44
Ba meybil ni fan ko Ayuw
1 A Got, ku gu rung’aged nga telmad,
pi chitamangimad kakrom e kar weliyed ngomad murung’agen,
feni sorom ko pin’en ni um rin’ u nap’rad,
ko fapi rran ni kakrom:
2 rogon ni go’ gur ma ga tuluf fa pi girdi’ ni dar nanged Got nga wuru e nam rorad,
ma ga tay e tirom e girdi’ nga taferad ngar suwyed;
nge rogon ni mu gechignag boch e nam,
ma ga gagiyegnag e girdi’ rom nge fel’ rograd.
3 Pi girdi’ rom e dar gelgad ko fare nam ni bochan e saydon rorad;
ma ku gathi gelngirad e ra gelgad riy;
ya ra gelgad u daken gelngim nge fenam gel,
ya ga bay rorad,
ni aram e be dag ni yad ba t’uf rom.
4 Gur e pilung rog nge Got rog;
ga ma gelnag e girdi’ rom,
5 u gelngim e gu gelgad riy ko pi to’ogor romad.
6 Gathi gat’ing romad e be pagan’mad ngay
ara saydon romad ni nge aywegmad;
7 machane gur e mu ayuwegmad rok e pi to’ogor romad,
ma ga waernag e pi’in yad be fananikaymad.
8 Bay u gogned e sorok ngom ni gubin ngiyal’
mu’ug pininged e magaer ngom ndariy n’umngin nap’an.
9 Machane, chiney e kam digeymad ma kam pagmad kug waergad;
dakmur un ngak e pi salthaw romad ko mael.
10 Kam pag kug milgad rok e pi to’ogor romad,
ma kar feked e tiromad karfaned.
11 Kam pagmad ni ngan li’mad ni bod e saf;
kam weregmad ko pi nam i yan.
12 Gur e kam pi e girdi’ rom ni chuway’ nib achig puluwon
ni gowa dariy fel’nginrad ngabang.
13 Pi’in gamad buguliyoror e kar guyed e n’en ni kam rin’ ngomad,
ya yad be moning ma yad be minmin ngomad.
14 Kam tabnathin nagmad ku gu makak’argad u fithik’ e pi nam;
yad be chichingeg lolugrad ngomad ni yad be girig.
15 Gubin ngiyal’ nib m’ayfag;
ku gum’ ko tamra’
16 ni fan e moning nge thin ni kireb ni gu be rung’ag
rok e pi to’ogor rog nge pi’in dubrad dakenag.
17 Gubin e pin’ey nike buch ngomad,
ni yug aram rogon ni dawor gu paged talinem
ara gu th’abed fare m’ag ni mu ngongliy u thildad.
18 Gubin ngiyal’ ni ga bay u lanin’mad
ma gamad be rin’ e n’en ni mu machibnag.
19 Machane ka mu pagmad u fithik’ e gamanman ni malboch
ni de yag ni nggu ayweged gamad;
kam digeymad u fithik’ e rumug.
20 Fa’anra kug paged e liyor ngak e Got romad
kug meybilgad ngak yug reb e got,
21 ma rib mich ni gamnang,
Ya gamnang e tin bay u lanin’mad nib mith.
22 Machane bocham ma aram fan ni gamad e pitapigpig rom e yibe li’mad ni gubin ngiyal’,
kan ta’mad ni bod e saf ni ngan thang e fan rok.
23 Somol, mu od! Mangfan ni ga be mol?
Are mu deg! Dab mu n’agmad ni dariy n’umngin nap’an!
24 Mangfan ni ga be mith romad?
Dab mu pagtalin e gafgow nge oloboch romad!
25 Kug awgad nga but’ ni kug masengsenggad’;
kug thiggad u fithik’ e ab ni kug waergad.
26 Moy mu aywegmad!
Bochan fare t’ufeg rom ni dabimus
ere nopa’am gamad!
DRAFT VERSION — Proofreading in progress