Song 41
Sikman i beten long God bai God i ken mekim em i orait gen
Devit i raitim dispela song. Em i song bilong man i bosim musik.
1 Man Snd 14.21 i save tingim ol rabisman
na i helpim ol,
dispela man i ken amamas.
Bikpela bai i helpim em
long taim hevi i kamap long em.
2 God Sng 27.12 bai i lukautim em
na strongim laip bilong em.
Bikpela bai i mekim em i stap gut
long ples bilong em.
Na bai Bikpela i no larim ol birua
i bagarapim em.
3 Taim dispela man i gat sik,
Bikpela bai i lukautim em.
Em bai i mekim orait sik bilong em,
na mekim em i kamap strong gen.
4 Tasol mi yet mi tok olsem,
“Bikpela, mi bin mekim sin
long yu.
Tasol yu ken marimari long mi,
na pinisim sik bilong mi.”
5 Ol birua bilong mi
ol i bel nogut long mi
na ol i tok,
“Mobeta em i dai kwik
na yumi ken lus tingting long em.”
6 Sampela man i kam lukim mi,
na ol i save toktok nating long mi.
Ol i laik harim tok
long mi gat sik nogut.
Na bihain ol i go ausait gen,
na long olgeta hap
ol i stori long dispela sik bilong mi.
7 Olgeta man i no laikim mi tru
ol i save tok hait
long sik bilong mi.
Ol i ting samting nogut tru
i laik bagarapim mi.
8 Ol i tok olsem,
“Samting nogut i kisim em pinis.
Em i no inap kirap gen.
Bai em i dai.”
9 Mi 2 Sml 15.12, Sng 55.12-13, 55.20, Jer 20.10, Mt 26.23, Mk 14.20, Lu 22.21, Jo 13.18 gat wanpela pren,
em i poroman tru bilong mi,
na em i save kaikai wantaim mi.
Tasol em tu i litimapim lek
bilong krungutim mi.
10 Bikpela, yu ken marimari long mi
na pinisim sik bilong mi,
na bai mi inap bekim pasin
bilong ol dispela man.
11 Sapos ol birua i no daunim mi,
bai mi ken save yu laikim mi.
12 Yu bin lukim mi i wokabaut stret,
olsem na yu lukautim mi,
na yu holim mi
klostu long yu oltaim.
13 Yumi Sng 106.48 litimapim nem bilong Bikpela,
em i God bilong ol Israel.
Na olgeta lain i kamap bihain,
ol tu i ken litimapim
nem bilong en.
I tru.
Buk 2
(Song 42-72)