LEVITIKUS
Murung’agen e Re Ke Babyor Ney
Levitikus e be weliy riy rogon ni i pi’ Somol e pi motochiyal nge boch e fnow ngak Moses. Fithingan e re ke babyor ney e yib ko fare bugithin ni “Levite”, ni fan e be’ ko ganong rok Levi. Pi Levite e bogi tapigpig rok Somol ni yad ba mal’eag ni ngu’ur pigpiggad ko fare Tent nib thothup, ma pi prist e rabad u reb fapi tabnaw ko Levite. Gin ga’ yang ko re ke babyor ney e be weliy murung’agen e maruwel rok fapi prist nge boch e Levite, ni bod e pi maligach, pi tow’ath ni yima pi’ ngak Somol, nge boch e madnom ni turguy e taliw rorad. Ma ku bay ko re ke babyor ney boch e motochiyel ni murung’agen e miti gamanman ni yira kay, nge miti mad ni yira fanay, nge rogon ni ngan ayweg e pi’in gafgow.
Ba ga’ yang ko re ke babyor ney e be weliy murung’agen e pi motochiyel, machane ku bay riy murung’agen e n’en nra buch rok be’ ara ba prist ni de fol, ara be’ ara ba prist nma fol ko tin keyog Got ni ngan rin’. Got e ba machrag ni i gechignag e pi’in i togopluw, machane ki micheg e ren’en ni ba’aray ko pi’in yad ra fol rok:
“Bay gu par romed; nggu mang Got romed, ma bay mmanged girdi’eg. I Gag SOMOL ni Got romed e kug fekmed nga wuru’ yu Egypt ni bochan e nge dabkum pired ni gimed e sib. Kug kirebnag e re gelngin ni ba’aram ni michigiymed u but’, kug tay’med kam marod ni kam puged owchemed ngalang.” (26:12, 13)
Gathon e Re Ke Babyor Ney
Motochiyel u Murung’agen e Maligach 1:1—7:38
Pi’in nni Tayrad ko Liw ni Prist 8:1–36
Tin Som’on e Maligach ni Pi’ Aron 9:1–24
L’agruw i Prist nni Li’ Row 10:1–20
Motochiyel u Murung’agen e N’en nib Be’ech nge N’en nib Ta’ay 11:1—15:33
Motochiyel u Murung’agen e Rofen ni Yima N’ag Fan e Denen 16:1–34
Motochiyel u Boch Ban’en 17:1—20:27
Boch e Gafal ni Ngi i Fol e Prist Riy 21:1—22:33
Fanow u Rogon e Gam’ing ko pi Madnom ni Turguy e Taliw 23:1—25:55
Pi Fal’egwaath nge Gechig 26:1–46
Motochiyel ko Tin nni Micheg nge Tin nni Ognag Ngak Somol 27:1–34
1
Pi maligach ni ngan urfiy nib polo’
1 U lan fare Tent u p’eowchen SOMOL e pining SOMOL Moses riy nge pi’ ngak e pi gafal ni ba’aray 2 ni fan ngak piyu Israel ni ngu’ur folgad riy ko ngiyal’ ni yad be pi’ e maligach rorad.
Ra nge pi’ be’ ba maligach ni gamanman, ma reb e garbaw rok, fa reb e saf rok, ara reb e kaming rok. 3 Fa’anra reb e garbaw rok e nge pi’ ni fare maligach ni mo’oruf, ma thangri fek i yib ba garbaw ni pumo’on ndariy bochyang u downgin nib kireb. Thangri pi’ ni maligach u langan e mab ko fare Tent u p’eowchen SOMOL, ya nge yag ni fel’ fa’anem u wan’ SOMOL. 4 Facha’ e nge tay pa’ nga daken lolgen fare gamanman, ma aram e ra magan’ SOMOL ngay ni nge mang bayul ko denen rok fa’anem. 5 Me li’ facha’ fare garbaw ni pumo’on u rom, me pi’ fapi prist ni pifak Aron e racha’ riy ngak SOMOL ni aram e yad be pag nga aningeg raba’ fare altar u langan e mab ko fare Tent. 6 Nge mu’ me fathiy facha’ keru’ fare gamanman nge th’eth’ab, 7 ma fapi prist e ngar yarmiyed e l’ud nga daken fare altar ngar ted e nifiy ngay. 8 Me yarmiy fapi prist fayungi ufin ko fare gamanman nga daken e nifiy nib mu’un lolugen nge mam riy ngay. 9 Ma gil’iggan nge ay fare gamanman nl’agruw raba’ e ra luknag facha’, ma re prist ni ir e be pigpig e ngiyal’nem e nge urfiy fare maligach nib polo’ u daken fare altar. Ma bon e re maligach ni ggan ney e rib fel’ u wan’ SOMOL.
10 Fa’anra nge pi’ facha’ reb e saf fa reb e kaming rok, ma dabisiy nib gamanman ni pumo’on ndariy bang u downgin nib kireb. 11 Ma thangri li’ nge yim’ fare gamanman u ba’ ni lel’och ko fare altar, ma fapi prist e ngar paged e racha’ riy ko fa aningeg i tabthung ko fare altar. 12 Tomuren nike th’eth’ab facha’ fare gamanman, ma fare prist ni ir e be pigpig e ngiyal’nem e thangri urfiy gubin yang ko fare gamanman, nib dachug lolgen nge mam riy ngay. 13 Ma gil’iggan nge ay fare gamanman nl’agruw raba’ e thangri luknag fare mo’on, ma fare prist e nge pi’ fare maligach ngak SOMOL ni nge urfiy ni gubin yang u daken fare altar. Ma bon e re maligach ni ggan ney e rib fel’ u wan’ SOMOL.
14 Fa’anra nge pi’ facha’ ngak SOMOL ba arche’ ni mo’oruf, ma thangri mel’eg reb e dove ara reb e arche’ ni blogol nge pi’. 15 Ma fare prist e nge pi’ u daken fare altar, ni nge lepey k’angan, me urfiy fare llug u daken e altar. Ma racha’en fare arche’ e nge pu’og nga downgin barba’ fare altar. 16 Me luf e chew rok nge uneg nga wulan nge n’ag nga ba’ ni ngek ko fare altar ko gin yima kunuy e awat ngay. 17 Me kol pon u barba’ ngu barba’ nge pof nge machwo’ u ngorngoren, ma dabi chow’ay nge mul pon fare arche’ u kenggin, ma aram me urfiy nib polo’ u daken fare altar. Ma bon e re maligach ni ggan ney e rib fel’ u wan’ SOMOL.
DRAFT VERSION — Proofreading in progress