1 Man Jemes one a Winaꞌam ne ti Zugsob Yesu Kiristo tumtum la sobid gbauŋ kaŋa nwa n puꞌusid Winaꞌam nidib bane widig teŋ teŋ la.

2 M baꞌabiise ne Yesu Kiristo yelaa, makir konꞌob konꞌob yaꞌa paae ya, yanam tenꞌesim li yela ka mor sumalisim; 3 ka ya miꞌ ye ya yadda niŋir makir puugin ket ka ya nyaŋe modigid. 4 Keli ka ya sumodigir nobugi kpeꞌeŋ n ti paae li ben, ka gbada kaeꞌ.

5 Yaꞌam yaꞌa pasig soꞌ ya soogin, on sosim Winaꞌam one tisid nidib wusa ne yaꞌamseug, ka pu ied gbaꞌar la, ka o na diꞌe. 6 Ka ya yaꞌa sos o, asee ka ya niŋ o yadda ka da biꞌes baa biꞌelaa. On wusa biꞌesid la wen wuu moꞌar kuꞌopila ka pebisim daꞌad ka li tuulim siꞌem la. 7-8 Niŋkan buudi da mor potenꞌer ye o na diꞌe siꞌel Zugsob la saꞌanee. O ane potenda ayi sob ne one pu gbanꞌad yel yinnii.

9 Li nar ka ti baꞌabiig one a noŋdaan mor sumalisim bozugo ba na duꞌos o. 10 Ka kpanꞌamdaan me mor sumalisim ba yaꞌa sigis o, bozugo o kpanꞌam la na gaad wen wuu mood puum n gat siꞌem la. 11 Winig yiti du ka li tuulug ziank mood ka puum la soog, ka li venlim saꞌam. Ala men ka kpanꞌamdaan na kpi, hale ka nan kpen be o tuuma ni.

12 Yelsum be ne one nyaŋe modig makir puugin. O yaꞌa nyaŋ makir la, Winaꞌam na tis o nyovur zugpibig line a piinkan ka o da ziꞌel noor n tis bane noŋ o la.

13 Makir yaꞌa paae soꞌ, on da yel ye, “Winaꞌam makidi ma.” Bunbeꞌed ku nyaŋe mak Winaꞌam. Ala zug Winaꞌam pu makid soꞌoo. 14 Soꞌ mekama yaꞌamleog panꞌasid o ka o kpenꞌed makirin. 15 Ka yaꞌamleog yaꞌa tuk poog li duꞌadne tuumbeꞌed, ka li me nobugidi n liebid kuꞌum.

16 M baꞌabinoŋa, da ke ka soꞌ maꞌa ya. 17 Piinsuŋ wusa yitne agol, Winaꞌam saꞌan na, one maal winig ne bunam wusa line ket ka li nied nyain. O pu tiakeda ka kpen aa o naŋ naŋ. 18 O meŋ boodim ka o maali ti ne o yelsida pianꞌad ye ti a yiiga dim bun lin ka o maal wusa ni.

19 M baꞌabinoŋa, baŋimi neꞌeŋa, soꞌ kam zanꞌa kelisimi suꞌuŋa ka pianꞌad baanlim, ka o sunf da pelig toꞌotoo. 20 Ninsaal supeen pu tum Winaꞌam yelsida tuumaa. 21 Dinzug basimi line a dianꞌad wusa, ne tuumbeꞌed line nobugid bedego, ka sie ya meŋ n diꞌe Winaꞌam pianꞌad kane ka o zaŋi niŋi ya sunya ni la, ka lin na nyaŋe faaenn ya.

22 Da maꞌa ya meŋ n kelisid Winaꞌam pianꞌad la, ka basi lii, amaa siakim tumi li. 23 On wusa kelis pianꞌad la, ka pu tumi lii, wenne ninsaal one gos gotiŋin n nye o meŋi a siꞌem. 24 O gosi o meŋ ka keŋ ka tam on paꞌa a siꞌem la. 25 Amaa one gos Winaꞌam wada suŋ kane tisidi yolisim la, ka kpelim mood suꞌuŋa, ka pu tam on wum siꞌel laa, ka siaki tumi li, Winaꞌam na tis o yelsum on tum siꞌel la yela.

26 On wusa tenꞌesid ye o a one dol Winaꞌam, ka pu gbanꞌe o noore, o maꞌade o meŋ, ka o Winaꞌam dolim ane zaalim. 27 Winaꞌam dolim kane a nyain ti Baꞌ Winaꞌam saꞌan ane a nwa: fun na suŋ kpiibis ne pokonya ba fara poogin, ka da ke ka dunia tuumbeꞌed kpenꞌ fu.