1 Ba’aray boch e pi’in owchen Judah: Perez, Hezron, Karmi, Hur, nge Shobal. 2 I Shobal e chitamngin Reayah, ni aram e chitamngin Jahath, ni chitamngin Ahumai nge Lahad, ni yad e pi chitamngin e pi girdi’ ni ur pired u lan yu Zorah.

3-4 I Hur e bin nganni’ e pumo’on u fak Kaleb nge Efrathah, ma pi’in owchen e ra sunmiyed fare binaw nu Bethlehem. I Hur e dalip e pagel ni fak: ni Etam, Penuel nge Ezer. Me Etam e dalip e pagel ni fak, ni Jezreel, Ishma, Idbush, nge reb e bpin ni Hazzelelponi fithingan. Penuel e sunmiy e binaw nu Gedor, me Ezer e sunmiy yu Hushah.

5 Me Ashhur e ir e sunmiy fachi binaw nu Tekoa, ma bay le’engin ni l’agruw, i Helah nge Naarah. 6 Me ir nge Naarah e bay aningeg i pagel ni fakrow: Ahuzzam, Hefer, Temeni, nge Haahashtari. 7 Me Ashhur nge Helah e dalip e pagel ni fakrow: Zereth, Izhar, nge Ethnan.

8 I Koz e ir chitamngin Anub nge Zobebah, ma ir e chitamngin fa yuke girdi’ ni yib rok Aharhel nib mo’on ni fak Harum.

9 Immoy be’ nib mo’on ni Jabez fithingan, ni ir e yima tayfan u lan e tabnaw rok. I pi’ e chitiningin e re ngachal nem ngak ni Jabez,* JABEZ: Re ngachal ney ni Hebrew e gowa fare bugithin ni “amith.” ni bochan e rib gel amthun e gargel ni tay rok. 10 Machane me meybil Jabez ngak fare Got nu Israel ni ga’ar, “Got mu tow’ath nigeg, ngam ga’nag e gin tafnag. Mu par rog nga mu yororiyeg ko kireb nge dabi kar amith ngog.” Me pi’ Got ngak e tin ni meybilnag.

11 I Kaleb nib mo’on ni walagen Shuhah e bay ba pagel ni fak ni Mehir fithingan. Me Mehir e chitamngin Eshton, 12 ni bay dalip i pagel ni fak: Bethrafa, Paseah, nge Tehinnah. I Tehinnah e ir e sunmiy fare binaw nu Nahash. Pi’in owchen e pi pumo’on ney e urpired u Rekah.

13 Me Kenaz e bay l’agruw i pagel ni fak, ni Othniel nge Serayah. I Othniel e bay l’agruw i pagel ni fak ni Hathath nge Meonothai. 14 Me Meonothai e chitamngin Ofrah.

Me Serayah e chitamngin Joab, ni ir e sunmeg fare Loway ko Salap ko Maruwel, gin’em e gubin e girdi’ riy ma go’ yad ba salap ko maruwel.

15 Me Kaleb nib mo’on ni fak Jefunneh e bay dalip i pagel ni fak: Iru, Elah, nge Naam. Me Elah e chitamngin Kenaz.

16 Jahallelel e bay aningeg i pagel ni fak: Zif, Zifah, Tiria, nge Asarel.

17-18 Ezrah e bay aningeg e pagel ni fak: Jether, Mered, Efer, nge Jalon. Mered e le’engiy i Bithiah, ni be’ ni bpin ni fak e pilung nu Egypt, miyow diyennag bochi pin ni Miriam, nge l’agruw i pagel, ni Shammai nge Ishbah. Ishbah e sunmiy fachi binaw nu Eshtemoa. I Mered e ki le’engiy reb e bpin ko ganong nu Judah, ngar fakyew dalip e pagel: Jered, ni ir e sunmiy fachi binaw nu Gedor; nge Heber, ni ir e sunmiy fachi binaw nu Soko; nge Jekuthiel, ni ir e sunmiy fichi binaw nu Zanoah.

19 Hodiah e le’engiy be’ ni bpin ni walagen Naham. Pi’in owcherow e sum fare ke girdi’ ko Garm riy, ni ur pired ko fachi binaw nu Keilah, nge fare ke girdi’ ko Maakath, ni urpired ko fachi binaw nu Eshtemoa.

20 Me Shimon e bay aningeg i pagel ni fak: ni Amnon, Rinnah, Benhanan, nge Tilon.

Me Ishi e bay l’agruw i pagel ni fak: i Zoheth nge Benzoheth.

21 I Shelah e reb e pagel ni fak Judah. Pi’in owchen nib mu’un Er ngay, ni fa cha’ ni sunmeg fachi binaw nu Lekah; nge Ladah ni sunmeg fachi binaw nu Mareshah; ni fare ke girdi’ ni talifith e mad ni wech, ni yad ma par u lan fachi binaw nu Beth Ashbea; 22 I Jokim nge girdi’ ni ur pired u lan fachi binaw nu Kozeba; nge Joash nge Saraf nra le’engiyew e ppin nu Moab ma aram miyow par u Bethlehem. (Pi yalen ney e kari kakrom.) 23 Yad girdi’en e mongongol th’ib ko pigpig ni yad ma tay ngak e en ni pilung ni ur pired u lan fa gal chi binaw nu Netaim ngu Gederah.

24 I Simeon e bay lal i pagel ni fak: Nemuel, Jamin, Jarib, Zerah, nge Shaul. 25 I Shaul e chitamngin Shallum, ma Shallum e chitamngin Mibsam, ni chitamngin Mishma. 26 Ma aram u rom rok Mishma e tabab e re um i girdi’ nem riy nge mada’ ngak Hammuel, nge Zakkur, nge Shimei. 27 I Shimei e bay ragag nge nel e pagel ni fak nge nel’ e ppin, machane pi girdi’en e bochu’uw pifakrad, ere fare ganong rok Simeon e de yo’or ni bod feni yo’or e birok Judah e ganong.

28 U m’on ko ngiyal’ ni gagiyeg David ni Pilung ma fa pi’in owchen Simeon e ur pired ko yochi binaw ni ba’aray: Beersheba, Moladah, Hazarshual, 29 Bilhah, Ezem, Tolad, 30 Bethuel, Hormah, Ziklag, 31 Beth Markaboth, Hazarsusim, Bethbiri, nge Shaaraim. 32 Ma ku ba’aray lal e binaw ni ku ur pired riy: Etam, Ain, Rimmon, Token, ngu Ashan, 33 nge yochi binaw nib liyeg e pi binaw ney i yan ngalan e yimuch ni ngal nge mada’ ko fare binaw nu Baalath. Irera’ babyoren e pi tabnaw rorad nge pi yungi n’en ni ur pired riy ni ur cha’ariyed.

34-38 Ba’aray e pi pumo’on ni immoy ni lolgen e yuke girdi’ rorad ney:

Bochan e girdi’en e tabnaew rorad e ke tabab ni nge yo’or i yan, 39 miyad wear i yan ngalan e ngal ngar chugurgad nga Gerar mu ur chugliyed e saf rorad u ba’ ni ngek ko fare loway ni bay e re binaw nem riy. 40 Miyad pir’eg nib yo’or e tin nib dammal nra kay e pi saf rorad u rom u lan bang i tafelfel’ nib mocha’ ma ba gapas. Girdi’ ko Hamite e ur pired u rom ko som’on.

41 Nap’an ni Hezekiah e pilung nu Judah me yan fapi pumo’on ni kanog fithingrad aram ko som’on nga Gerar ngar gathayed e pi tent nge yochi naun ko girdi’ nma par u rom. Miyad tuluf e girdi’ u rom nge mangyad e ra tafned ni bochan e ba yo’or e pan riy ni ngi i kay e pi saf rorad. 42 Ma lal mir’ay e girdi’ ko ganong rok Simeon nranod ko ngek nga Edom. Pi pumo’on ni pifak Ishi e yad e ur gafaliyed e pi girdi’ nem: Pelatiah, Neariah, Refayah, nge Uzziel. 43 Mu rom e ra li’ed nge yim’ e pi Amalekite ni kabfos, ma ka aram nap’an e ra pired u rom.