42
1 Ma aram me fulweg Job lungun SOMOL.
Job
2 SOMOL, gu manang ni gubin mrayag rom;
ni gubin e tin ga ra finey mrayag rom ni ngam rin’.
3 Ga be fith ko di’in mu gu thag ninggu fith rogon e gonop rom,
ni yugu aray rogon ndariy bochi ban’en ni gu manang.
Ug weliy murung’agen bogi ban’en nri da gu nang fan,
ni bogi ban’en nib pag feni fel’ ni dabi taw e leam rog ngay.
4 Kamog ngog ni nggu motoyil ngom ni ngam non,
ma ngguy rogon i fulweg e tin ngam fith ngog.
5 Ug par ni kemus ni tin ke weliy e girdi’ ngog e gu manang,
ma chiney e kug guyem nga owcheg;
6 ere kug tamra’ nga urngin e tin ku gu weliy
ma kug kolngan’ug u roy u fithik’ e fiyath nge awat.
Tomuren e welthin
7 Nap’an ni mu’ SOMOL ko non ngak Job, me ga’ar ngak Elifaz, “Kug damumuw ngom nge gali fager rom nir, ya da mu weliyed e tin riyul’ ni murung’ageg, ni bod rogon nike rin’ e tapigpig rog i Job. 8 Ere chiney e ngam feked medlip i garbaw ni pumo’on nge medlip i saf ni pumo’on i yib ngak Job ngan pi’ ni maligach romed. Ma bayi pi’ Job e meybil romed, mu gu fulweg taban e meybil rok, nge dab gu gechig nagmed ni rogon nsusun e nge aw ngomed. Ya da mu weliyed e tin riyul’ ni murung’ageg ni bod ni rin’ Job.”
9 Me rin’ Elifaz nge Bildad nge Zofar e tin keyog SOMOL ni ngar rin’ed, ma aram me fulweg SOMOL taban e meybil rok Job.
10 Tomuren nike meybil Job ni fan ngak fa dalip i tafager rok, me fal’eg SOMOL rogon Job bayay, I sulweg urngin ban’en ni immoy rok Job ngak ni ruw yay nike yo’ornag ke mun nga daken. 11 Urngin pi walagen Job ni pumo’on nge ppin nge pi’in ni urmed ni tafager rok e rabad ra mada’ niged Job miyad un ku Job ko mur u naun rok. Miyad dag nike kireban’rad ngak miyad guy rogon ni ngar fal’eged laniyan’ ni bochan urngin e gafgow ni pag SOMOL nge yib ngak. Ra bagayad me pi’ boch e salpiy ngak nge reb e luwaw ni gol.
12 Me fal’eg SOMOL wa’athan Job nike mun daken e flaab ni pi’ ngak nga rogon ko som’on. I Job e yan i pan ni 14,000 e saf rok, ma 6,000 e kamel, ma 2,000 e garbaw, ma 1,000 e dongki. 13 Me fakay medlip e pagel nge dalip e ppin. 14 Me tunguy fithingan e bin nganni’ e bpin ni fak ni Jemimah, ma bin migid e Keziah, ma bin th’abi bitir e Keren-Happuch. 15 Me yan i par ndakuriy boch e ppin u fayleng ni bod feni pidorang fapi ppin ni pifak Job. Me unegrad e chitamangirad ngak pifak ni pumo’on nge pi’ e gayog rorad.
16 Nga tomuren e biney miki par Job nib fos ni 140 e duw, nge guy pifak pifak nge pifak pifak pifak ni aram e bin aningeg e mfen. 17 Me yim’ ni kari yo’or e duw rok.
DRAFT VERSION — Proofreading in progress