11
Tetep iaxa Hi tepol texo moletin xil tetiamu xa neketen nae teta
1 Neketen nar di e melele xa rakil kuhi xa ti ripus huite te naha xa raling nenesien nar en, xa rake reitin e holesok xil xa rasakras rapusi. 2 Vanuvei Eo tesepin tehos usil avu nar xil tetiamu ve neketen xa latehuri. 3 Vengan xa nggo neketen iaxa di ranem kila xa Hi tepeas ni ut etan tetel sepinien nan kestang. Ma, holesok xil vus xa di rapusi, Hi tepeas rohon ni texo holesok xil xa rasakras rapusi. ✡ Sen 1:1; Sam 33:6,9; 2Pit 3:5; Rom 4:17
4 Vengan xa Ebel, neketen nan teta, xi tesa sanien eo tei mi Hi xa tehos mak mu teli sanien eo xa Ken tesa ni. Melele xa Hi tepus kil neketen nan, tehesi xi ven e tehesi xi ve sanien eo nan mun. Tesak ni, Vanuvei Eo tehiteni xa Ebel temal pe meten. E, neta sav xa Ebel temat, neketen xa tepisen ni di pispisi mi xir xosali. ✡ Sen 4:3-10
5 Vengan xa Inok, neketen nan teta, xi tenamat ti. Hi tetal rati tehe ut nesao e moletin tovuol vakila vakameti mun. Vanuvei Eo tehiteni xa Hi tehesi xi ve Inok, e tehur rati tehe ut nesao. ✡ Sen 5:24 6 E rakila xa moletin tovuol mikila vasak ni Hi vahesi xi ven xosxa neketen nan tovuol. Vengan xa ngan xil vus xa di lamei visal Hi lineket mu xa xi da e di misa huite mi ngan xil xa iexil bei tengan lamei visali.
7 Vengan xa Noah, neketen nan teta, xi telong xat Hi melele xa tesel xati usil holesok xil xa isa xa imei xa xi tenapus ti mu. E vengan xa Noah temerere ni Hi, xi tepol ni tuturil tei xa mahulong tengan vateh meulien e ngenen xil. E tuturil ak tehe simeleleen tei mi mosav xil tengan vapisen ni mi xil xa momal tengan xi vasa pangasien mi xil ve longrasien nae. Tesak ni, Hi tepusi xa Noah temal pe meten vengan xa, neketen nan teta. ✡ Sen 6:13-22; 7:1; 1Pit 3:20; Rom 3:22; 4:13; 9:30
8 Vengan xa Ebraham, neketen nan teta, xi telong xat Hi e melele xa tekesi tengan ihe kantri tei xa tehit xati tehit isa ni mini. E neta sav xa takil ti rute xave xa di teha en, Ebraham testokovein kantri nan xati e teha. ✡ Sen 12:1-5; Pol 7:2-4 9 E vengan xa, neketen nan teta, melele taxa tetuxoh kantri xa Hi tehit xati mini, Ebraham teta en texoni ngan halesav tei. Reitin, xi tetel ngenen xil lateti e nim tavolin xil tang, texoni ngan xa Aesak xal Siekob mun lutepol ni xa lutestal texo vatimol nan tetutou. E hisit hitxatien xa Hi tesa ni mi Ebraham teha tetuxoh xalu mun del vatimol nalu xil. ✡ Sen 23:4; 26:3; 35:12,27 10 Ebraham teta texoni ngan halesav temak vengan xa teling nenemien nan tengan vatatil taon xa mahulong xa de ut nesao. Ngan ak be taon xa Hi vari teling xati e tekili ni tehusil nenemien nan, taon tei xa ita vehakut. 11 Vengan xa Ebraham, neketen nan teta, Hi tesak ni mei tehe tata tei, neta sav xa tehe momatu kuhi ngamu e Serah tehe lumalum. Hi tepol ni temak vengan xa Ebraham tenesi xa Hi ipol sen holesok xil xa tehit xati mini. ✡ Sen 17:19; 18:11-14 12 Tesak ni, rapusi xa, neta sav xa Ebraham tehe momatu xa tehe momatu pupu e sangas vamat,✡ Rom 4:19 Hi tesak ni “ngan xil xa listal lixo en lihe holu xa lihe holu pupu lixoni hitu xil te tilang hat mu lixoni suvien xil te tas xa moletin misakras vavuli sen ni.” (Sen 22:17) ✡ Sen 15:5-6; 32:12; Eks 32:13; Dut 1:10; 10:22
13 Melele xa Ebraham, Aesak xatel Siekob lattelel, neketen natel e hitxatien na Hi texeih tamu, neta sav xa latnaleh ti mu naha xa Hi tehit xati mi xatel. Texoni ngan xa latteketeh tehe sotin e lattelonge tehos pupu ven. Tesak ni, tetel sien, lattehit rati xa lattehe ngan halesav xatel xa tan natel xati e ut etan tovuol. ✡ Sen 23:4; 47:9; 1Kron 29:15; Sam 39:12; 1Pit 2:11 14 E rakila xa ngan xil xa di lasepin mak di lalang ves kantri tei xa mei ihe nae xati. 15 Xatel ak latnanem ti mun usil kantri xa latestokovein ni. Vengan xa vahit latotit ni ngan xa ti latonem usili, ma latkila latotilomun latoha en. 16 E eheien natel teti e kantri tei xa ihos mak mu, kantri xa de ut nesao. Misak ni, vengan xa neketen natel texeih en, Hi tave unoun ti tengan moletin xil lakesi ni Hi natel. Vengan xa be reitin xa tesak mesen taon xa mahulong tei e ut nesao tengan latiti en. ✡ Eks 3:6,15; 4:5; Mak 12:26
17 Vengan xa Ebraham, neketen nan teta, melele xa Hi tehit vapus kil reitinen te neketen nan, xi temaen xoteh meulien na natneli xa tehe Aesak tengan mei vahe sanien eo tei mini. Reitin, Ebraham tevue xat xi tengan vahas vin natneli xati xa tehe tei takes nan mei vahe sanien eo tei mi Hi, neta sav xa Hi tehit xati xa isa tuxolxatien mini ixo en. ✡ Sen 22:1-10; Tem 2:21 18 Ebraham teneket en vengan xa Hi tesepin mini usil natneli ak tehit, “Vatimol xil xa natehit xati minuk, xil mei listal lixo Aesak.” (Sen 21:12) ✡ Rom 9:7 19 E Ebraham telong xati vengan xa tenemi xa Hi ikila ital rat Aesak ra maten. E, e rin tei, rakila raviteni xa tehe reitin xa Ebraham tehur rilomun ni Aesak ra maten.
20 Vengan xa Aesak, neketen nan teta, melele xa mei tematu kuhi, tesis Hi tengan ituxol xat Siekob xal Esao e melengien xil xa ti imei e meulien nalu. ✡ Sen 27:27-29,39-40
21 Vengan xa Siekob, neketen nan teta, melele xa sangas vamat, tesis Hi tengan ituxol xat kekes ni nat Siosep xalu.✡ Sen 48:15-16 Di, “Siekob tesuv xat xi ni eitingil nan e tepet rat his Hi.” (Sen 47:31)
22 Vengan xa Siosep, neketen nan teta, melele xa sangas vamat, tesep usil melele xa Hi isak ni mol‑Isrel xil limea lihe reling kantri te hal Isip. E vengan xa teneket xa ngan ak mei istal ihe reitin, ma tesa sepinien mi xil usil naha xa ti lipol ni ni tiei nan melele xa liha.* Siosep tesis xil tengan lileh tiei nan e melele xa listokovein kantri te hal Isip e litilomun lihe tan xa Hi tehit xati mi xil (Sen 50:25-26). ✡ Sen 50:24-25; Eks 13:19
23 Vengan xa tame Mosis xal ninen, neketen nalu teti, melele xa Mosis tepot, lutesoso ni aveti tol (3) vengan xa lutepusi xa tuvava ak tehos xa tehos pupu. Ve neketen nalu, ulixalu tenakan ti tengan lalolong ras rae na suv toto te hal Isip. ✡ Eks 2:2; 1:22
24 Vengan xa Mosis, neketen nan teta, melele xa temeul tehe eilep, tesin ni tengan latekesi ni nat atuli na suv toto te hal Isip. ✡ Eks 2:10-12 25 E teling nenemien nan xa ihos mak mu xa ihur longpangasien itel moletin xil na Hi ili ngan xa itit ni tesaen xa di misak ni moletin xil lalonge bos tave hi ti. 26 Xi tepusi xa longpangasien xa di tehuri vengan di teling neketen nan e Mesaea xa Hi tehit isa ni imei ihos mak mu ili holesok hos xil xa teti e Isip. Tenemi temak vengan xa teketeh tehe sotin tetuxoh huit neketen xa Hi isa ni mini. 27 Vengan xa Mosis, neketen nan teta, testokovein kantri te hal Isip e ulin tenakan ni ti ekaten na suv toto teni. Mosis teling nenemien nan texeih xa ixulehi ihusil Hi vengan texoni ngan taxa tepusi di tetiamu ni teha, ngan xa moletin ti misakras vapusi. ✡ Eks 2:15; 12:51 28 Vengan xa Mosis, neketen nan teta, telong xat rae Hi e tepispisi mi mol‑Isrel xil ni sexien xa ti lipol ni Anien te Tavien ixo en e itep iaxa ti likas pos te puiteh mae xil ni ra. Isak ni, melele xa masxaxa tei mei ihas vin muimol xil vus xa latehe malohos, navas vin muimol xil na mol‑Isrel xil ti. ✡ Eks 12:21-30
29 Vengan xa mol‑Isrel xil, neketen nae teta, latehur xoteh Tas te Pili e tan xa tevue. E melele xa mol‑Isip xil latesak pisi tengan lapol ni, Hi tepol ni tas mei tekutaxol xil, e xil vus latemerir e latelel. ✡ Eks 14:21-31
30 Vengan xa mol‑Isrel, neketen nae teta, latekakao latekapis taon te hal Seriko tehe valu e he sav (7), e vioh xa mahulong te taon ak tekiri lel. ✡ Sos 6:12-21 31 Vengan xa Rehab, neketen nan teta, xi xa tehe atou tei te suse tehur pilei moletin xalu te luvoluven na mol‑Isrel xil e tetutou ni xalu. Misak ni, xi tenamat ti vatel ngan xil xa latelong ras rae Hi. ✡ Sos 2:11-12; 6:21-25; Tem 2:25
32 Nakila masepin usil moletin sav xil holu, e melele nen ak tapin ti tengan masep usil neketen na Kideon✡ Sats 13:2 e Barak, ✡ Sats 4:6 neketen na Samson e Seftah, neketen na Deved e Samuel, e neketen na provet xil mun. ✡ Sats 4:6 33 E vengan xa neketen nae teta,
lateha tan ni suv toto te kantri sav xil,✡ 1Saml 17:34-36
latelaxat kuh moletin xil texo sexien xa temal,✡ Sats 15:20
latehur huit hitxatien xil na Hi,
latepus Hi teki xol vulonge laeon xil,✡ Dan 6:1-27
34 latehas upang tei xa mahulong temat, ✡ Dan 3:23-25
latelesae ra tiei te vaeen,
tenbexil temerou, e mei latexeih rilomun,
latepol ni holesok xil xa tellep e vaeen xil,
e latehol rerat ngan xil xa di latevae ve rin na kantri sav xil lateha.
35 Vengan xa mama xil latehur neketen, xil latehur rilomun ni horamue nae xil xa latemea rilomun ra maten. ✡ 1King 17:17-24; 2King 4:25-37 E mama sav xil, horamue nae xil latehas vin xil vengan xa latesin ni tengan ha lameluv. Latemaen ni tengan ha lalel e he mosav xil tengan, itutou sung, likila lihur meulien tei xa ihos mak mu e melele xa limea rilomun ra maten.† Sepinien ak di bit usil mama tei e 170 BC, huram xil tetiamu ni poten na Iesu, xa tepus natneli lu e he sav (7) xa latehur longpangasien xil te xeih e he kavmen te hal Kris xa tehiteni mi xil xa likila ha limeluv xosxa listokovein neketen nae e Hi. E melele xa latesin ni tengan lapol ni, latehu vin xil kekes pe met mama nae. E melele xa horam maxoe xil ak latelel, xil vus latehit rati xa lateling nenesien nae e Hi xa isak ni xil limea rilomun ra maten. Di, latehas vin mama nae mun (2 Maccabees 7:1-41). 36 Moletin sav xil, latepol pepamen mi xil, latemeas pangas xil ni ao xa tekan, lateso xil latehe nim te xeih, e lateling sen e xil. ✡ 1King 22:26-27; 2Kron 18:25-26; Ser 20:2; 37:15; 38:6 37 E moletin tesav xil mun, latehov vin xil, lateta xoteh xil latehe rin lu, e latesal vin xil ni tiei te vaeen. Xil holu, moletin xil latesak purun xil e latepol ni tesa mi xil. Holesok nae xil latehe tovuol e latesing ni hilbe sipsip mu nani xil tang. ✡ 2Kron 24:21 38 Ngan xil ak latekakao e uruvuol e rute xa vathu xil lateti en, e lateti e vangihat xil e vul xil tang. Hisit moletin xil ak latehos mak mu pe met Hi, e ut etan tapin ti tengan xil liti en.
39 Vengan xa neketen nae teta, Vanuvei Eo tesepin tehos usil moletin xil vus ak. E, e meulien nae, xil latnahur sen holesok xil ti xa Hi tehit xati mi xil. 40 Vengan xa Hi teling xati xa huite te naha xa tehit xati mi xil mei imal tevi ixo naha ti ipol ni e meulien nar e melele xa rituxoh hoxalit lohen te neketen nar.
✡11:3: Sen 1:1; Sam 33:6,9; 2Pit 3:5; Rom 4:17
✡11:4: Sen 4:3-10
✡11:5: Sen 5:24
✡11:7: Sen 6:13-22; 7:1; 1Pit 3:20; Rom 3:22; 4:13; 9:30
✡11:9: Sen 23:4; 26:3; 35:12,27
✡11:11: Sen 17:19; 18:11-14
✡11:12: Sen 15:5-6; 32:12; Eks 32:13; Dut 1:10; 10:22
✡11:13: Sen 23:4; 47:9; 1Kron 29:15; Sam 39:12; 1Pit 2:11
✡11:16: Eks 3:6,15; 4:5; Mak 12:26
✡11:20: Sen 27:27-29,39-40
✡11:21: Sen 48:15-16
*11:22: Siosep tesis xil tengan lileh tiei nan e melele xa listokovein kantri te hal Isip e litilomun lihe tan xa Hi tehit xati mi xil (Sen 50:25-26).
✡11:22: Sen 50:24-25; Eks 13:19
✡11:23: Eks 2:2; 1:22
✡11:24: Eks 2:10-12
✡11:27: Eks 2:15; 12:51
✡11:28: Eks 12:21-30
✡11:29: Eks 14:21-31
✡11:30: Sos 6:12-21
✡11:31: Sos 2:11-12; 6:21-25; Tem 2:25
✡11:32: Sats 13:2
✡11:32: Sats 4:6
✡11:32: Sats 4:6
✡11:33: 1Saml 17:34-36
✡11:33: Sats 15:20
✡11:33: Dan 6:1-27
✡11:34: Dan 3:23-25
✡11:35: 1King 17:17-24; 2King 4:25-37
†11:35: Sepinien ak di bit usil mama tei e 170 BC, huram xil tetiamu ni poten na Iesu, xa tepus natneli lu e he sav (7) xa latehur longpangasien xil te xeih e he kavmen te hal Kris xa tehiteni mi xil xa likila ha limeluv xosxa listokovein neketen nae e Hi. E melele xa latesin ni tengan lapol ni, latehu vin xil kekes pe met mama nae. E melele xa horam maxoe xil ak latelel, xil vus latehit rati xa lateling nenesien nae e Hi xa isak ni xil limea rilomun ra maten. Di, latehas vin mama nae mun (2 Maccabees 7:1-41).
✡11:36: 1King 22:26-27; 2Kron 18:25-26; Ser 20:2; 37:15; 38:6
✡11:37: 2Kron 24:21