5
Juan okitak n amatlajkuíloli iwa n Ichkatsi
1 Ijkuakó, akin oewatoka ipan weyi yáyantli, onikitili itech ima se amatlajkuíloli non omemelitoka iwa oijkuilitoka ik tlijtik iwa ik pánixko, iwa oyekpepechitoka ika chikome seyojteh. 2 Iwa onikitak se ángel weletini non okijtoaya ika chikawak tlájtoli:
—¿Akin okachi yolchipawak makitlapo n amatlajkuíloli iwa makintsomoni n seyojteh?
3 Pero nion itech ilwikak nion ipan tlaltíkpaktli nion itlampa tlali, omoajsia se non weletiskia kitlapos nion aka omixewiaya kontlajtlatas n amatlajkuíloli. 4 Iwa ne satlawel onichokaya, porke amo omoajsia nion se yolchipawak akin weletiskia kitlapos non amatlajkuíloli iwa kiamapoas. 5 Ijkuakó seme de nonteh tetajtsitsinteh onechili:
—Ayakmó xichoka, n lío non iwejkaixwi n Judá iwa n rey David, yotlátlanki iwa Ye weletis kitlapos non amatlajkuíloli iwa kintsomonis n chikome seyojteh.
6 Ijkuakó, tlatlajkotia kan kajki n weyi yáyantli, intlajkotiah n nawi non yolitokeh iwa intlajkotiaj n sempóali iwa n nawi tetajtsitsinteh. Onikitak omoketoka se Ichkatsi non omotaya kemi sikin okimiktijkeh. Okimpiaya chikome ikuakuanwah iwa chikome ixtololowah; nonteh ixtololomeh kijtosnekih n chikome espíritus de Dios non Ye okwalintítlanki ipan nochi n tlaltíkpaktli. 7 N Ichkatsi omijkuani inawak Dios Akin oewatoka kan iyayan iwa okónanki n amatlajkuíloli non okipixtoka itech imayekma. 8 Ijkuak okónanki n amatlajkuíloli, nonteh nawi non yolitokeh, iwa n sempóali iwa n nawi (24) tetajtsitsinteh owetskeh iyakapa n Ichkatsi. Nochteh okipixtokah sejsen arpa iwa okikitskijtiayah sejsen kopalkaxitl non okinchijchijkeh de oro iwa otentokah ika kópali. Non kópali okatka intiotsajtsilis de akimeh iaxkawah Dios. 9 Iwa okitlakuikiliayah nin yankuik tlakuíkali:
Sanwel Tejwatsi tiweletis tikonanas n amatlajkuíloli iwa tikintsomonilis iseyojwah;
ken omitsmiktijkeh, iwa ika moesso otechko para matiyetokah iaxkawah Dios,
itech nochteh n tlaltikpaktlakah,
itech nochteh akimeh kipiah ok se intlajtol,
itech nochteh n altepemeh iwa oksikimeh wejweyi tlalmeh.
10 Otechtlali tireyes iwa titiopixkeh inawak Dios,
iwa titlanawatijtoskeh ipan nochi n tlaltíkpaktli.
11 Otlanki onontláchixki, iwa onikinmitak miakeh ángelteh okiyawalojtokah n weyi yáyantli, noiwa ompa okatkah n tetajtsitsinteh iwa non nawi non yolitokeh, iwa nochteh otlajtojtokah. Satlawel miakeh miyomeh ompa okatkah, 12 iwa chikaktik okijtoayah:
¡N Ichkatsi non okimiktijkeh
sanwel Ye mayeto weletini,
iwa nochi mayeto iaxka,
noiwa maixtlamati iwa
mayeto chikawak,
noiwa makitlakitakah, iwa
makiweyilikah iwa
kuali makiyektenewakah!
13 Noiwa nochi tlan Dios okichijchi, tlan kajki itech ilwikak, ixko tlali, itlampa tlali iwa itech weyi atl, iwa nochi tlan intech onka, onikak okijtoayah:
¡Akin ewatok itech n weyi yáyantli iwa n Ichkatsi,
matiktlakuikilikah,
matiktlakitakah,
matikweyijkachiwakah,
iwa nochipa makipia weletílistli,
axa, iwa nochipa!
14 Iwa non nawi, non yolitokeh, okijtoayah:
—¡Ijkó mamochiwa!
Iwa n sempóali iwa n nawi tetajtsitsinteh omotlankuaketsayah iwa okiweyiliayah.