1 “Mu yol ngak fa engel ko galesiya nu Sardis ni nge lungum:

“Ba’aray e thin nike pi’ fa’anem ni bay fa medlip i kan ku Got rok nge fa medlip i t’uf. Gu manang e n’en ni ga be rin’; gu manang ni be yog e girdi’ ni gab fos, machane ga be par ni gab yam’! 2 Ere mu od ngam gelnag e n’en ni kabay rom ni be dongongoy ya ri yim’. Ya kug pir’eg ni tin kam rin’ e dawori yal’uw u p’eowchen e Got rog. 3 Mu tafinaynag e n’en nni fil ngom nge rogon ni mu rung’ag; ere mu fol riy ma ga pi’ keruum ko denen ni ga be rin’. Ya fa’anra dab mu od ma bay gub ngom ni bod be’ nib moro’ro’, ya dab mu nang e re awa ni gu ra taw riy. 4 Machane ri gimed in u wur u lan yu Sardis e dawor mu alit niged e mad romed. Bay um uned ngog ni kamon’ed e mad nib wechwech, ya bay rogomed ni ngam rin’ed ni aram rogon. 5 Pi’in yad ra gel ndar paged yad ko kireb e yira yin’ e mad nib wechwech nga dakenrad ni aray rogon, ma dab gu chuweg fithingrad u lan babyoren e pi’in kar fosgad. Ma bay gog u p’eowchen e Chitamag nge pi engel rok ni yad e girdi’ rog.

6 “Fa’anra bay telim me ere mmotoyil ko n’en ni be yog fare Kan Nthothup ngak e pi galesiya!”

7 “Mu yol ngak fare engel ko galesiya nu Filadelfia ni nge lungum:

“Ireray e thin nike pi’ fa’anem ni ir e ba thothup ma ba yul’yul’, ni ir e bay fare kiy rok David u pa’, ni ir e ra bing ma dariy be’ nrayag ni nge ning, ni ir e ra ning ma dariy be’ nrayag ni nge bing. 8 Gu manang e n’en ga be rin’; gu manang ni ba’achig gelngim; kamfol ko tin kug fil ko girdi’ ma ga be par ni gab yul’yul’ ngog. Kug bing e mab ngom ndariy be’ nrayag ni nge ning. 9 Mmotoyil! Fare ulung i girdi’ nib mil farad ku Satan, ni fapi cha’ ni yad be lifith l’ugunrad ma yad be yog ni yad piyu Israel machane gathi aram rogon e bay gu gagiyeg nagrad ngarbad ra parawgad nga but’ ngar siro’gad ko rifrif u em. Ma yad gubin ni bay ra nanged ni gab t’uf rog. 10 Ya kam fol ko thin ni gog ni ngam par ni gab gumaen’, ere bay gu tem ni dabi buch ban’en rom ko re ngiyal’ i n’en ni ba’aram ni bay yib e gafgow riy nga daken e fayleng ni polo’, ni nge sikengnag urngin e girdi’ nu fayleng. 11 Dabi n’uw nap’an mu gub. Mu ayuweg e n’en ni bay rom, nge dabi fek be’ puluwom ko gel ni kam tay. 12 En nra gel nde pag ir ko kireb e ra gu tay ni ir reb e duga’ u lan e Tempel rok e Got rog, ma dabki chuw riy bi’id. Ma bay gu yoloy fithingan e Got rog nga daken, nge fithingan fare binaw rok e Got rog, ni fa bin nib be’ech e Jerusalem ni bay yib rok e Got rog u tharmiy nga but’. Ma bay ku gu yoloy fithingag nib be’ech nga daken.

13 “Fa’anra bay telim me ere mmotoyil ko n’en ni be yog fare Kan Nthothup ngak e pi galesiya!”

14 “Mu yol ngak fare engel ko galesiya nu Laodicea ni nge lungum:

“Ba’aray e thin nike pi’ fa’anem ni ir fare Amen, ni ir e mich nib yul’yul’ ma ba riyul’ ko tin ni be weliy ni murung’agen Got, ni ir e tabolngin urngin ban’en ni sunumeg Got. 15 Gu manang e n’en kam rin’; gu manang nda mu garbeb ma da mu gowel. Gu be athpeg ni manga yugu mmang reb e gali n’ey! 16 Machane bochan e gab mathilin ni gathi ri gab gowel, ma ku da mu garbeb, ma aram e gu be n’en ni nggu thuwegem ngam chuw u lan l’ugunag! 17 Ya ke lungum u lanin’um, “Ke yo’or ban’en rog nike fel’ rogog, ya urngin e tin nge yag ngog e ke yag ngog.” Machane da mu nang gelngin e gafgow ni kam tay nge rogon yaam ni kari mu gafgow! Ya kam gafgow, ma dakuriy e mad u dakenam, ma kam malmit. 18 Gu be fonow nigem ni ngam chuw’iy rog e gol, ni gol ni de ma’athuk ban’en ngay, ni bochan e nge yag ni fel’ rogom. Ma ka ga chuw’iy e mad nib wechwech ngam chuw ngay ngam upunguyem ngay ni kam par u tamilang nib tamra’ u sum. Ma ka ga chuw’iy boch e flay ngam tay ngalan owchem nge yag ni mu guy ban’en. 19 Gu ma puwan’ ma gu ma gechignag urngin e pi’in yad ba t’uf rog. Ere mu tiyan’um ngam pi’ keruum ko denen ni ga be rin’. 20 Mmotoyil! Kug sak’iy nga langan e mab gu be tugtuguy; ma fa’anra rung’ag be’ lungug me bing e mab, mra gub ngalan e naun rok nggu un ngak ko abich, me un ngog ko abich. 21 Pi’in yad ra gel ndar paged yad ko kireb e gu ra pi’ mat’awrad ni ngar pired nga but’ u to’obeg u tagil’ig, ni bod rogon ni kug gel ngak e kireb, me ere chiney e kug par nga but’ u to’oben e Chitamag u tagil’.

22 “Fa’anra bay telim me ere mmotoyil ko n’en ni be yog fare Kan Nthothup ngak e pi galesiya!”