1 Miki toy Solomon ba tafen e pilung ntafen, ragag nge dalip e duw nni muruwliy. 2 Me fal’eg bang u lan tafen ni Senggil ko Loway nu Lebanon* SENGGIL KO LOWAY NU LEBANON: Aram e bin th’abi ga’ e senggil u tafen e pilung, sana aram rogon fithingan ni yima yog ni bochan e go’ palang ni cedar e ni fanay ngay fithingan, n’umngin e 150 e fit, ma radan e medlip i ragag nge lal e fit, ma tolngin e aningeg i ragag nge lal e fit, ntoy nga daken yu ley i duga’ ni cedar ni ka ni k’afeg ni dalip thal, ni bay yu ley i likeng ni cedar u daken e pi duga’ nem. 3 Ma chigiy riy e ku cedar nike yan u daken fa yu ley i duga’ ni aningeg i ragag nge lal e pi duga’ nem u gubin, yu ragag nge lal ni kan k’afeg. 4 Ma l’agruw raba’ e rungrung riy nra barba’ ma dalip thal e winda ni bay riy. 5 Pi langan e mab riy nge pi winda riy e ni chamey nib kahol, ma fa dalip thal i winda u barba’ e bpuluw ko fa dalip thal ni ku bay u barba’.

6 Ma bay ba senggin riy ni Senggil ko Duga’ fithingan ni medlip i ragag nge lal e fit n’umngin ma aningeg i ragag nge lal e fit radan. Ma bay e baranda riy ni ba’ e chigiy riy, ma yuley i duga’ gelngin.

7 Ma fare senggil Ntagil’ e Pilung, niki yima yog Tagil’ e Pufthin ngay, ko gin nma pitheg Solomon e yu pa’ i oloboch riy, e gek’iy ni cedar e ni fanay u ba’ ni langgin e rungrung ni mus u daken e faraf nge tun ko llon riy.

8 Ma yungin nma par Solomon riy, ni bay u tabgul ko fare senggil Ntagil’ e Pufthin, e ni ngongliy ni ku bod fa tin ba’aram e naun. Ta’ab mit i naun e ki toy ni nge tafnay e bpin rok, re bpin nem e fak fare pilung nu Egypt.

9 Urngin e pi naun ney nib mu’un lan fare yoror ni ga’ ngay e ni ngongliy ko malang ni falel’, ni mus ko pi daf riy nge mada’ nga tan e bogbog riy. Fapi malang e ni foleg min th’ab ko galoyoch u ba’ ni wuru’ ngu ba’ ni langgin. 10 Ma pi def ko fapi naun e ni ubung ko malang ni falel’ mab gagang’ ni kan th’ab ko galoyoch ke pach dow, boch e ragag nge l’agruw e fit n’umngin ma boch e ragag nge lal e fit. 11 Ma daken e pi def nem e ni fanay yug boch e malang ngay nni foleg min th’ab, nge yuley i likeng ni cedar. 12 Lane yaror ko fare naun ni tafen e pilung, lane yaror ko Tempel, nge fare senggil ni yima yan riy nga Tempel e pi rungrung riy e ra yib bathal e ren ni cedar me yib dalip thal e malang ni kan th’ab.

13 Me mol’og Solomon ni Pilung nge yib be’ ni pumo’on ni Huram fithingan, ni be’ nib salap i toy ya’an ban’en nga pa’ nma par u lan fare binaw nu Tyre, mab salap i ngongliy bogi ban’en ko wasey ni bronze. 14 Ma chitamngin nike yim’ e ku be’ nu Tyre, ma ki immoy nreb e salap ni i ngongliy bogi ban’en ko bronze; ma chitiningin e be’ ko ganong rok Naftali. Huram be’ nib llowan’ ma ke yo’or bogi maruwel nga pa’ay nike ngongliy. Me pining e kefel’ ngak Solomon ni Pilung ko pong nike tay ngak ni nge milfan urngin e pi maruwel ko wasey ni bronze ngak.

15 Me n’uf Huram l’agruw i duga’ ni bronze, nra reb ma rliw nge medlip e fit tolngin ma ragag nge meruk e fit ga’ngin lukngun, ngalang u langan e mab ko fare Tempel. 16 Miki ngongliy ko bronze l’agruw yang i ban’en ni ngan tay nga p’ebugul fagal duga’, nra bang ma medlip nge baley e fit tolngin. 17 Ma p’ebugul fagal duga’ e ke nunuwnag ko chen ni kan lifith ni bod e nug 18 nge ya’an l’agruw thal i wom’ngin e pomegranate nni ngongliy ko bronze.

19 Fagal yang i n’en nni ngongliy e ni fal’eg ni bod ya’an e floras ni lily, ma nel’ e fit tolngin, 20 me tay nga daken bangi ban’en nib lulbuy ni bay nga daken fare nunuw ni chen. Ma 200 e ya’an i wom’ngin e pomegranate ni l’agruw thal nib liyeg reb nge reb fa galyang i n’en ni bod ya’an e floras ni lily.

21 Me tay Huram e gal ley i duga’ ni bronze ney u mit e mab ko fare Tempel: bin ni bay nga ba’ ni yimuch e fithingan e Jakin† JAKIN: Re ngachal ney ni Hebrew e gowa fare bugithin ni “Ir e fal’eg rogon.” ma bin bay ko lel’och e fithingan e Boaz.‡ BOAZ: Re ngachal ney ni Hebrew e gowa fare bugithin ni “u gelingin Got.” 22 Ma fagal yang i n’en nni ngongliy ni bod ya’an e floras ni lily e bay u p’ebugul fagal duga’.

Ma aram me lebug e maruwel ko duga’.

23 Me ngongliy Huram ba teang nib lulbuy ko wasey ni bronze, ni medlip nge baley e fit tom’arngin, ma ragag nge lal e fit ga’ngin radan u barba’ nga barba’, ma aningeg i ragag nge lal e fit ga’ngin lukngun. 24 Ma mirichren e re teang nem e ke nunuwnag ko gourd nib bronze, ni kan ngongliy nib peth ko fare teng. 25 Re teang ney e bay u daken keru’ ragag nge l’agruw i ya’an e garbaw ni pumo’on nib bronze ni yad ba sap nga orel, ra dalip i yad ma ta’bang e yad ba sap ngay. 26 Ma re teang nem e dalip e inch duba’gin. Ma merichlen e bod mirichlen ba kap, nib bug nga wuru’ ni bod ba floras ni lily nike puf. Re teang ney e ra sug ma gonap’an e 10,000 e galon.

27 Miki ngongliy Huram ragag i cart ni bronze; ra reb ma nel’ e fit n’umngin, ma nel’ e fit radan, ma aningeg nge baley e fit tolngin. 28 Ni ngongliy e pin’ey nga yungi palang ni ta’reb n’umngin nga radan, ni chamay nga ta’bang, 29 ni bay ya’an e layon, nge garbaw ni pumo’on, nge kerubim riy; mu daken ngu tanggin fapi layon nge garbaw ni pumo’on e bay ya’an bogi ban’en riy nib chichiygog. 30 Ra reb fapi cart ma bay aningeg e tayapyap riy ni bronze ma kub bronze e axles riy. Aningeg i tabthung nem e bay e wasey riy ni bronze ni tagil’ e dabiy; ma pi tagil’ nem e kan nununag nga ya’an bogi ban’en nib chichigog. 31 Bay ban’en ni bod bbachel nib ga’ u daken ni fen fare dabiy. N’umngin ngalang e ragag nge meruk e inch nib tolang ko fare cart ma medlip inch nga but’ nga langgin fare cart. Ma bay ya’an bogi ban’en ni kan ker ngay nib liyeg. 32 Fapi tayapyap riy e ra reb ma rliw’ nge lal e inch tolngin u but’; ni bay nga tanggin fapi cart, ma fapi axles nib bronze e peth ko fapi cart. 33 Fapi tayapyap e bod ay e chariot; pi axles, nge pi rim riy, nge pi spoke riy, nge lukngun e pi tayapyap nem e go’ gubin mab bronze. 34 Ra reb fapi cart ma bay aningeg e rumog ni gelngin u tabthungen u but’, nib peth ngay. 35 Ra reb fapi cart ma bay bangi ban’en ni mereb e inch radan nike liyeg marichlen; ma fapi rumog ni gelngin nge yuyang i palang riy e ba peth ko fare cart. 36 Fapi rumog nge yungi palang riy e kan nunuwnag nga ya’an e kerubim, nge layon, nge gek’iy ni palm, u gubin yang ni bay tagil’ e pin’em riy, ma kun tay ya’an bogi ban’en ngay nib chichiygog nib liyeg. 37 Ere irera’ rogon nni ngongliy fapi cart; gubin ni yi go’ ta’reb rogon, ni ta’reb ga’ngin nge rogon ya’an.

38 Miki ngongliy Huram ragag raba’ i dabiy, nra barba’ ma fen reb e cart. Ra barba’ e dabiy ma nel’ e fit u barba’ nga barba’ u langgin mra taw 200 e galon ngay. 2 Kro 4:6; 5:1 39 Me tay lal fapi cart nga ba’ ni yimuch fare Tempel, ma lal ni kabay e tay nga ba’ nlel’och riy; me tay fare teng ko tabthung u yimuch ni ngek.

40-45 Miki ngongliy Huram e pi th’ib, nge pi sebel, nge yochi dabiy. Me mu’nag urngin e maruwel rok ni fan ngak Solomon ni Pilung ko fare Tempel rok SOMOL. Ba’aray e pin’en ni ngongliy:

Urngin e pi talin e maruwel ney u lan e Tempel, ni ngongliy Huram ni fen Solomon ni Pilung, e ngongliy ko wasey ni bronze ni kan gichiy ke mat ra’en. 46 En ni pilung e tay e pin’ey ngan ngongliy u thilin yu Sukkoth ngu Zarethan, u lan fare Loway ni Jordan. 47 De yog Solomon ni ngan thabthabelnag e pin’ey nib bronze, ni bochan e kay gi yo’or, ma aram e de yag ni ngan nang tomalngin e pin’ey.

48 Miki yog Solomon ni ngan ngongliy gathon fare Tempel nib gol: ni aram fare altar, fare table ni fen e flowa ni yima pi’ ngak Got, 49 fa ragag i tagil’ e magal ni bay u mit fa Gin Th’abi Thothup, ni lal u ba’ ni yimuch ma lal u ba’ ni lel’och; pi flores, magal nge pin’en ni yima fek e nifiy ngay; 50 pi kap, nge fen e mthang nifiy, yu raba’ i dabiy, yu raba’ i pilet ni fen e incense, nge yu raba’ i ban’en ni yima fek e acheffin u langgin; nge bogi inch ni fen e mab ko fa Gin Th’abi Thothup nge fapi mab nga wean ko fare Tempel. Urngin e pin’ey e ni ngongliy ko gol.

51 Nap’an ni mu’nag Solomon ni Pilung urngin e maruwel ko fare Tempel, me tay ngalan fapi senggil ni tafen e chugum urngin e tin nike ognag e chitamngin i David ngak SOMOL— silber, gol nge ku boch ban’en.