33
Moses ni fal’eg Wa’athan e pi ganong nu Israel
1 U m’on ni nge yim’ Moses ni fa’anem ni girdi’ rok Got ma ba’aray e meybil ni tay ni fan ngak yu Israel.
2 I SOMOL e yib ko burey ni Sinai;
I for ngalang u daken yu Edom ni bod e yal’,
me gal ram’en ko burey ni Paran nga daken e tirok e girdi’.
Yib ni ragag biyu’ e engel nike un ngak,
ma bay ba nifiy ni be daramram rok,
3 SOMOL e rib t’uf e tirok e girdi’ rok,
ma yoror rok e girdi’ nike mil farad ngak.
Ere da parawgad nga but’ u to’oben e rifrif u ay,
ma gadad fol ko tin keyog.
4 Ud folgad ko motochiyel ni pi’ Moses ngodad,
re motochiyel nem e ke par ni ba wogthuth ni fen e nam rodad.
5 Me mang SOMOL e pilung rok e girdi’ rok ni er yu Israel
ko fa ngiyal’nem ni mu’ulung nga ta’bang e pi ganong rorad nge pi’in yad ma yog e thin rorad.
6 Ba’aray e thin ni yog Moses ni murung’agen fare ganong rok Ruben:
“Ruben e nge dabi math owchen e birok e ganong,
ni yugu aram feni lich e girdi’ riy.”
7 Me yog murung’agen e ganong rok Judah ni ga’ar:
“SOMOL, mu telim ngorad ni yad be wenig ngom ni ngam ayuwegrad,
mu fulwegrad bayay ko pi ganong nu Israel.
SOMOL, mu cham ni pa’rad,
ma ga ayuwegrad u pa’ e pi to’ogor rorad.”
8 Me yog murung’agen e ganong rok Levi ni ga’ar:
“SOMOL, mu dag e tin nib m’agan’um ngay u daken Levi.
Yad e girdi’ rom nib yul’yul’;
mu sikeng nagrad faram u Massah,
ma ga nangrad ko fapi alublub nu Meribah ni yad ba yul’yul’.
9 Yul’yul’ ni ur ted ngom e kab gel ko yul’yul’
ni ur ted ngak e gallabthir rorad, nge ngak pi walagrad ara pifakrad.
Ur folgad ko thin rom
ma ur pired ni yad ba yul’yul’ ko m’ag rom.
10 Bay ra filed ngak e girdi’ rom ni ngu’ur folgad ko pi motochiyel rom;
bay ur pi’ed e maligach ngom u daken e altar rom.
11 SOMOL, mu ayuweg e ganong rorad ngu’ur pired ni yad ba gel;
wenig ngom, nge fel’ u wun’um e pin’en ni yad be rin’.
Mu thirif e pi to’ogor rorad u but’ ni urngin,
nge dabkiyog nra sak’iygad bayay.”
12 Me yog murung’agen e ganong rok Benjamin ni ga’ar:
“Irera’ fare ganong nib t’uf rok SOMOL ma be yoror rok;
gubin e rran ni yad be par u p’eowchen ni ir e kemang manaf rorad.”
13 Me yog murung’agen e ganong rok Josef ni ga’ar:
“I SOMOL e ngi i fal’eg wa’athan e nam rorad ngi i pi’ e n’uw ngay,
ma be pi’ e ran u tan e but’ nge yib ngay.
14 Nge ayuweg SOMOL e nam rorad nge tmal’ wom’ngin e woldug riy,
nge taw ngal’an e galwog ma nge yib wom’ngin ni pire’ ma ba th’abi fel’.
15 Pi burey rorad nike kakrom e nge sug ko tin th’abi fel’ ko wom’ngin e woldug.
16 Mang e yigi sugnag e tin th’abi fel’ daken e nam rorad,
ni tow’ath nike yib u feni fel’ SOMOL,
ni ir e non u fithik’ fachi ke gek’iy ni be daramram.
Mang e yigi yib e pi tow’ath ney ko birok Josef e ganong,
ya ir e i yog e thin rok pi walagen.
17 Josef e bod gelngin ba garbaw ni pumo’on,
ni bod e gagey rok ba garbaw ni malboch.
Gagey rok e fa yu biyu’ i girdi’ rok Manasseh,
nge fa yu ragag i biyu’ i girdi’ rok Efraim.
Ir e ma yip’ ngak e pi nam
nge thuruyrad i yan nga thathran e fayleng.”
18 Me yog murung’agen e ganong rok Zebulun nge Issakar ni ga’ar:
“Girdi’ rok Zebulun e nge fel’ rogorad ko chur ni yad be tay ni fan ko chuway’ nge fol chuway’,
me yo’or ban’en rok Issakar ko nam rok.
19 Yad ma pining e pi nam ko fare burey rorad,
mu rom e yad ma pi’ e pi maligach riy ni bfel’,
fla’ab rorad e mayib u maday ngorad
ma ku ma yib ko yan’ ni bay u dap’eday i yan.”
20 Me yog murung’agen e ganong rok Gad ni ga’ar:
“Ke sorok Got ni gagiyegnag nge ga’ e gin yad be par riy.
I Gad e be son ni bod ba layon
ni nge pof baraba’ i pa’ay ara nge bilig lolgey.
21 Gin th’abi fel’ ko nam e ra feked ngar tafned;
f’oth rok e en nma yog e thin e ni pi’ ngorad.
Ur folgad ko thin rok SOMOL nge pi motochiyel rok
ko ngiyal’ ni mu’ulung e pi’in yad ma yog e thin rok yu Israel.”
22 Me yog murung’agen e ganong rok Dan ni ga’ar:
“Dan e ba gamanman ni layon ni kab bbitir;
Ni og nga wuru’ yu Bashan.”
23 Me yog murung’agen e ganong rok Naftali ni ga’ar:
“Naftali e kari fal’eg SOMOL rogon ya rib fel’ u wan’;
binaw ni taferad e mus ko lipath nu Galilee me yan i thang ko yimuch.”
24 Me yog murung’agen e ganong rok Asher ni ga’ar:
“Rogon ni kan fal’eg wa’athan Asher e ka ba ga’ nga rogon ni kan rin’ ko tin kabay e ganong,
ngi i par ni bfel’ u wan’ pi walagen,
me yo’or e gek’iy ni olive ko birok e binaw.
25 Ma mab ko pi garog ko pi binaw rok e ngi i par ni wasey,
mi i par ndabi buch ban’en rok.”
26 Gimed yu Israel, ndariy reb e kan ni bod e Got romed,
ma yan u lanelang ni be galgael ram’en,
ma yib i kuruf e manileng nge yib i ayuwegmed.
27 Ka faram i yib ni be par Got ni ir e yoror romed,
pa’ nma par ni manemus e be ayuwegmed ngay.
I tuluf e pi to’ogor romed ma gimed be yan nga m’on,
me yog ngomed ni ngam thanged e fan rorad ni yad gubin.
28 Pi’in owchen Jakob e ma par u fithik’ e gapas,
ni dariy ban’en nra buch rorad u lan fare nam nib sug ko grain nge wayin,
ni wa’angachal nma mul u lang e ma tarannag e but’ riy.
29 Israel, rib fel’ wa’atham!
Dariy be’ ni bod gur,
ni ba nam ni SOMOL e ke ayuweg.
I SOMOL e ir e shield rom me ir e saydon rom,
ni nge ayuwegnem rok e to’ogor rom me gagiyeg nigem ngam gel ngorad.
Pi to’ogor rom e bay ra bad ni yad be wenig ngom ni ngam runguyrad,
ma bay mu yot’yot’rad nga but’.
DRAFT VERSION — Proofreading in progress