1 Ẽkĩa Juan, ẽ mato kirika kenexõ fomai mã tãpinõ. Jesucristo ẽ õimisxaki ẽ mato yoi mãri mã tãpisharanõ. Nã Jesucristo nõko Ifokõi tae fenakõi Nios fe iyopaonixakĩ. Akka Niospa afama mĩshti onifamatai afe iyopaonixakĩ, chipo nãmã fotoxõ noko yoiaito nõ nikamis. Oa yorakõi keskara nõ õimis. Mã õikĩ feyafaxõ nõ ramãti nõko mĩfi. Nãskakẽ noko yoiaito nikayamexakĩ ẽ mato yoi, noko imasharanõ nõ afe ĩpaxanõ. 2 Apa Nios ariax nokoki Jesús fotoni. Fotokẽ nõ õikĩ feyafani. Nãfi afeskapishta nakama, nãfi nĩpanakakĩ. Apa Nios fe ikatsaxakĩ nokoki fotoni. Nãskakẽ nã nõ õia keskara nõ mato yoi. 3 Nõ õipaonixakĩ nõ mato yoi noko yoiaito ãfe meka. Nãskakẽ nofe rafexõ nã nõ shinãi keskarari mãri mã shinãtiro. Nios feta ãfe Fake Jesucristo shinãi keskafakĩ nõri anori nõ shinãi, nõ ato fe rafekõitiro. 4 Nãskakẽ ẽ mato kirika kenexõ fomai nã kirika kene õiax mã inimakõinõ.

5 Akka noko Cristo yoiai, anori ẽ mato yoinõ. “Oa xinĩ chai chaxaino fakishtiroma keskara, xafakĩakõi Nios ika. Afaa chaka afe rafemisma,” ixõ Cristo noko yoimis. 6 Akka anorima shinãi yora fetsafo iskakani: “Ẽ Nios fe rafea,” ifiaxõ a Niospa yoiai anori shinãima ãa chanĩ anorima yoi. Ãfe õiti sharama xafakĩakõi ikama, fakish keskara a Niospa yoiai anori shinãyamafi. 7 Nios xafakĩakõi ikakĩ, afaa pishta chakafamisma. Ãfe õiti mẽra oa fakish keskarama, xafakĩa sharakõi ika. Akka nõri afe rafekõixõ, nõ ãfe meka nõ mẽra nanekõixõ, Niospa shinãi keskafakĩ nõri nõ shinãtiro. Nõ askara shinãx, nã Ifofaafo fe nõ ato fe rafetiro. Nãskax nõ xafakĩakõi nitiro, Niospa Fake Jesúsmãi noko nãxonikẽ. Ãfe imĩ nõko chaka noko soaxõfafãini keyokõi.

8 Akka nõ yoikĩ iskafamis: “Ẽ afaa chakafamisma,” ifiax nõa nõ pãramemis. Nãskax nõa nõ chanĩkõimis. Nõko õiti mẽra Niospa meka naneama. 9 Akka nõ afara chakafaxõ nõko chaka nõ soapaikĩ, nõ Nios yoiaito nõko chaka noko soaxotiro. Keyokõi noko soaxotiro noko raefakĩ, Niosmãi mẽstekõi isharakõixõ. 10 Niospa yoimis: “Keyokõi yorafãfe chakafamisfo,” noko famis yoikõikĩ. Noko askafafiaino, “Ẽkai afaa pishta chakafamisma, ẽ chaka shinãima,” ixõ yoikĩ nõ Nios chanĩmara faima, “Ãa chanĩra,” nõ Nios fai. Nãskakẽ ãfe meka nõko õiti mẽra naneima.