yag reb e tabinaw ngom. 2 Mu tay ngan’um ni Boaz, ni um maruwelgad e tapigpig rok, e reb e girdi’ rodow. Mu telim ngog; nep’ ney e bayi gunugunuy e barley. 3 Ere mmaluk, ma ga florida, ma ga chuw ko bin th’abi fel’ e mad rom; ma ga yan ko gin yibe gunugunuy e barley riy, machane ngam guy rogon ndabi nangem ni ga bay u rom nge yan i mada’ ko ngiyal’ nike mu’ ko abich ma ke garbod. 4 Mu guy rogon ngam nang e gin nge pag ir riy nga but’, ma nap’an ni bayi mol; ma ga yan mu chuweg e gulgul u daken e rifrif u ay, ma ga mol nga but’ u rom. Ya bayi yog ngom e n’en ni ngam rin’.” 5 Me fulweg Ruth ni ga’ar, “Bay gu rin urngin e tin kamog.”

6 Ma aram me yan Ruth ko gin yibe gunugunuy e barley riy, me rin’ urngin e ti keyog e chitiningin figirngin ngak. 7 Fa’ani mu’ Boaz ko abich nge garbod, me par nike fel’ laniyan’. Me yan i pag ir nga but’ u to’oben fare ulung i barley nge mol. Me saf’og Ruth i yan nike n’ag lingan, nge yan i chuweg e gulgul u daken e rifrif u ay Boaz me pag ir nga but’. 8 Me yan i lukngun e nep’ me yan i od Boaz ni nge pig me gin ngak fare pin nike pag ir nga but’ u to’oben e rifrif rok! 9 Me ga’ar ngak, “Gur mini’?” Me ga’ar Ruth, “I gag Ruth, ni tapigpig rom. I gur reb e girdi’ rog ni ga ba chugur, ni yalen ni ngam ayuwegneg, siro’ ngom mu fekeg nggu mang le’engim.” 10 Me fulweg Boaz ni ga’ar, “Fakag, mang e yigi fal’eg SOMOL wa’atham. Ka mu dag feni ga’ e yul’yul’ rom ko tabnaw ko n’en ni ka mu rin’ e chiney ko tin ku’um rin’ ngak e chitiningin figirngim. Go nap’an e ngam changarnag be’ ni kab pagel, fa be’ ni bfel’ rogon ara ba gafgow, machane dam rin’ ni aram rogon. 11 Fakag, dab mu tamdag; ya urngin e girdi’ u roy u lan binaw ni yad manang ni gur reb e bpin ni gab manigil. Bay gu rin’ urngin e tin kam wenignag ngog. 12 Rriyul’, ni gag e reb e girdi’ rom ni gub chugur ngom, nri yalen ni nggu ayuwegnem; machane ka ba’ reb e pumo’on ni kab m’on rog. 13 Mu par u roy e nep’ ney, ma bayi kadbul ma gadow guy rogon ngad nangew ko ba’adag e re mo’on nem ni ir e nge ayuwegnem fa dangay, fa’anra ba’adag me ere bfel’; ma ra dabi rin’ me ere gu be yog u p’eowchen SOMOL ni be par nib fos ni bayi mang gag e gu ayuwegnem. Ere mu thig nga but’ ngam par nge kadbul.” 14 Ma aram me mol u to’oben rifrifen ay, machane me od ni kabay e lumor nge dab ni guy; ya Boaz e dabun ni nge nang be’ ni immoy Ruth u rom.

15 Me ga’ar Boaz ngak, “Mu fek e re mad ni be’er ni kamon’ nga daken e mad rom ngam filath nga but’!” Me rin’ ni bod rogon nike yog, me pu’og Boaz gonap’an wugem e pawn e barley ngalan, me ayuweg Ruth ngar chibiyew ngalang ngar tew nga daken pon Ruth; ma aram me sul Ruth ngalan binaw nike fek. 16 Me sul ngak fare pin ni chitiningin fa’anem ni i figirngiy, me ga’ar fare pin ngak, “Fakag, mang e mrin’ew?” Me weliy Ruth ngak urngin e tin ke rin’ Boaz ni fan ngak. 17 Me ga’ar Ruth, “Ma ku er rogon e pi barley ney ni ir e pi’ ngog, ya ga’ar ngog e dab gu sul ngom ndab gu tel pa’ag nga ban’en.” 18 Me ga’ar Naomi ngak, “Fakag, mu gumaen’ nigem nge mada’ ko ngiyal’ nike tamilang urngin ban’en; ya Boaz e gathi bayi toffan e daba’ nge yan i mada’ ko ngiyal’ nike mu’ i muruwliy rok e pi thin ney.”