1 Gwo jin ’ceenu goma Yesus Ḵrisṯẖos mo, a’di jin c̱ikin ma Arumgimis a’di mo mmoṯor unim piti kun ta imanmii to mo gom to kun mini mii la bu’th embul mo mo. Dhali a’di karki a’di eya tente/ mo mmohashkina a’di aman’doyu gwom piti mo eya manmii tom piti jin ta’da Yohaan mo, 2 a’di jin ta’da manḵal gwo o mo gom gwo ma Arumgimis mo dhali gwonṯor jin ṯora a’di goma Yesus Ḵrisṯẖos mo, isi kani ma eya ris to ’baar mo kun p̱arkina a’di e mo be. 3 Mom’bor mii gom a’di jin deŋki gwo yansan e mo jin onu is ki ’twa/ jin caaca mo dhali mom’bor mii gom uni gwansan kun ciḵki a’di mo dhali uni gun dhuki a’di jin ’kwarkunu nycine/ mo haali/ mo ’disha’dish mo be.

4 Yohaan eya ḵaniisa kun ’koni pesu/ mo e Pa Asiyya mo:

A’the e um mo dhali moŋḵu’th is ’peni a’di jin di’d mo dhali a’di jin diki’d mo dhali a’di jin midi p̱u’du/ mo dhali ’peni shi/in kun ’koni pesu/ mo, uni gun doshkini bwambor ma ḵursi ma maliḵ piti mo be. 5 Dhali ’pena Yesus Ḵrisṯẖos, a’di jin ta isiŋ gana/ gi gwo jin onu mo, a’di jin ta’da bwanyara/ gi mowu mo dhali ta tap̱a ap̱o/ imaliḵ kun ’koni mony’cesh mo.

E a’di, a’di jin enki ana mo dhali dhu ana ki ’kus mo ’peni miinthus bana mo ka bas piti mo, 6 dhali a’di ki nyoŋ ana ki ’peŋkuman pa mo, mmota igasiis goma Arumgimis piti mo dhali Ababa mo. Dhali e a’di mo tani monyca midi di mo dhali mo jin tanu tap̱a mo gom ki sule/ mo dhali ki sule/ ya ye ’ba/ mo. Amen. 7 Hili mo mo ma. A’di midi p̱u’du/ mo e bwaaraḵ mo dhali aris eŋ ’kwani ’baar ka ’deṯe/ ’deṯe/ mini p̱ar a’di e mo, dhali aris ’kwani ’baar ka ’deṯe/ ’deṯe/ kun su’k a’di mo tani, dhali arisa waḵ gi ’kwaniny’cesh mini wol ko mo gom gway piti mo. Isi kan si’dayi. Amen.

8 Aha/ tana ja Muŋ’kup̱ mo dhali jiŋ ’Ko’d mo. A’di ta gwo jin ona Tap̱a Arumgimis mo, a’di jin di’d mo dhali a’di jin diki’d mo dhali a’di jin midi p̱u’du/ mo, a’di jin ta a’di jin Eḵa/ Eḵ mo be.

9 Aha/ jin tana Yohaan jin tana kam bum mo, aha/ jin pwaḵkina isa nyor nyaḵki um eya Yesus ki monṯo’c bwa mo dhali gom ’peŋkuman bampa/ mo dhali ki mo jin ’kuc̱u bwa ki ’kari’th mo mmo’dim ’kup̱ mo tani aha/ dikina eya uḵa ’cesh jin yuḵu gway ka Bathmus mo gom gway gi gwo ma Arumgimis mo dhali gom gwonṯor jin ṯorkika/ mo goma Yesus mo be. 10 Aha/ dikina e Shi/in mo ka tee gi Tap̱a mo dhali aha/ ciḵkina dhan ’twa/ ap̱o/ aha/ mmun me’d ko ma poome/ mo 11 mmo/o gwo mo ki: ’Kwari ma a’di jin p̱arkina /e e mo eya warka/ mo dhali hashki a’di ka ḵaniisa gun ’koni pesu/ mo e Pan Ep̱asus mo dhali e Pan Simirna mo dhali e Pam Bargaamus mo dhali e Pan Ṯẖiyatira mo dhali e Pan Sardis mo dhali e Pam P̱iladalp̱iya mo dhali e Pa Lawudikiyya mo.

12 Dhali yan’ko’d aha/ ṯu’kkina ’ban mo mmop̱ar ’twa/ yan jin oki aha/ gwo e mo, dhali ki aha/ ṯu’kkina mo tani aha/ p̱arkina ṯirkina/ ma lamba/ e mo kun ta ’dolkon gana/ mo kun ’koni pesu/ mo. 13 Dhali e bwaman gi ṯirkina/ ma lamba/ mo tani jan ṯal ’deŋ kamu/ wakina e ki Ya/ gi ’Kwani mo jin hi’thki burrinye/ jin ta gi tur mo dhali wac̱kan ’dolkon gana/ mo eya bor a’di mo. 14 ’Kup̱ piti dhala mur’kup̱ piti c̱a’b ki bany bany me’da mur ḵa’bal mo jin ta gi kush mo dhali ta gi kush me’da wasa/ mo. Dhali em piti wana e ka le’dan o’d mo. 15 Dhali sho’k piti wana e ka koroḵ jin kushi mo mo dhali dhel mo mo me’d mii jin ṯo’du a’di mo e shemen o’d jin toru a’di mo, dhali ’twam piti wana e ka dhan yi’de/ kun gwona is ka ris mo. 16 Dhali e me’da bim poros piti mo tani a’di bu’thki’da cul kun ’koni pesu/ mo. Dhali ’peni ’twam piti mo tani a’di gac̱ki gandala turga/ jin ka’d ka ’ban su/ mo dhali bwam/em piti ’twaḵki mo mo me’da tente/ mo mmo’tu’d mo ki mom’bi’th is mo be.

17 Ki aha/ p̱arkina a’di e mo tani aha/ biṯkina mo e sho’k piti mo, ma mmowa e ki wathi/ jin wuki’d mo. Hili a’di karki me’da bim poros piti ap̱o/ aha/ mo mmo/o gwo mo ki: Dhalku/ is ki ḵo/ mo. Aha/ tana ja muŋ’kup̱ mo dhali jiŋ ’ko’d mo be, 18 dhali aha/ tana jan ṯal ’de/ jin di’d ki e mo. Aha/ wukina mo dhali hili mo mo ma, aha/ dikina ki e mo gom ki sule/ sule/ ya ye ’ba/ mo dhali aha/ takina ga mup̱tha/ gi Mowu mo dhali Mo ma Haawiya mo be. 19 Shwane/ ’kwari a’di jin p̱arkina /e e mo, a’di jin di’d shwane/ mo dhali a’di jin midi bu’th mo mo i’ko’d mo be. 20 Gom gwo yansan jin c̱inu ki jim bag mo goma cul kun ’koni pesu/ mo jin p̱arkina /e e mo e me’da bim poros pem mo dhali ṯirkina/ ma lamba/ kun ’koni pesu/ mo kun ta ’dolkon gana/ mo dhali acul kun ’koni pesu/ mo tani uni ta iman’doyu gwo mo kun ’kona ḵaniisa kun ’koni pesu/ mo dhali gom ṯirkina/ ma lamba/ kun ’koni pesu/ mo goma ḵaniisa kun ’koni pesu/ mo be.