1 Meke vura mae pa galegalearane si keke vina gilagila arilaena, sapu variva magasana: keke barikaleqe si ta dogoro sapu pokopoko nia sa sa rimata, meke netia sa sa sidara pa nenena, meke toropae ni sa sari ka manege rua pinopino. 2 Meke aritiana sa barikaleqe, meke ta sigiti na hilala na tata podo koburu si asa. 3 Beto asa si keke vina gilagila pule si vura mae pa maṉauru: vura mae si keke ratovo ziṉaziṉara nomana hola sapu ka zuapa batuna, meke ka manege puta kikihona, meke hopeke va hake toropae baṉara sari na batuna.* Dan 7:7 4 Meke hiru gore nia pikutuna sa si keke koari ka ṉeta pinaqahadi rina pinopino pa maṉauru, meke va hoqa gore lani sa pa pepeso si arini. Meke la sa ratovo pa kenuna sa barikaleqe pu tata podopodo, pude onolo toa ia gana sa haha sapu kote podoa sa, gua.* Dan 8:10 5 Meke podoa sa barikaleqe si keke tuna koreo pu kote tagoi sari doduru ṉiniraṉira pude baṉara ni sari doduru butubutu. Ba ta harupu sage koe Tamasa pa Nana habotuana Baṉara sa koburu.* Ais 66:7; Sam 2:9 6 Meke govete la nana pa soloso qega sa barikaleqe, vasina pu ele va nama veko nia Tamasa pude kopu nia rini si asa, koari ka keke tina karua gogoto onomo ṉavulu puta rane.

7 Meke ta evaṉa sa vinaripera pa Maṉauru. E Maekolo meke sari nana puku mateana, si raza ia sa ratovo, meke sa ratovo meke sari nana puku mateana si raza hobedia.* Dan 10:13,21, 12:1; Zd 9 8 Ba tava kilasa sa ratovo meke sari nana mateana, ke loke dia vasina hokara pude koa pa Maṉauru si arini. 9 Meke ta gona gore sa ratovo nomana, sapu sa noki pukeranena hola, sapu ta pozae sa Devolo babe Setani. Ta gona gore pa pepeso si asa, meke sari doduru nana mateana. Meke sekesekei ni sa sari doduru tie pa kasia popoa.* Zen 3:1; Lk 10:18

10 Meke avosia rau si keke mamalaiṉi pa Maṉauru, sapu velavela va ululae guahe: “Ele kamo kamahire sa tinaharupu, sa ṉiniraṉira, meke sa Binaṉara tanisa nada Tamasa, meke sa ṉiniraṉira tanisa Nana Karisito. Ura ele ta gona gore la pa pepeso si asa pu zutui sari na tasida koe Karisito, pa kenuna sa nada Tamasa boṉi na rane.* Zob 1:9-11; Zak 3:1 11 Meke ele koa mataqara meke va kilasia rini si asa koasa eharana sa Lami, meke koasa hinelahelaena sa Inavoso Leana. Meke lopu ruriti rini sari na dia tinoa kamoa pa minate. 12 Gua asa, ke mu koa qetuqetu agoi na Maṉauru, meke gamu doduru pu koa koa sa. Ba mi talotaṉa gemi si gamu na pepeso meke na lamana! Ura ele gore atu koa gamu sana sa Devolo pa nana tinaṉaziri lavata, sina gilania sa sapu papakana hokara mo sa nana totoso,” gua.

13 Meke totoso dogoria sa ratovo sapu ele ta gona gore la si asa pa pepeso, si podalae hata lulia sa sa barikaleqe sapu ele podona sa koburu koreo. 14 Meke ta vala koasa barikaleqe sari karua tatapuru atata nomadi, pude boka tapuru govete la si asa pa soloso qega. Meke koa si asa vasina pu ele va nama veko nia Tamasa, pude ta kopue si asa pa ṉeta vuaheni kukuruna, vasina pu lopu kamoa sa ratovo.* Dan 7:25, 12:7 15 Meke totolo vura pa ṉuzuna sa ratovo sa kolo, gua tugo na ovuku naqena pu luli la pa mudina sa barikaleqe, pude mani paleke taloa nia gana, gua. 16 Ba toka nia sa popoa pepeso sa barikaleqe, meke ta viqala sa pepeso, meke nuquru gore sa naqe sapu va totolo vura ia sa ratovo pa ṉuzuna. 17 Meke ta ṉaziri sisigiti nia sa ratovo sa barikaleqe, ke la pude razai sa sari kaiqa tuna pule sa barikaleqe, sarini pu va tabei sari na tinarae te Tamasa, pu tuqe va nabu pa rinaṉeraṉe, meke tozi vura nia sa inavosona sa guguana e Zisu Karisito. 18 Meke turu sa ratovo pa masamasa.