71
Ba meybil rok be’ nib pumo’on nike pilibthir
1 SOMOL, kugub ngom ni ngam yoror rog;
dab mu pageg bingyal’ nggu waer’!
2 Bochan ni gab mat’aw, ere mu ayuwegneg nga mu lageg ko riya’.
Mmotoyil ngog, ngam ayuwegneg!
3 Gur e ngam mang manaf rog nib gel
nge ba yoror nib gel nma yororiyeg;
gur e war rog ma gur e ga ma n’ufegeg.
4 Got rog, mu lageg u pa’ e pi’in kireb,
ngu pa’ e pi’in darir runguyed e girdi’ nge pi’in kireb e leam rorad.
5 SOMOL nib Th’abi Tolang, i gur e ke l’agan’ug ngom;
ke pagan’ug ngom ni ka nap’an ni kugub bitir.
6 Kug gif ngom u n’umngin e yafos rog;
ka nap’an e nni gargelegeg ni gur e um yoror rog.
Bay gu pining e sorok ngom ni gubin ngiyal’.
7 Yafos rog e ke mang ba machib ko yo’or,
bochan ni gur e rungrung ngog nib gel.
8 Ga’ngin e rran ni gu be pining e sorok ngom,
ma gu be weliy feni sorom.
9 Dab mu pi’ keru’um ngog e chiney ni kug pilibthir;
dab mu n’ageg e chiney ni kug me’waer.
10 Pi to’ogor rog e yad ba’adag ni ngar li’edgag ngum’;
ma yad be non ma yad be makath nigeg.
11 Yad be ga’ar, “Ke n’ag Got e cha’nir;
are da leked ngad koled,
ya dariy be’ nra ayuweg.”
12 A Got, dab mu palog rog;
Got rog, mu gur nigem ngam aywegeg!
13 Mang e yigi waer min thang mit
e pi’in yad be cham ngog.
Mang e yigun tamra min ma’fannag
e pi’in yad be guy rogon ni ngar maad’adgad ngog.
14 Bay gu tay e pagan’ rog ngom ni gubin ngiyal’;
bayi yo’or yay ni ngu’ug pining e sorok ngom.
15 Bay gu weliy fal’ngim;
polo’ e rran ni bay u gog rogon ni ga ma mat’aw nigey,
ni yug aram rogon nde gaman e nangan’ rog riy.
16 Bay gu wan u gelngin SOMOL ni Got;
bay gu weliy fal’ngim, ni kemus ni gur.
17 Kugub bitir ma ga tabab i fonow nigeg,
ma ku gu be weliy feni manigil e ngongol rom.
18 A Got, chiney ni kug pilibthir ma ke mat lolgeg,
e dab mu n’igeg!
Mu par rog ko ngiyal’ ni gu be weliy gelngim nge fenam gel
ngak gubin e mfen ni bayib.
19 Got, fenam mat’aw e ke taw nga lanelang.
Gur e kam rin’ bogi maang’ang;
dariy be’ ni bod gur.
20 Gur e kam l’oeg e oloboch nge gafgow ke yib ngog,
machane bay mu fulweg gelngig ngog;
bay mu teg u orel ko low ko yam’.
21 Bay mu gagiyegnag nge gilbugwag boch ko kafram;
ma ga fal’eg lanin’ug bayay.
22 Ri bay gu pining e sorok ngom ko musik ni harp;
Got rog, bay gu pining e sorok nga fanam yul’yul’.
Talin e musik ni harp rog e bay gu chubeg ni fan ngom,
I gur e En Thothup nu Israel.
23 Bay gu tolulnag e felfelan’ ko ngiyal ni gu be musik nigem;
bay gu tang u polo i lanin’ug
ni bochan e ka mu ayuweg e pogofan rog!
24 Bay ug weliy fanam yul’yul’ ni polo’ e rran,
ni bochan e pi’in ur guyed rogon ni ngar maad’adgad ngog
e ka ra mo’waergad nike ma’farad.
DRAFT VERSION — Proofreading in progress