1 I Bezalel e ngongliy ko gek’iy ni acacia ba altar ni fen e maligach ni mo’oruf. Re altar ney e ta’reb n’umngin nga radan, ya medlip nge balay e fit n’umngin ma ku medlip nge balay e fit radan, ma aningeg nge balay e fit tolngin. 2 Me ngongliy aningeg i gagey u daken aningeg i tabthug riy, nib ta’reb ko fare altar. Me ing ko bronze ni ga’ngin. 3 Miki ngongliy urngin tatalin fare altar: bogi th’ib, nge bogi sebel, nge bogi dabiy, nge bogi fok nib ga’, nge yu raba’ ban’en ni fen e fek nifiy. Urngin e pi tatalin e altar ney me ngongoliy ko bronze. 4 Me ngongliy bangi waya ko bronze nge tay nga tan mirichren fare altar, re gi waya nem e yib i mada nga lukngun fare altar. 5 Me ngongliy aningeg i luwaw ni fen e feak nge puthuy ko fa aningeg i tabthung riy. 6 Me ngongliy ko gek’iy ni acacia l’agruw ley i mat’, me ing ko bronze. 7 Me yin’ fa gal ley i mat’ u lan fapi luwaw ni bay ko tabthung u barba’ fare altar ngu barba’. Fare altar e ni chamey ko ren ni bay langgin.

8 I ngongliy barba’ i dabiy nge ay ko wasey ni bronze, ni ngongliy u yuyang i therik ni fen e ppin ni yad ma pigpig u mit fare Tent u p’eowchen SOMOL. Exo 30:18

9 Me ngongliy yungi kateng ko mad ni wech ni fen rungrung ko fare Tent u p’eowchen SOMOL. Ba’ ni yimuch e wugem e yard n’umngin e pi kateng riy, 10 nike the’ nga rliw’ i rumog ni bronze ni kan ayliy ngalan rliw’ i ayal riy nib bronze, ma pi lam nge pi ralap riy e go’ ba silber. 11 Ma ku aram rogon ni ngongliy e ba’ ni lel’och fare yoror. 12 Mu lan ngal fare yoror e rliw’ nge lal e yard e kateng riy, ma ragag ley e rumog riy ma ku ragag e ayal riy. Ma pi lam nge pi ralap, nge p’ebgul fa yuley i rumog e kan ing ko silber. 13 Ma ley ni ngek ko gin ni yima yib riy e riliw’ nge lal e yard radan e pi kateng riy ni rungrung. 14-15 Ma barba’ nge barba’ i langan e gin yima yib riy e ra bang e keteng u barba’ ma medlip nge balay e yard radan, ni kan the’ nga dalip ley i rumog ni kan ayliy nga langgin dalip i ayal riy. 16 Gubin yang e kateng ni fen e rungrung e ni ngongliy ko mad ni wech. 17 Fapi ayal ko rumog e ni ngongliy ko wasey ni bronze, ma pi lam, nge dubchey riy, nge upong u p’ebugul e yuley i rumog riy e ni ngongliy ko silber. Gubin e rumog nib liyeg e rungrung e go’ yan i peth ko pi ralap u p’ebugul. 18 Ma fare gi kateng ni yima the’ u langan e gin yima yib riy e ni ngongliy ko mad ni wech min lifith bunu’en e saf u fithik’ ni kan k’ad ko ra’en mak’ef, purple, nge row min sisyunag ni fel’ ya’an riy. Regi kateng nem e ragag e yard n’umngin ma l’agruw nge balay e yard tolngin, ni bod fa yungi kateng ko rungrung. 19 Regi kateng nem e kan the’ nga aningeg ley i rumog ni kan ayliy ngalan aningeg i ayal riy nib bronze. Pi lam riy, nge opong u p’ebugul e rumog, nge pi ralap riy e ni ngongliy ko silber. 20 Gubin e pin’en ni yuluy ko fare Tent nge fare rungrung nib liyeg e ni ngongliy ko bronze.

21 Ireray urngin e pin’en nni fanay ko fare Tent u P’eowchen SOMOL, ko gin bay fagal yang i malang riy ni kan yoloy fa Ragag i Motochiyel nga daken. I Moses e yog ngak e pi Levite ni Ithamar e ma tay murung’agen e maruwel ni ngar rin’ed, ni be’ nib mo’on ni fak Aron ni prist ni ngar sumar niged urngin e pin’ey.

22 I Bezalel ni fak Uri me Hur e tutuw rok ni be’ ko fare ganong rok Judah, e ngongliy urngin ban’en ni yog SOMOL ni ngan gongliy. 23 Me Oholiab nib mo’on ni fak Ahisamak ni be’ ko ganong rok Dan e pi’ e ayuw ngak, ir be’ ni ba salap i ker ker ya’an ban’en, ma ba salap i yoloy ya’an ban’en u m’on ni ngan ngongliy, ma ku ma lifith e mad ni wech, nge mad nib ra’en mak’ef nge purple, nge bunu’en e saf ni kan kad ko row.

24 Urngin e gol u gubin nni ognag ngak SOMOL ni fen fare Tent nib thothup e 2,195 e pawn, tomalngin ni kan duwgiliy ko thabthabel e ngiyal’nem. 25 Ma silber ni mokun u pa’ e girdi’ e ni thabthabelnag ma 7,550 e pawn, tomalngin ni kan duwgiliy ko thabthabel e ngiyal’nem. Exo 30:11–16 26 Re matha’eg ney e aram urngin ni mokun u pa’ urngin e girdi’ ni kan the’egrad, ra bagyad me pi’ oren ni kanog, ni bod tomalngin ni kan duwgiliy ko thabthabel e ngiyal’nem. Urngin e pumo’on ni rriliw e duw yangren ngalang ko fare mathe’eg girdi’ e 603,550 urungrad. 27 Ma silber e 7,500 e pawn nni fanay nga 100 i ayal ni fen fare Tent nib thothup nge kateng riy, ra reb e pi ayal nem ma medlip i ragag nge lal e pawn nni fanay ngay. 28 Ma tin ni magey ko fapi silber ni wugen pawn, e ngongliy Bezalel bogi lam ni fen e rumog, nge upong u p’ebgul fa yuley i rumog. 29 Pi bronze nni ognag ngak SOMOL e 5,310 e pawn tomalngin u gubin. 30 Ni ir e ni ngongliy riy fapi ayal ni fen langan e mab ko Tent u P’eowchen SOMOL, nge fare altar nib mu’un fare gi waya ngay, nge urngin tatalin fare altar, 31 nge ayal ni fen e yoror riy nib liyeg, nge ayal ni fen garog ko fare yoror, nge gubin e yuluy ko fare Tent nge fare yoror.