1 Fa’anra siyeg be’ ni nge yog ban’en u kort u murung’agen ban’en ni guy fa manang ni buch, ma ke denen ni yira gechignag riy.

2 Fa’anra kal be’ nge math nga ban’en nib ta’ay ni bod ba gamanman nike yim’, ma yug nap’an e ra nang e n’en nike rin’, ma ke buch e rok ma ke ta’ay.

3 Fa’anra kal be’ nge math nga ban’en nib ta’ay ni yib rok ba girdi’, ndemturug ko mang, ma yug nap’an e ra nang e n’en ke rin’, ma ke buch e rok.

4 Fa’anra gurgur be’ nge micheg ban’en, nde leam ni bfel’ rogon ndemturug ko mang, ma yug nap’an e ra nang e n’en ke rin’, ma ke buch e rok.

5 Nnap’an ra bucheg be’ reb e pi denen n’ey, ma aram e thangri puwofaynag e denen rok, 6 ma puluwon e denen rok ni nge fek i yib ngak SOMOL e ba saf ni bpin ara ba kaming ni maligach. Ma fare prist e nge pi’ ni maligach ni fan ko denen rok facha’.

7 Machane fa’anra dabiyag puluwon ba saf ara ba kaming rok, ma thangri fek l’agruw e arche’ ni dove ara l’agruw i bulogol i yib ngak SOMOL ni puluwon e denen rok. Reb e nge mang maligach ko denen ma reb e nge mang maligach ni mo’oruf. 8 Nge fek i yib ngak fare prist, som’on e nge pi’ fare arche’ ni maligach ko denen. Nra lepey k’angan nge yim’ machane dabi luf lolugen, 9 me wereg boch u racha’en fare arche’ u dow fare altar i yan. Ma tin ke aw riy e nge po’ug nga enggin fare altar. Irera’ e maligach nma chuweg e denen. 10 Ma aram e bin nl’agruw ko fa gali arche’ e nge pi’ ni maligach ni mo’oruf, ni aram yalen ni kan turguy. Ara’ rogon ni nge pi’ fare prist e maligach ni fan ko denen rok be’ min n’ag fan rok.

11 Fa’anra dabiyag puluwon l’agruw arche’ ni dove ara l’agruw e bulogol rok be’, ma thangri fek i yib l’agruw e pawn e flour ni ngan ognag ni fan ko denen rok. Dabi tay e gapgep ni olive ara incense ngay, ya ba maligach ni fan ko denen, ma gathi bmaligach ni grain. 12 Me fek i yib ngak fare prist, ni ir e bayi fek e flour nap’an lan barba’ i pa’, ni aram e bpow riy ni kan ognag ni gubin ngak SOMOL. Me urfiy u daken fare altar nib ggan ni maligach. Ren’em e ba maligach ni nge chuweg e denen. 13 Aray rogon ni nge pi’ fare prist e maligach ni fan ko denen rok be’, min n’ag fan rok. Ma tin ra aw ko fapi flour e nge par rok fare prist, ni bod ni yima rin’ ko fare maligach ni grain.

14 I SOMOL e pi’ e pi gafal ni ba’aray ngak Moses. 15 Fa’anra denen be’ ni gathi leam rok nde yag nni pi’ puluwon e tin nib thothup ngak SOMOL, ma thangri fek ba maligach nib mathang malfith i yib ngak SOMOL ni aram e ba saf ni pumo’on ara ba kaming ni dariy bochyang u downgin nib kireb. Ni rogon puluwon ni kan turguy ni ngan pi’. 16 Thangri pi’ e tin nsusun e nge pi’ ma de pi’, miki puthuy rliw’ e pasent ngay. Nge pi’ e pin’ey ngak fare prist, ma fare prist e nge pi’ fare gamanman ni maligach ni fan ko denen rok facha’, ma yira n’ag fan rok.

17 Fa’anra denen be’ nge th’ab reb fapi motochiyel rok SOMOL ni kal riy, ma aram e ke buch e rok ma thangri pi’ puluwon ni aram e gechig rok. 18 Thangri fek i yib ngak fare prist ba maligach, ni ba saf ni pumo’on ara ba kaming ndariy bochiyang u downgin nib kireb nge pi’ ni aram e bmathang malfith. Ni bod rogon ni kan turguy. Fare prist e ra pi’ fare maligach ni fan ko denen rok facha’ ni kal riy, ma yira n’ag fan rok. 19 Irera’ e maligach ni mathang malfith ni fan ko denen rok be’ nike rin’ nib togopluw ngak SOMOL.