1 Miki dag fare engel ngog fare lul’ ni bay e ran ko yafos riy, ni be galgal ram’en ni bod e krystal, ni yib u tagil’ Got nge fare Fak e Saf, 2 nge yan u lulukngun e kanawo’ ko fare binaw. Ma ra baraba’ fare lul’ ma bay e gek’iy ko yafos riy, ni ragag nge l’agruw yay nma k’uf u reb e duw, nra reb e pul ma ta’ab yay; ma yuwan e ma chuweg e liliy rok e pi nam. 3 Dariy ban’en nike kirebnag Got wa’athan ni yira pir’eg u lan e re binaw nem.

Ma tagil’ Got nge fare Fak e Saf e bay i par u lan fare binaw, ma bay i liyor e pi tapigpig rok ngak. 4 Ma bay ur guyed owchen, ma bay ni yoloy fithingan nga peri’rad. 5 Ma dakuriy e neap’, ma bayi par ndakuriy fan e magal ngorad ara ra’en e yal’, ni bochan e Somol ni Got e bayi mang tamilang ngorad, ma aram e bay ra pired ni kar manged pilung ngu’ur gagiyeggad ndariy n’umngin nap’an.

6 Ma aram me ga’ar fare engel ngog, “Pi thin ney e ba riyul’ mrayag ni ngan pagan’uy ngay. I Somol ni Got ni pi’ fare Kan Nthothup ngak e pi profet e l’oeg e engel rok ni nge dag ngak e pi tapigpig rok e n’en nthingari m’ug ndab ki n’uw nap’an.”

7 Me ga’ar Jesus, “Mu telim! Dabki n’uw nap’an mu gub! Ma pi’in yad be fol ko pi thin ney, ni bay u lan e re ke babyor ney, ni be yog e tin ni bay ngam’on ni bay fini m’ug e yad ra felan’!”

8 I gag John e kug rung’ag ma kug guy e pin’ey ni gubin. Ma fa’an gu mu’ i rung’ag mu gu mu’ i guy e pin’ey mu gu paraw nga but u to’oben rifrifen ay fare engel ni fa’ani ir e ke dag e pin’ey ngog ni nggu siro’ ngak. 9 Machane me ga’ar ngog, “Dab mu rin’! Ya gadow l’agruw ma tapigpig, ma ta’reb rogog ngak pi walagem ni aram fapi profet, nge urngin e pi’in yad be fol ko thin ni bay u lan e re ke babyor ney! Ere mu siro’ ma ga meybil ngak Got!” 10 Ma aram me ga’ar ngog, “Pi thin ney ni bay u lan e re ke babyor ney ni nge yog e tin ni kabay ngam’on ni bayi m’ug e dab um tay nib mith, ya re ngiyal’ i n’en ni bayi taw ngay me m’ug e pin’ey ni gubin, e ke chugur. 11 En nib kireb e aram e thingari i par ni yigo’o tin nib kireb e be rin’, ma en nib alit e aram e thingari i par nib alit; ma en ni bfel’ e aram e thingari i par ni yigo’o tin ni bfel’ e be rin’, ma en nib thothup e aram e thingari i par nib thothup.”

12 Be ga’ar Jesus, “Mu telim! Dabki n’uw nap’an mu gub! Ma bay gu fek puluwon e girdi’ i yib nra be’ ma bay gu pi’ puluwon ni be yan u rogon e n’en ni i rin’. 13 I gag fare Alfa nge fare Omega, ni en nsom’on nge en ntomur, ni aram e tabolngin nge tungun.”

14 Nge felan’ e pi’in ni kar lukniged e mad rorad ke be’ech, ya bay mat’awrad ni ngar ked wom’ngin fare ke gek’iy ko yafos, miyad yan u langan fapi garog ngalan fare binaw. 15 Machane pi’in ni bay ra pired u wuru’ e re binaw nem e pi’in yad ma puwlag nge pi’in yad ma pig, nge pi’in yad ma ngongliy e ngongol ko darngal, nge pi’in ni kar thanged e pogofan ko girdi’, nge pi’in yad be tayfan ma yad be meybil ngak e liyos nma meybil boch e girdi’ ngay, nge pi’in yad be lifith l’ugunrad ko thin ni yad be yog nge ngongol ni yad be rin’.

16 “I gag Jesus e kug l’oeg e engel rog ke yib ni nge weliy e pin’ey ngomed e pi’in ni gimed girdi’en e pi galesiya. I gag fa’anem ni owchen e tabinaw rok David; mi gag fare fasuran ni ba ga’ ram’en.”

17 Fare Kan Nthothup nge fare pin ni nge mabgol e lungurow, “Moy!” Urngin e girdi’ ni yad ra rung’ag e re bugithin ney e thingar ki lungurad, “Moy!”

Moy i gur e en nike yib e belel ngom; ngam fek fare ran ko yafos nib tow’ath ni yira pi’ ngak e en ni ba’adag ni nge yag ngak.

18 I gag John e gu be ning chiylen ngak urngin e girdi’ ni yad ra rung’ag e pi thin ney u lan e re ke babyor ney ni be yog e tin ni kabay ngam’on ni bayi m’ug: fa’anra puthuy be’ ban’en ko pi thin ney, ma ra puthuy Got ko gechig rok fa’anem e pi gafgow ni kan weliy murung’agen u lan e re ke babyor ney.” 19 Ma fa’anra chuweg be’ ban’en ko fapi thin ni be weliy e re ke babyor ney ni tin ni bay fini m’ug ban’en, ma ra chuweg Got rok e birok’ e f’oth u wom’ngin fare ke gek’iy ko yafos, nge f’oth rok ko fare Binaw nib Thothup ni fa’ani kan weliy murung’agen u lan e re ke babyor ney.”

20 En ni ir e ke weliy e pin’ey ni urngin e ke ga’ar, “Riyul’! Dabki n’uw nap’an mu gub!”

Nge par riy ni bod ni kamog. Moy, Somol Jesus!

21 Ngi i ayuwegmed Somol Jesus ni gimed gubin.