1 Ẽkĩa Pablo ẽ mia kirika kenexõ fomai. Epa Niospa fichipaiyai keskafakĩ Cristo Jesús ea katoni aõnoa ãfe meka shara ẽ yoifofãsafanõ. Ea yoini iskafakĩ: “Keyokõi yorafo yoife iskafakĩ: ‘Jesucristo matoõnoax nãxoni mãto chaka mato soaxoxiki nã chanĩmara faafo tii afe nĩpaxanõfo,’ ixõ ato yoife nã ẽ mia yoiai keskafafe,” ixõ Jesús ea yoini. 2 Timoteoshta, ẽ mĩo noikĩ ẽ mia kirika kenexõ fomai mĩ tãpinõ. Epa Nios nõko Ifo Cristo Jesús feta mia noikĩ mia shara famanõfo. Askatari mĩ shinã mẽra mia shinãmasharakõinõfo mĩ õiti fekaxtenõma.

3 A ẽfe xinifãfe Epa Nios yonoxosharapaonifo keskari fakĩ, ẽri a yonoxosharai. Ẽ mẽraxõ ẽ afaa shinãchakayamafai ẽ yonoxosharai. Nãskakẽ ẽ mia Nios kĩfixõfafãini aicho fakĩ. Pena tii yafi fakish tii ẽ mia Nios kĩfixõfafãini. 4 Nãskakẽ mẽ oaino, mĩ ea shinãi oiaito ẽ mia õiferani. Nãskakẽ ẽ anã mia õisharapai, mia õi ẽ inimasharakõixiki. 5 Taefakĩkõi mĩ chichi Loida Jesús Ifofani. Askata mĩ efa Euniceri Jesús Ifofani. Afãfe Ifofasharakõimisfo keskafakĩ, mĩri Ifofasharai. Mẽ mia tãpia mĩ Ifofasharakõiaito nãskakẽ ẽ mia yoi.

6 Anã shinãmakiyamafe ẽ mia mãmãxõ ẽ mia Nios kĩfixoni. Nãskakẽ Niospa mia katoni Jesús yoimis mĩ inõ. Mã chii nokakẽ nõ anã xofisa fatiro anã xofisanõ. Nãskarifiakĩ mĩ anã yorafo ato yoipaima mã mĩ xokenãifinaxõ askara meekĩ mĩ Nios kĩfitiro anã mia õiti fepeaxosharanõ, mĩ anã ato yoisharanõ inimayanã a mĩ taefakĩ ato yoini keskafakĩ. 7 Nãskakẽ Niospa Yõshi Sharapa noko yorafoki mesematama. Aõxõ afama mĩshti noko amatiro. Askatari noko ato noimasharai. Aõxori noko shinãmasharatiro anã nõ chakafanõma. 8 Askafai rãfiyamafe Jesúsnoa yorafo yoitaifãfe rãfikima. Askatari eõri rãfiyamafe. Ẽ Jesucristo ato yoirifaito ea karaxa mẽra ikimatifoki. Mĩri Jesús ato tãpimasharafe; mĩ askaito, miari omiskõimanaifono rateyamafe. Jesúsnoax mĩ omiskõiaito, Niospa mia axoxii. 9 Akka Niospa ãfe Fake Cristo Jesús noko nĩchixoni nokoõnoax nãxoyonõ nõko chaka noko soaxoxiki. Askaxõ noko shinãni afe yora nõ inõ. Nõ yora chakafofiakẽ Niospa noko noimis. Taefakĩkõi Niospa mai onifaxoma, a inõpokoai tãpixõ, noko shinãni noko ifixixakĩ Jesúsxõ. 10 Jesús noko ano oamatai Niospa noko ifipaiyai anori nõ tãpipaonima. Akka rama iskaratĩa mã nõ tãpia noko ifimis Jesucristo noko nãxoni. Nãskax iskaratĩari nõ nai, nõ rateima omiskõipakenakafo mẽra nõ kairoko. Nõ Nios ari kaax anã nõ naxima. Jesús noko chaka soaxonano nõ Nios ari nĩpanaka. Mã iskaratĩa nõ tãpia Jesús noko nãxoni nõ chiifã mẽra kanõma noko ifiano.

11 Niospa ea katoni na meka shara Cristoõnoa yora fetsafo ẽ ato tãpimanõ. 12 Nãskakẽ ẽ karaxa mẽranoax Cristoõnoax omiskõifi ẽ rãfima. Ẽ Jesús tãpikõiax chanĩmara fayanã. Jesús ẽfe chaka taefakĩ ea soaxonitĩa ẽ Epa Nios iskafakĩ yoini: “Epa Niosi, ea kexesharapakexafe Jesús afianã oaitĩa,” ixõ ẽ yoini keskara ea axoxii ẽ chanĩmara fakõini.

13 Na ẽ Cristo Jesúsnoa mia chanĩmakõi tãpimana shinãmakiyamafe. Ẽ mia mẽstekõi tãpimana keskafakĩ, nãskari fakĩ ato tãpimafe. Cristo Jesús chanĩmara fakĩ afe rafekĩ aõxõ yorafo noife mĩ afe rafeakĩ. 14 Nã ẽ mia yoia keskara mĩ mẽraxõ shinãfe, shinãmakixikima. Ãfe Yõshi Shara mĩ mẽra ikano mefeta aki. Õifãi, Niospa mia yoia keskafakĩ kachikiri fayamafe.

15 Mã mĩ tãpia keyokõichi chanĩmara faafo Asia mai anoafãfe ea õifainafo. Askatari ato feta Figelo feta Hermógenesri ea õifainafo ato fe fokãkĩ. 16-17 Akka Onesíforokai askanima, eõ rãfinima ẽ karaxa mẽra ikikẽ. Nãafi Roma ano nokoxõ pena tii ea fenafafãikĩ ea karaxa mẽranoa fichita, ea õiyoi nã otitaiapaoni mẽxotaima ea õifaa õifakĩ, ea pishta inimamani. Nãskakẽ nõko Ifãfe Onesíforo ãfe ãfinõ ãfe fakefonõ Efeso anoxõ ato noikĩ ato kexesharaxonõ. 18 Onesíforo Efeso anoxori ea yonosharaxopaoni, mĩfi a õixõ tãpisharakĩ. Jesucristo anã fotoxõ noko ichanãfaxõ Onesíforoki inimakõikĩ noikĩ axosharaino ẽ askara fichipai.