1 Som’on e i par e girdi’ nu fayleng ni ta’ab thin e yad ma yog ma ta’reb rogon e yu bugithin rorad. 2 Ma nap’an nranod i yan u lane ngek, miyad yib nga bangi tafel’fel’ nib ga’ yang ni bay u lan yu Babylonia, ni aram e gin nra pired riy. 3 Me lungurad, “Ngad ngongliyed e rengnga nge mu’ ma gadad urfiy.” Ma aram me yag e rengnga ngorad ni ngar ubunged e naun ngay, nge n’en ni yima yin’ nga thilin e rengnga nge kol e rengnga. 4 Ma aram me lungurad, “Ngad ngongliyed reb e binaw ngodad ni pire’ e naun riy ni bay ba wulyang riy ni yan i tun ko lang. Me gilbuguwdad me siy da weargad u roy u fayleng.”

5 Me yib SOMOL nga but’ nge yib i guy fare binaw ni pire’ e naun riy nge fare wulyang nike ngongliy fapi girdi’, 6 me ga’ar, “Picha’ ney e yad ta’ab girdi’ ma ta’reb e thin rorad, ma aray e kar tabolngin niged e tin ngar ngongliyed. Dabi n’uw nap’an me yag rorad ni yug tin yad ba’adag miyad ngongliy. 7 Darod nga but’ ngad athkuyed e thin rorad nge bagayad ma dabki nangfan e thin ni be yog bagayad.” 8 Ma aram me weregrad SOMOL miyad wear nga gubin yang u fayleng, miyad pag fare binaw ndakur toyed e naun riy. 9 Fithingan e re binaw nem nra toyed e naun ngay ni pire’ e yu Babylon,* BABYLON: Re ngachal ney ni thin ni Hebrew e gowa fare bugithin ni “ma’athuk”. fithingan, ni fan e u rom e athkuy SOMOL e thin rok urngin e girdi’ riy, mu rom e weregrad riy nga gubin yang u fayleng.

10 Irera’ e picha’ ni owchen Shem. Nap’an ke yan l’agruw e duw nga tomuren nike tharey e ran e fayleng, ma 100 e duw rok Shem e ngiyal’n’em, min gargeleg bochi pagel ni fak ni Arpakshad. 11 Tomuren ni kan gargeleg Arpakshad miki par Shem nib fos ni 500 e duw, miki fakay boch e bitir.

12 Ma nap’an ni gaman guyey nge lal e duw rok Arpakshad, min gargeleg bochi pagel ni fak ni Shelah; 13 tomuren ni kan gargeleg Shelah miki par Arpakshad nib fos ni 403 e duw, miki fakay boch e bitir.

14 Ma nap’an ni gaman guyey e duw rok Shelah, min gargeleg bochi pagel ni fak ni Eber; 15 tomuren ni kan gargeleg Eber miki par Shelah nib fos ni 403 e duw, miki fakay boch e bitir.

16 Ma nap’an ni gaman guyey nge aningeg e duw rok Eber, min gargeleg bochi pagel ni fak ni Peleg; 17 tomuren ni kan gargeleg Peleg miki par Eber nib fos ni 430 e duw, miki fakay boch e bitir.

18 Ma nap’an ni gaman guyey e duw rok Peleg, min gargeleg bochi pagel ni fak ni Reu; 19 tomuren ni kan gargeleg Reu miki par Peleg nib fos ni 209 e duw, miki fakay boch e bitir.

20 Ma nap’an ni gaman guyey nge l’anguw e duw rok Reu, min gargeleg bochi pagel ni fak ni Serug; 21 tomuren ni kan gargeleg Serug miki par Reu nib fos ni 207 e duw, miki fakay boch e bitir.

22 Ma nap’an ni gaman guyey e duw rok Serug, min gargeleg bochi pagel ni fak ni Nahor; 23 tomuren ni kan gargeleg Nahor miki par Serug nib fos ni 200 e duw, miki fakay boch e bitir.

24 Ma nap’an ni gaman rliw’ nge mereb e duw rok Nahor, min gargeleg bochi pagel ni fak ni Terah; 25 tomuren ni kan gargeleg Terah miki par Nahor nib fos ni 119 e duw, miki fakay boch e bitir.

26 Ma nap’an nike pag medlip i ragag e duw rok Terah, min gargeleg boch e bitir ngak ni aram Abram, Nahor nge Haran.

27 Ba’aray e pi cha’ ni owchen Terah: Terah e chitamngin Abram nge Nahor nge Haran. Mi Haran e chitamngin Lot, 28 mi Haran e yim’ ko re binaw ni ba’aram ni ilal riy, ni aram yu Ur ni bay u lan e nam nu Babylonia, ko ngiyal’ ndawori yim’ e chitamngin. 29 Me le’ay Abram Sarai, me le’ay Nahor Milkah, ni be’ ni bpin ni fak Haran, ni Haran e ir e chitamngin Iskah. 30 Ma de fakay Sarai e bitir, ya de yag ni nge diyen.

31 Me fek Terah Abram ni be’ nib mo’on ni fak, nge tongin i Lot ni be’ nib mo’on ni fak Haran, miki fek Terah Sarai ni le’engin Abram ni fak me un ngorad ngar chuwgad ko re binaw nem nu Ur ni bay u lan e nam nu Babylonia, miyad yan ni ngranod ko nam nu Kanaan. Miyad mada’ nga Haran miyad par u rom, 32 me yim’ Terah u rom nike gaman 205 e duw rok.