1 Manasseh e ragag nge l’agruw e duw yangren me mang pilung nu Judah, me gagiyeg u Jerusalem ni wugem nge lal e duw. 2 Me denen Manasseh nib togopluw ngak SOMOL ya i rin’ e tin sonogor ni i rin’ e pi nam ni tulufrad SOMOL nga wuru’ fare nam nnap’an ni be yib e girdi’ rok i yib. 3 Miki toy bayay fa yungi tagil’ e meybil rok e pi’in ndar nanged Got ni fa’ani gathay e chitamngin i Hezekiah. Me toy e pi altar ni ngu’un tayfan Baal riy, me ngongliy e liyos ni ya’an Asherah ni fare got nib bpin, mi i tayfan e pi t’uf. 4 Me toy e pi altar rok e pi’in ndar nanged Got u lan fare Tempel, ni fa gin keyog SOMOL ni ir e ngu’un liyor ngak riy ni dariy n’umngin nap’an. 5 Me toy e pi altar ni yima tayfan e pi t’uf riy u rom u lan fagal yoror ko fare Tempel. 6 Me pi’ pifak ni pumo’on ni bogi maligach ni mo’oruf u lan fare loway ni Hinnom. Mi i pig ma be fith laniyan’ e pi’in yad ma yog e n’en ni bayi buch rok e girdi’ nge pi’in yad ma pong thagith. I denen nib gel nib togopluw ngak SOMOL ngari k’aring e damumuw ngak. 7 Me tay ya’an ban’en ngalan e Tempel, ni fa gin keyog Got ngak David nge Solomon nib mo’on ni fak ni ga’ar: “U roy u lan yu Jerusalem u lan ere Tempel ney, e irera’ e gin ku gu mel’eg u lan gubin yang e pi nug rok fa ragag nge l’agruw i ganong nu Israel ni ir e ngu’un meybil ngog riy. 8 Ma fa’anra fol e girdi’ nu Israel u gubin e tin ku gu ta’chiylen miyad fol ko fare Motochiyel ni polo’ ni fa ni pi’ e tapigpig rog i Moses ngorad, ma aram e dab gu pagrad ngan tulufrad nga wuru’ fare nam ni ku gu pi’ ngak e pi chitamngirad.” 9 Manasseh e waliy e girdi’ nu Judah ngar rin’ed e denen nib gel e kireb riy ko tin i rin’ girdi’en e pi nam ni tulufrad SOMOL nga wuru’ fare nam nnap’an ni be yib e tirok e girdi’ i yib.

10 Yug aram rogon ni ginaeng SOMOL i Manasseh nge girdi’ rok ko kireb rorad, mar gel niged lanin’rad ndar motoyilgad ngak. 11 Ma aram me pag SOMOL e pi tolang ko salthaw ngar m’aged e mael nga Judah. Ngar koled Manasseh, miyad the’ e lam nga dow, ngar m’aged e chen ngak, ngan fek nga Babylon. 12 Mu fithik’ e gafgow rok me sobut’ laniyan’, me cheal nge sap ngak SOMOL ni Got rok, me wenig ngak ni nge ayuweg. 13 Me fel’ e meybil rok Manasseh u wan’ Got me fulweg taban ni aram e pag nge sul nga Jerusalem nge gagiyeg bayay. Ren’ey e ri micheg ngan’ Manasseh ni SOMOL e ir Got.

14 Nga tomuren e ren’ey me tolangnag boch Manasseh fare thal i yoror ni wuru’ e ba’ ni ngek ko fare Binaw rok David, ni tabab u bangi m’uth u lan e loway nib chugur ko fapi alublub nu Gihon ni bay nga lel’och ko fare Garog Nnig fithingan u bang ko fare binaw ni Ofel fithingan. Ma ra reb fapi binaw ni kan yororiy ni fan ko mehl u Judah me tay reb e tolang ko salthaw ngay ngi i gafaliy e re ulung i salthaw ni bay riy. 15 Me chuweg u lan fare Tempel e pi got rok boch e nam nge fare ya’an ban’en ni ngongliy nge tay ngaram, nge fapi altar rok e pi’in ndar nanged Got ni immoy u daken fare ted ni bay fare Tempel riy nge pi altar niki immoy u yu yang u rom u Jerusalem; i fek urngin e pin’ey nga wuru’ fare binaw nge n’ag. 16 Miki ngongliy e yungin ke kireb ko fare altar ni aram e gin yima meybil ngak SOMOL riy, me pi’ e maligach nma gapaseg thilin Got nge girdi’ nge maligach ni fen e ogmagaer u daken fare altar. Me yog ngak gubin e girdi’ nu Judah ni ngar liyorgad ngak SOMOL ni Got rok yu Israel. 17 Ni yug aram rogon ni ul ul e girdi’ ngay ngu’ur pi’ed e maligach u yuyang ni tagil e liyor, machane go’ SOMOL e yi be pi’ ngak.

18 Gubin e tin kabay ni i rin’ Manasseh, ni fare meybil ni pi’ ngak e Got rok, nge thin ni i yog e pi profet ngak u fithingan SOMOL ni Got rok yu Israel, e go’ kan yoloy ngalan Chepin e Pilung nu Israel. 19 Fare meybil rok fare pilung nge fulweg riy ni pi’ Got, nge babyoren e denen ni i rin’ fare pilung u m’on ni pi’ keru’ ko denen rok-kireb ni i rin’, yungi tagil’ e tayfan rok e pi’in ndar nanged Got nge pi pow rok Asherah ni fare got nib bpin ni ngongliy nge pi liyos ni i tayfan — e go’ kan yoloy ngalan e babyor ni Chepin e Profet. 20 Me yim’ Manasseh mi ni k’eyag ko naun rok e pilung, me Amon nib mo’on ni fak e yan nga luwan nge mang pilung.

21 Amon e rliw’ nge l’agruw e duw yangren me mang pilung nu Judah, me gagiyeg u Jerusalem ni l’agruw e duw. 22 Bod e chitamngin i Manasseh, i denen nib togopluw ngak SOMOL, mi i tayfan e pi got ni i tay e chitamngin fan. 23 Machane de bod e chitamngin ni sobut’nag laniyan’ nge sul ngak SOMOL; kabgel feni kireb e tin i rin’ rok chitamngin.

24 Pi tolang rok Amon e ra makathgad nib togopluw ngak ngar li’ed nge yim’ u lan fare naun rok e pilung. 25 Ma girdi’ nu Judah e ra li’ed nge yim’ e pi’in nra li’ed Amon miyad tay Josiah nib mo’on ni fak nge mang pilung.