143
Ba meybil ni fan ko Ayuw
1 SOMOL, mmotoyil ko meybil rog!
Mmotoyil ko wenig rog ni bochan e gab mat’aw;
mu fulweg lungug u fithik’ e yul’yul’ rom!
2 I gag e tapigpig rom, dab mu pufthin nigeg;
dariy be’ nib machalbog u p’eowchem.
3 Pi to’ogor rog e yad be tulfeg;
kar parsiyedgag nga fithik’ e but’.
Kug par u fithik’ e rumug,
ni bod be’ ni kem’ kakrom.
4 Ke chuwan’ug ko gubin;
kari math e liyab ngog.
5 Be yib ngan’ug fapi rran nike thumur;
Gu be leamnag murung’agen gubin e tin kam rin’,
gu be pugoran ngan’ug gubin e ngongol rom.
6 Gu be meybil ngom ni kug tining pa’ag ngalang;
lanin’ug e ke balel ni be fineyem ni bod e but’ nike mlik’.
7 SOMOL, mu non ngog e chiney!
Ka ri mulan’ug.
Dab mmithagem rog,
ya rug un u fithik’ e pi’in nge yan nga’ar ko fayleng ko yam’.
8 Mu tay ngan’ug ni gubin e kakadbul e t’ufeg rom ni dabimus,
ya kug tay e pagan’ rog ngom.
Meybil rog e be yib ngom ngalang;
mu dag ngog e kanawo’ ni nggu wan riy.
9 SOMOL, gu be yib ngom ni ngam yororiyeg;
mu ayuwegneg u pa’ e pi to’ogor rog.
10 I gur e Got rog;
mu fil ngog rogon ni nggu rin’ e tin nib m’agan’um ngay.
Mu gol ngog, ma ga pow’iyeg ko kanawo’ nib pach.
11 SOMOL, mu ayuweg e pogofan rog, ni bod ni kam micheg;
fanam ma’taw e ngam ayuwegneg ngay ko pi oloboch rog!
12 Mu thang e pogofan rok e pi to’ogor rog ni bochan e gub t’uf rom,
mag thang owchen urngin e pi’in yad ma gafgow nigeg,
ya gag e tapigpig rom.
DRAFT VERSION — Proofreading in progress