KAEN DALIP E BABYOR
73
(Psalms 73—89)
Feni mat’aw Got
1 I Got e riyul’ nib gol ngak yu Israel,
ni pi’in ni machalbog gumircha’rad!
2 Machane i chugur ni nge dabki pagan’ug;
ma mich rog e chugur ni nge mul,
3 ni bochan e awan’ug ngak e pi’in yad ba tolngan’
nap’an ni gguy ni pi’in kireb e bo’or ban’en rorad.
4 Darir gafgowgad ko amith;
bfel’ rogorad ndariy e m’ar rorad.
5 Darir gafgowgad ni bod boch e girdi’;
darir mada’ niged e oloboch ni bod boch e girdi’.
6 Ere kar nunuwgad ko ufanthin ni bod ba kiy i churuwo’,
ma farad yargal e ke mang mad ngorad;
7 gumircha’rad e be thang’el e kireb riy nga but’,
ma leam rorad e ke suguy e kireb nike m’ay i t’ar liyben rorad.
8 Yad be moningnag boch e girdi’ ma yad be weliy e tin kireb;
yad ba tolngan’ ma yad be puruy’nag rogon ni ngar gafgow niged boch e girdi’.
9 Yad be yog murung’agen Got nu tharmiy nga dalib,
ma yad be yog u fithik’ e ufanthin e tin ni nge rin’ e girdi’ nu fayleng,
10 ya mus ngak e pi girdi’en Got ni kar chalgad ngorad
kari mich u wun’rad urngin e tin yad be yog.
11 Be lungurad, “Dabi nang Got,
en ni Th’abi Tolang e dabi nang!”
12 Irera’ rogon e pi’in yad ba kireb!
Pire’ ban’en rorad ma gubin ngiyal’ ni be mun daken!
13 Gur mm’ay fan ni kug teg ni gub machalbog,
ma dagur ngongliy ba denen?
14 A Got, kam teg gu be gafgow ni kakadbul nge mada’ ko nep’;
gubin e kadbul ni ga ma gechig nigeg!
15 Fa’an mang e gog e tinir e thin,
ma dab gu ngongol ni bod reb e girdi’ rom.
16 Ere kar gu athamgiliy ni nggu nangfan e ren’ey,
ma kaygi mo’maw’ ngog,
17 nge taw ko ngiyal’ ni gu wan ngalan e Tempel rom.
Ma aram mu gu nangfan e tin bayi buch rok e pi’in kireb.
18 Rib mudugil ni kam tayrad ko yungi n’en nib tamasirgig,
ma bay mu gagiyeg nagrad ngar mulgad nga fithik’ e riya’!
19 Nthang owcherad u lan ta’ab talab;
wenegan ni yib ngorad ko tomur e gafgow nib gel!
20 A Somol, yad bod ba lik’ay ni kadbul ma dariy;
yira od ma ka ni pag talin.
21 Nap’an nra mo’oy e leam rog,
me maad’ad e tafnay rog,
22 ngiyal’nem e ug par ni gub manan’ ni bod ba gamanman;
da ug nangfan e tin ni um rin’.
23 Ni yug aram rogon ni ug par nigub chugur ngom,
ni ga be kol pa’ag.
24 Ga be pow’iyeg ko fonow ni ga be tay ngog,
ma tomur e bay mu fekeg nga fithik’ e fla’ab ni aram e ka mu tolang nigeg.
25 Ku ba mang ban’en ni bay rog u tharmiy ya kemus ni gur?
Fa’anra ga bay rog, ma mang e ren’en ni ku gu ra adag u fayleng?
26 Lanin’ug nge dowag e ra me’waer i yan,
machane Got e ir gelngig;
kari mus ni ir e nge yag ngog!
27 Pi’in kar n’iged gur e rib mudugil ni bay ra m’ad,
ma bay mu thang owchen e pi’in ndarir yul’yul’gad ngom.
28 Machane gag e kari felan’ug, ya gu be par u to’oben Got!
U charen SOMOL Nib Th’abi Tolang e kug par riy ndabi buch ban’en rog,
ma bay ug weliy urngin e tin ke rin’ ngan nang.
DRAFT VERSION — Proofreading in progress