1 Me yibe Kan Thothup rok Got nga daken Azariah nib mo’on ni fak Oded, 2 me yan ni nge mada’nag Asa ni Pilung. Me tolul ngak nib ga’ laman ni be ga’ar, “Asa ni Pilung mmotoyil ngog, nge gimed gubin e girdi’ nu Judah nge Benjamin! I SOMOL e bay romed u n’umngin nap’an ni gimed bay rok. Fa’an gimed ra gay, ma ra pagmed ngam patgad ngak, machane fa’an gimed ra pag, ma ra n’agmed. 3 Ba n’uw nap’an ni i par yu Israel ndariy e bin riyul’ e Got rorad, mdariy e prist ni ngar filed ban’en ngorad, ma ku dariy ba motochiyel. 4 Machane nap’an ni yib e tin nib mo’maw’ ngorad ma ra chelgad ngar sapgad ngak SOMOL ni Got nu Israel. Miyad gay miyad pir’eg. 5 Re ngiyal’ i n’em e dakuriy be’ nrayag ni ngi i yib ngi i yan nib pagan’, ni bochan e gubin e nam ma bay e wodmang nge wagagey riy. 6 Ra reb e nam ma be gafgownag reb e nam, ma ra reb e binaw ma be togopluw nga reb e binaw, ni bochan e ke pag Got gubin mit e wodmang nge gafgow ke yib nga dakenrad. 7 Machane thingar mu gel niged lanin’med ma dabi mulan’med. Re maruwel ni bay um rin’ed e bay pulwon.”

8 Nap’an ni rung’ag Asa fare yi’iy nike yog Azariah nib mo’on ni fak Oded me yib e athamgil nga laniyan’. Me chuweg urngin e liyos nu lan fare nam nu Judah ngu lan fare gi nug rok Benjamin nge gubin e liyos nu lan fapi binaw ni kol u daken e ted u Efraim ni go’ burey. Miki ngongliy bayay fare altar rok SOMOL ni immoy u mit fare yoror ko Tempel.

9 Bo’or e girdi’ nrabad u Efraim, Manasseh, nge Simeon nga ba’ rok Asa, ngar pired u tan lungun, ni bochan e ka ra guyed ni bay SOMOL rok. Me yog Asa ni ngar mu’ulunggad e girdi’ nu Judah ngu Benjamin. 10 Miyad mu’ulung nga Jerusalem u lan e bin dalip e pul ko re duw ni gaman e ragag nge lal ngay nike pilung Asa. 11 Rofen nem e ra pi’ed e maligach ngak SOMOL ko pin’en ni ka ra feked u fithik’ e yargal: medlip mir’ay e garbaw nge medlip i bbiyu’ e saf. 12 Miyad ngongliy ba m’ag nike ta’reb lanin’rad ni ngu’ur liyorgad ngak SOMOL ni Got rok e pi chitamngirad, u polo’ i gumircha’rad ngu polo’ i lanin’rad. 13 Ma demturug be’, bbitir, pilbithir, pumo’on fa be’ ni bpin ni fa’anra dabi liyor ngak SOMOL ma yira thang e pogofan rok. 14 Miyad micheg u fithingan SOMOL nib ga’ lamrad ni yad ra fol ko re m’ag nem, miyad tolul miyad thoy e rappa. 15 Gubin e girdi’ nu Judah nra felfelan’gad ni bochan e ka ra ngongliyed e re m’ag ney u polo’ i gumircha’rad. Ma rib fel’ u wan’rad ni yad ma liyor ngak SOMOL, miyad fel’ u wan’ SOMOL me pi’ e gapas ngorad u gubin yang.

16 Me chuweg Asa ni Pilung i Maakah ni titaw rok ko liw rok ni chitiningin e pilung, ni bochan e ke ngongliy ba liyos nib golong ni ya’an fare got ni bpin i Asherah. Me th’ab Asa fare got nga but’ nge theth’ab nge urfiy u lan fare loway ni Kidron fithingan. 17 Yug aram rogon nde thirif Asa urngin e yungi n’en ni tagil’ e tayfan rok e pi’in ndar nanged Got u lan fare nam, machane mi i par Asa nib yul’yul’ ngak SOMOL u n’umngin nap’an e yafos rok. 18 Me tay ngalan fare Tempel gubin e pin’en nike ognag Abijah ni chitamngin ngak Got, ni kub mu’un ngay e pin’en nib gol nge silber ni ir rok e ke pi’ ngak SOMOL. 19 Ma daki yib e mael nge mada’ ko re duw nike gaman e guyey nge lal e duw ngay nike gagiyeg.