Matyu
Matyu Re Basrasem Tuma Yenbo.
Kiyi late tuma.
Siglow eis rem Jisas re nowselke temenen nenbem wos tuma basrastene. Matyu Re Basrasem Tuma Yenbo et temnas yi siglow.
Matyu Re Basrasem Tuma Yenbo et God re nowselri tatame remne heyar nenbo tuma. Jisas Krais, God Reri Yen, re God reri kwom mesegenen nowselke yam, re more tame tem. Aboyei tatame rem God eterri Wule nenlaweyem, eker Jisas re Juda tatamekene agerbo tatamekene remne kwobo late yam. Matyu re etop basrasem.
Kiyisape God re Eterri Tuma wesowbem tame remne op wem. Yuri an tame wuri weraste, re kemne kwobo late. Re kemri keryen yen tete, re kemne heyar lakerete. Tuma wesow tame rem op metem, rem etop basrasem. Yuri Jisas re yam, re God Eterri Tuma heyar wesowbem, re God eterri wule heyar peterabem. Etop nenbem, Matyu re lam, re gwor siglow basrasem.
Juda tatame rem Israel nowselke tetane. Remri yeiwarege et Abrahamkene Moseskene nugwape agerbo tame mere. Jisas re God eterri kwom mesegenen Israel nowselke yam. Re Juda tame tem. Jisas rene nawo te wurem tuma, tame wuri re rene okke tirmunem tuma, re God Eterri Tuma wesowbem tuma, re sikanuma tatame remne heyarbem tuma, tatame rem rene pen sam tuma, re sele mei mesegenen sene wayen sim tuma, yuri tete wos tuma gwor siglowke basrastene.
Gwor siglow basrasem tame re reri sig be wem. Tame rem habom, Jisas reri anepoi tame, Matyu, re basrasem, etopkap gwor siglow reri sig et Matyu Re Basrasem Tuma.
Jisas re nowselke yam.
1
(Sapta 1:1—4:16)
Jisas Krais eterri yeiwarege sig.
(Luk 3:23-38)
1 Jisas Krais eterri yeiwarege sig gwor. Jisas re Devit eterri beig. Devit re Abraham eterri beig.
2 Abraham re Aisak eterri ha.
Aisak re Jekop eterri ha.
Jekop re Juda eterri lake masekene remri ha.
3 Juda re Pereskene Serakene etepri ha. Nawot teri sig Tamar.
Peres re Hesron eterri ha.
Hesron re Ram eterri ha.
4 Ram re Aminadap eterri ha.
Aminadap re Nason eterri ha.
Nason re Salmon eterri ha.
5 Salmon re Boas eterri ha. Nawot teri sig Rahap.
Boas re Obet eterri ha. Nawot teri sig Rut.
Obet re Jesi eterri ha.
6 Jesi re Keryen Yen Devit eterri ha.
Devit re Solomon eterri ha. Nawo te kiyi Uria eterri ta.
7 Solomon re Rehoboam eterri ha.
Rehoboam re Abiya eterri ha.
Abiya re Asa eterri ha.
8 Asa re Jehosafat eterri ha.
Jehosafat re Jehoram eterri ha.
Jehoram re Usia eterri ha.
9 Usia re Jotam eterri ha.
Jotam re Ahas eterri ha.
Ahas re Hesekia eterri ha.
10 Hesekia re Manase eterri ha.
Manase re Emon eterri ha.
Emon re Josaia eterri ha.
11 Josaia re Jehoiakin eterri lakemasekene etemri ha. Er yabel Babilon nowselri tame rem Israel tatame remkene nayem. Babilon tatame rem Israel tatame remne panen yin rem Babilonke yin temenem.
12 Babilonke temenem,
Jehoiakin re Sealtiel eterri ha.
Sealtiel re Serubabel eterri ha.
13 Serubabel re Abiut eterri ha.
Abiut re Eliakim eterri ha.
Eliakim re Asor eterri ha.
14 Asor re Sadok eterri ha.
Sadok re Akim eterri ha.
Akim re Eliut eterri ha.
15 Eliut re Eleasar eterri ha.
Eleasar re Matan eterri ha.
Matan re Jekop eterri ha.
16 Jekop re Josep eterri ha.
Josep re Maria etetri tame.
17 Abraham eterri beig rem letpeis tewo eis kerem, Devit re ek tem. Devit eterri beig rem letpeis tewo eis kerem, rem Babilon nowselke yin tem. Rem beig letpeis tewo eis kerem, Krais re ek tem.
Maria te Jisas Krais rene wurem.
(Luk 2:1-7)
18 Jisas Krais rene nawo te wuremkap tuma re gwopkap. Reri nawo Maria tene rem Josep rene get wemenem. Rep be wuri net wuri akemenem, Maria te yen se lam. Yen re God Eterri Wowri yen. 19 Teri get wemenem tame, Josep, re tame yenbo. Re metem, te yenkene temenem, re agerbo tatame remne be wesowem. Eterri wuribaike re op habom. An tene be panete, opkap an tene pelebitete. Sene re op habom. An tatame remri lek etop nente, te sebera yate. Sene re habolaweyem, re opkap be nente. 20 Josep re som habobem, re nugsi tuknalam. God reri kwomri tame wuri re rene lasyam. Re op wem. Josep, ne Devit eterri beig. Maria tene ne panete. Ne kap akte. Ne met. Teri sek tetane yen, re God Eterri Wowri yen. 21 Te tauryen wurte tetane. Ne reri sig Jisas wete. Re tatame remri wule yaper poten septin re remne potte. Op wem.
22 Er tem wos er Keryen Yen God Reri Tuma wesowbem tame re kiyi bupo me wem. Reri op wem tuma, et tuma re yuri sekenek tem. Tuma wesowbem tame re op wem. 23 Muyensi yen ta wuri, tame be yitene ta, te yen panete, te tauryen wurte. Rene tete sig et Emanuel. Er sig reri tobo et God re neremkene tetane. Re etop wen basrasem. Reri basrasemkap, Maria te Jisas rene etop wurem.
24 Josep re nugsi tuknalamke, re sene wayen sin God reri kwomri tame re rene wem tuma re etop nenem. Re et ta tene panem. 25 Rep be wuri net wuri akemenem, te er yen ek wurem. Te tauryen wurem, rem rene sig tem. Tem sig et Jisas.