30
Ba meybil ko Pongmagaer
1 Gu be pining e sorok ngom, SOMOL, ya kam ayuwegneg
ma da mu pag e to’ogor rog ngar giriggad ngog.
2 SOMOL, ni Got rog, kug yornag e ayuw ngom,
ma kam gol nigeg;
3 kam teg u orel ko low ko yam’.
Kug waen i yan ko wo’ rog nga’ar,
machane ma ga fulweg e yafos ngog.
4 Ngan tangnag e sorok ngak SOMOL,
gimed gubin e girdi’ rog nib yul’yul’ ngak!
Mu ted u wan’med e n’en ke rin’ e En nib Thothup,
migimed pining e magaer ngak!
5 Ya damumuw rok e ta’boch ngiyal’,
ma feni gol e nap’an e yafos.
Ra map e lu’ nnep’,
me yib e felelan’ ni kadbul.
6 I pagan’ug me lungug u wun’ug,
“Ri dakuriy bi’id ni gu ra waer.”
7 SOMOL, gur e um gol ngog;
um yororiyeg ni bod bburey ni kan yororiy ni fan ko mael.
Ma nap’an e mu mithag owchem rog,
mu gu rus.
8 Mug piningem, SOMOL;
mu gu wenignag e ayuw rom ni lungug:
9 “Mang e rayag ngom ko yam’ ni gu ra tay?
Mang e ra fel’ ngom ni fa’an gu ra yan nga low?
Gur rayag ni nge pining e pi’in karm’ad e sorok ngom?
Rayag nra weliyed fanam gol ni dar ma yoyowol?
10 SOMOL, mmotoyil ngog, ma ga runguyeg!
SOMOL, mu ayuwegneg!”
11 Ka mu pilyeg e kirban’ rog kemang ba churu’ ni felfelan;
ka mu chuweg e gafgow’an rog,
ma ka mu longbiyeg ko felfelan’.
12 Ere dab gu th’ab gulungag;
bay gu tangnag e sorok ngom.
SOMOL, I gur e Got rog;
Bay gu pining e magaer ngom ni manemus.
DRAFT VERSION — Proofreading in progress