16
Masxaxa xil lateh rat pesin te longpangasien xil te ekaten na Hi ba xat moletin xil te ut etan
1 Di, nalong rae tei xa nggeih di misepin nggo Nim Eo ba mi masxaxa lu e he sav (7) bit, “Muha muteh rat pesin ihe lu e he sav (7) te longpangasien te ekaten na Hi ihe ut etan.” ✡ Aes 66:6; Rev 16:7; Sam 69:24; Ser 10:25; Esek 22:31; Sef 3:8
2 Misak ni, masxaxa xa diamu ni xil ba miteh longpangasien xa di e pesin nan be ut etan. Ngan ak misak ni utua tesa xil lastal e ngan xil xa langgur simeleleen na vongoro tesa e lamot mi nanao nan. E xil lalong pangas xil holu xa holu pupu ven. ✡ Eks 9:10; Dut 28:35; Rev 13:12-17; 14:9,11; 19:20; 20:4
3 Di, masxaxa xa be lu (2) e xil miteh longpangasien xa di e pesin nan be tas, ma tas mei nggoni hatura na moletin xa mat. Ngan ak misak ni holesok xil vus xa lameul ladi e tas lalel. ✡ Eks 7:17-21
4 Di, masxaxa xa be tol (3) e xil miteh longpangasien xa di e pesin nan be oeisal xil e vangoei xil. Misak ni oei xil vus ak biles mei be ra. ✡ Eks 7:19-24; Sam 78:44 5 E nalong masxaxa xa di milaxat oei xil te ut etan bit,
“Hi xa obe eo,
oda xosali e oteta tetiamu,
lepisien xil ak xa di opol ni momal tang.✡ Sam 119:137; 145:17; Dut 32:4; Eks 3:14; Rev 1:4,8; 11:17
6 Moletin xil ak latesak ni re moletin nam xil tetel provet xil teleh. ✡ Sam 79:3; Aes 49:26
Ma xouk di osa ra mi xil tengan limu ni.
Nggo rin ak, di osa xoles naha xa latepol ni mi xil.”
7 Di, nalong rae tei nggo hor te vokon eo xa bit,
“!Hi Suv te Xeihen!✡ Amos 3:13; 4:13; Rev 1:8; 4:8; 11:17; 15:3; 16:14; 19:6,15; 21:22; Sam 19:9; 119:137; Rev 19:2
!Reitin li, lepisien nam xil be reitin e momal tevi!”
8 Di, masxaxa xa be hat (4) e xil miteh longpangasien xa di e pesin nan ba xat meteneai. Misak ni, meteneai mei mitin nggeih xa nggeih pupu e ngga purun tenbe moletin xil del upang teni. 9 Meteneai ngga purun xil del titinen teni xa nggeih pupu. E neta sav xa mak, moletin xil lataviles ti ra tesaen nae xil, e latasa merereen mi Hi ti xa be eilep pupu. E‑e, xil lasepsisil ba xat his ngan xa xeihen te longpangasien xil ak de hen. ✡ Rev 9:20-21; 16:11,21
10 Di, masxaxa xa be lim (5) e xil miteh longpangasien xa di e pesin nan ba xat von xeihen na vongoro tesa xa diamu. Misak ni, maluxoluken mei mikutaxol ut xil vus xa xi di milaxati. Moletin xil langas luhexil ve longpangasien xil xa di langguri. ✡ Eks 10:21; Aes 8:22 11 Ma lasepsisil ba xat Hi te ut nesao ve longpangasien e utua tesa nae xil. E xil lataviles ti vari ra sexien tesa nae xil. ✡ Rev 9:20-21; 16:9,21
12 Di, masxaxa xa be tei e he sav (6) e xil miteh longpangasien xa di e pesin nan be oeisal Upretis xa eilep. Misak ni oeisal nen ak bemei mes e misa suse mi suv toto xil xa ladi e kantri xa ba ni ist tengan moletin te vaeen nae xil lakila lakakao en lava. ✡ Aes 11:15; 44:27; Ser 50:38; 51:36 13 Di, napus ninin tesa tol (3) xa lapus xatel latnggoni frog. Xatel kekes, tei mistal nggo vulonge Dragon, tei mistal nggo vulonge vongoro tesa, e tei mistal nggo vulonge provet te luvosen nan. 14 Frog xatel ak latbe ninin tesa xatel xa di latopol ni merekel xil xa tellep. Ninin tesa xatel ak latbe visal suv toto xil vus te ut etan tengan latileh viton xil lihe rute tei takes. Lamei vituei tengan lisak mesen xil ve vaeen xa eilep xa ite Melengien te Lepisien na Hi te Xeihen. ✡ Rev 19:19; Amos 3:13; 4:13; Rev 1:8; 4:8; 11:17; 15:3; 16:7; 19:6,15; 21:22 15-16 Xil limei vituei e rute xa lakesi ni ‘Armagedon’ nggo sepinien Hibru.
Melele xa di napusi, Suv Iesu biteni bit, “!Muteong kuhi! Inou di namei nggoni moletin te kanen tei e melele xa xamim munakil ti. ✡ Mat 24:43-44; Luk 12:39-40; 1Tes 5:2,4; 2Pit 3:10; Rev 3:3 E tuxolxatien na Hi iti mi ngan xa tit iketeh e tit isak mesen xi vehakut ve mei rilomunen navan. Xi ixoni moletin xa di miketeh kuhi e mising pipin tengan nave unoun ti xa takavue xol xi ti xosxa itemanin ni neta tei e vongien.”
17 Di, masxaxa xa be lu e he sav (7) e xil miteh longpangasien xa di e pesin nan be mesavuol. Melele xa pol ni mak, rae te xeih tei mikei nggo von xeihen xa de Nim Eo bit, “!Bus tuei!” ✡ Aes 66:6; Rev 16:1 18 E melele nen ak vari, an milangas, veta mirum e posou, e lul xa eilep milil. Lul ak minggeih mili sen lul sav xil xa latestal e melele xa Hi teling moletin xil e ut etan duxoh xosali. ✡ Eks 19:16-19; Rev 4:5; 8:5; 11:19; Dan 12:1 19 Misak ni, tan te taon xa eilep te hal Babilon* Babilon be sepinien xuxus usil taon xa mahulong te hal Rom xa vatit kavmen xil ladi en. mesel be rin tol (3), e taon xil xa latellep te kantri xil vus lakiri lel. Hi pol ni mak vengan xa minem xat tesaen xil na ngan xil te taon xa eilep te hal Babilon, e misa pangasien te ekaten nan xa eilep ba xat xil. ✡ Sam 75:8; Aes 51:17,22; Ser 25:15; Rev 14:10; 15:7 20 Melele xa lul milil nggeih mak, aelan xil vus lamerir labe huinep te tas e vathu xil vus lakiri lel mei labe tovuol tang. ✡ Rev 6:14; 20:11 21 Merut aes xil xa latellep lakiri langgo tilang hat xa kilo te xil kekes duxoh hanutap lu (40). Melele xa aes xil ak lakiri mak, longpangasien teni nggeih xa nggeih pupu, ma moletin xil labiles e di lasepsisil Hi ven. ✡ Eks 9:24; Rev 11:19; 16:9,11
✡16:1: Aes 66:6; Rev 16:7; Sam 69:24; Ser 10:25; Esek 22:31; Sef 3:8
✡16:2: Eks 9:10; Dut 28:35; Rev 13:12-17; 14:9,11; 19:20; 20:4
✡16:3: Eks 7:17-21
✡16:4: Eks 7:19-24; Sam 78:44
✡16:5: Sam 119:137; 145:17; Dut 32:4; Eks 3:14; Rev 1:4,8; 11:17
✡16:6: Sam 79:3; Aes 49:26
✡16:7: Amos 3:13; 4:13; Rev 1:8; 4:8; 11:17; 15:3; 16:14; 19:6,15; 21:22; Sam 19:9; 119:137; Rev 19:2
✡16:10: Eks 10:21; Aes 8:22
✡16:12: Aes 11:15; 44:27; Ser 50:38; 51:36
✡16:14: Rev 19:19; Amos 3:13; 4:13; Rev 1:8; 4:8; 11:17; 15:3; 16:7; 19:6,15; 21:22
✡16:15-16: Mat 24:43-44; Luk 12:39-40; 1Tes 5:2,4; 2Pit 3:10; Rev 3:3
✡16:18: Eks 19:16-19; Rev 4:5; 8:5; 11:19; Dan 12:1
*16:19: Babilon be sepinien xuxus usil taon xa mahulong te hal Rom xa vatit kavmen xil ladi en.
✡16:19: Sam 75:8; Aes 51:17,22; Ser 25:15; Rev 14:10; 15:7
✡16:21: Eks 9:24; Rev 11:19; 16:9,11