Geregerena Paul Fala Filemon
Filemon 'i lia na te wale Kristin ala falua ba'ela 'i Kolose. 'E lio malaa Paul 'e gerea geregerena 'e fala Filemon, ala talasi 'e gerea lou na geregerena fala alae ioli 'i Kolose. Ma Paul ka gerea geregerena 'e talasi 'e io 'i laola rara 'i Rom ai. Ioli galo ulafu (slave) lia 'e malaa na me 'are mola 'ala fali galogalo 'ala ioli 'e too ala, malaa mola lou 'ala buluka fali galogalo gi.
Paul 'e alaa sulia te wale galo ulafu (slave) Onesimus lia 'e tafi lo faasia Filemon. Filemon 'e too ala Onesimus. Wale galo ulafu 'e Onesimus 'e dao ala lifi Paul 'e io 'i laola rara ai. Ma ka iko 'ali tekwa mola Onesimus ka tatae mae ka Kristin 'oka lo. Talasi Paul 'e gerea geregerena 'e ka sui lo, ka olifailia Onesimus fala 'i soela wale ba'ela lia Filemon. Ma Paul ka kwaianitae fala Filemon 'ali ka kwailufa lo ala Onesimus fafia 'are ta 'e taua. Ala saena Grik li, ratala Onesimus fadanai “Wale li Galona Kwairanai”.
'Are 'ilitoa 'i laola buka 'e li:
Soi alafe na Paul gi fala Filemon (1-3)
Paul alaa sulia Onesimus fala Filemon (4-22)
Soi alafe na fafu'isi gi failia foana (23-25)
1
1 'I lau Paul, lau io 'i laola raraa 'i fofola galona lau fala Jesus Christ. Mera Timoti wai asila gia 'i laola fakwalaimokina li, mera kwatea ko soi lafe na 'ameroa gi famu Filemon, wale kwaima 'ameroa lia 'o galo ruru fae 'ameroa. 2 Ma mera ka kwatea lou soi lafe na gi fala ioli fakwalaimoki ala Jesus Christ gi lia gera kae logo logo mae 'i luma 'o, failia gelifae gia ala Christ, Afia, ma Arkipus wale 'e ura fala faronona 'oka fae 'ameroa. 3 Lau foa 'ali God Mama gia failia Aofia Jesus Christ kae kwatea kwai'ofena failia aroarona famiu.
Kwaimanaa failia fitoona Filemon
4 Filemon, ala talasi lau foa famu gi sui, lau batafea God lau, 5 sulia lau ronoa kwaimanaa 'o fala ioli God gi li sui, failia fitoona 'o ala Jesus Aofia. 6 Lau foa 'ali 'ado kwaimana 'e 'amu taua failia nali ioli gera fakwalaimoki gi kae ba'ela lou, sulia gia io lo ala Christ. 7 Walefae lau, 'o kwaima ma ko fababalafea ioli God gi sui 'i lifila. 'Are fo 'e kwate ma laka babalafe rasua ma ka fababatoo lau rasua lou!
Sugaana Paul fala Onesimus
8-9 Sulia 'e 'urifo, lau suga 'o fala me 'are 'e totolia ko taua. Wasua laka too ala nanata na Jesus 'e kwatea fagu fala suunaili namu fala me 'are 'e, ikoso 'ali lau tau mola 'urila. Lau suga 'o 'i fofola lau kwaima amu. 'I lau Paul, wale waro 'e lau io 'i laola raraa 'i fofola galonagu fala Jesus Christ, 10 lau suga 'o 'i osiala Onesimus, wale li galona ulafu 'o, lia ba 'e tafi fa'asi 'o. Lau oga ko kwailufa lo ala. 'I lia 'e malaa lo wela lau sulia talasi lau io 'i laola raraa li, lau ranaa ma ka fakwalaimoki. 11 Ala talasi sui gi, Onesimus me 'are gwaugwau mola 'ala famu sulia 'e tafi, wasua ma ala talasi 'e 'i lia 'e rana 'o lo ma 'i lau lou.
12 Wasua lau kwaima rasua ala Onesimus, lakae olifailia lo ko 'i soemu. 13 Lau io 'i laola raraa, 'i dunala 'okanala Faronona 'Oka. Ma laka oga 'ali Onesimus ka io ga 'ala 'i lifi'e 'i soegu talasi 'e, 'ali ka rana lau olisi 'o. 14 Ka 'urifo wasua 'ala, iko 'ali lau suunailia lou 'ali ko rana lau, lau oga mola 'ali 'o tau sulia liomu 'i talamu. Ma ikoso 'ali lau taua ta 'are, ala ikoso 'o alafafia.
15 Mala Onesimus 'e la ka io tatau fa'asi 'o ala keme talasi dodoko 'ali ma kae io tekwa fae 'o ala talasi 'e ka la 'alaa. 16 Ma talasi 'e, 'i lia iko lou ta ioli galona ulafu mola 'ala, ma 'e liufia lo wale li galona ulafu. 'I lia walefae 'oka gia ala Jesus Christ lo. Fagu, 'i lia kwaima 'ato lau, ma famu Filemon, 'e liufi lau lou sulia 'i lia wale galona ulafu 'o ma 'i lia walefae 'o lou ala Aofia.
17 'O kwaloa Onesimus ka malaa lou lia 'o kwalo lau, dunala 'o lio ba'ela agu, 'i lau wale 'e gora galo kwaima 'ala Aofia li. 18 Ma ala ka taua ta 'are 'e rero amu 'o ma ka sake lana ala ta 'are fa'asi 'o, 'o alua 'amua fafi lau 'ali laka duua lo ko 'agua famu. 19 Lau gerea ko geregerena 'e 'alia limagu 'i talagu 'uri 'e, “'I lau Paul lakae duua famu taa 'i lia 'e sake lana ai.” (Wasua ma ikoso bulono lia sake lanana 'o faasi lau 'e ba'ela rasua, sulia lau rana 'o fala fakwalaimokina ala Jesus Christ.) 20 Lia fo, walefae 'oka lau ala Christ, lau oga ko rana lau ala me 'are 'e, sulia kwaimana gora ala Aofia li. Koe fababalafe lau mae ala koe taua me 'are 'e fagu!
21 Ala talasi 'e lau geregere ko ai, lau saiai koe taua mola 'amua ta 'are laka suga 'o ko fai, ma lau saiai koe taua mola 'amua ta 'are 'e ba'ela ka liufia 'are 'e lau suga 'o fai. 22 Ma ko rerei lou 'alia ta tobi fagu, sulia lau saiai God kae kwatea sui 'are ba 'amu sugada gi 'alia foana li, ma ka olifae lau ko 'i soemiu faasia rara.
Alaana fafu'isi gi
23 Ma Epafras, lia 'e io lou fae lau 'i laola raraa dunala 'e galo fala Jesus Christ, 'e kwatea ko soi lafe na lia gi famu. 24 Ma Mark, Aristakus, Demas, ma Luke, wale galo kwaima lau gi, gera kwatea lou soi lafe na gera gi famu.
25 Lau foa 'ali kwai'ofena Jesus Christ Aofia ka io fae 'amiu sui.