1 Koasa sidara vina zuapa si koa koari dia vasileana sari doduru tie Izireli. Meke koasa rane kekenu pa sidara asa si varigara pa Zerusalema sari doduru koasa pavasa tata koasa Sasada Kolo. Meke tepa ia rini se Ezara sa hiama, na tie va tumatumae pa Tinarae te Tamasa pude vagi vura nia sa buka Tinarae te Mosese sapu vala nia e Zihova pude lulia ari na tie Izireli.

2 Ke paleke la nia Ezara sa buka koasa vasina sapu varigara rina palabatu, barikaleqe na koburu, arini pu boka va nonoga. 3 Tia la ia Ezara sa pavasa tata koasa Sasada Kolo, meke tiro va ululae ia sa sa Tinarae te Mosese podalae totoso gasa sa rimata, kamo pa korapa rane, la koari doduru pu boka va nonoga. Va avoso valeana sari doduru tie koasa Buka Tinarae.

4 Turu se Ezara pa keke tuturuana huda ululuna, sapu ta tavete va nama pude tana totoso asa. Meke pa kali mataona, si turu sari Matitia, Sema, Anaia, Uraea, Hilikaea, meke e Maseia, meke pa kali gedena si ari Pedaia, Misaelo, Malikiza, Hasumi, Hasabadana, Zakaraea, meke e Mesulama.

5 Totoso turu se Ezara koasa tuturuana ululuna si dogoro betoa mo ri doduru tie si asa. Meke totoso tukelia tugo sa sa buka, si turu beto sari doduru tinoni. 6 Zama se Ezara, “Vahesia se Zihova, sa Tamasa lavata!”

Meke va sage betoi ri doduru tinoni sari na limadia meke olaṉa, “Emeni! Emeni!” Meke todoṉo vahesia rini si Asa, sa isumatadia si kamo pa pepeso.

7 Meke turu pule koari dia vasina si arini, meke va bakalia ri na tie Livaeti hire sa Tinarae te Tamasa: ari Zesua, Bani, Serebia, Zamini, Akubo, Sabetai, Hodaea, Maseia, Kelita, Azaraea, Zozabada, Hanani, meke Pelaea. 8 Meke iliri va bakala* Sa Tinarae te Tamasa si ta kubere pa zinama Hiburu, ba sari na tie Ziu si tale zama Arameiki podalae pa totoso sapu ta raovo vagi rini la pa Babiloni. lani rini pa dia zinama sari na tinarae te Tamasa, pude boka gilana valeania rina tie si asa.

9 Meke sipu avosia rina tinoni sapu gua hiva nia sa Tinarae te Tamasa, si ta tiqu nia arini pa bulodia, meke podalae kabo si arini. Ke tozi ni ri Nehemaea, sa qavuna, e Ezara sa hiama meke na tie va tumatumae pa Tinarae te Tamasa, meke sari doduru tie Livaeti pu hoke va bakalia sa Tinarae te Tamasa koari na tie, “Sa rane hie si madina koe Zihova sa mia Tamasa, ke lopu kaqu talotaṉa babe kabo si gamu. 10 Mi pule la pa mia vetu kamahire si gamu, mamu la tavetia si keke inevaṉa, mamu la henahena na napo turaṉi si arini pu qagani na ginani. Na madina koe Zihova sa nada Baṉara sa rane ṉinoroi. Ke mi lopu talotaṉa si gamu. Sa qinetuqetu sapu ponini gamu e Zihova si kaqu va ṉiṉira gamu si gamu. Ke lopu kaqu talotaṉa babe kabo si gamu.”

11 Meke va mokomokoi ri na tie Livaeti sari na tie, meke tozi ni pude lopu talotaṉa koasa rane madina gugua he. 12 Ke pule la henahena na napo qetuqetu pa dia vetu sari na tie, meke va hia i rini koari na votiki tie sari gedi ginani, sina ele gilania rini sapu gua ele ta tiro vurae koa rini.

13 Meke pa koivugona, sari doduru koimata koari na butubutu meke sari na hiama, na tie Livaeti, si la koe Ezara, pude tava tumatumae dia koasa Tinarae te Tamasa, gua. 14 Meke dogoro vura nia rini koasa Tinarae sapu vala nia e Zihova koe Mosese sapu ta tozi sari na tinoni Izireli si pude va turu ipi meke koai, pa totoso Inevaṉa Vina Balabaladi rina Ipi pa Soloso Qega.* Liv 23:33-36,39-43; Diut 16:13-15 15 Ke vala ni rini sari na vina tumatumae gua hire koari doduru vasileana nomadi na hitekedi, “Mi la koari na toqere, mamu vagi lelaṉadi sari na huda paeni, na huda olive, na huda metolo, na huda pamu, meke kaiqa huda pule, pude tavete ni ipi, gua sa vina tumatumae sapu ta kubere koasa Tinarae te Tamasa.”

16 Ke vagi lelaṉa huda sari na tinoni, meke taveti sari na ipi pa batudi ri na dia vetu, meke pa pavasa pa sada vetu, na varivarigarana pa Zelepade, meke koari na pavasa vasina varigara sari na tie tata koasa Sasada Kolo, meke koasa Sasada Iparemi. 17 Doduru tie saripu puledi koasa tinaraovo si tavete ipi beto, meke koa paki si arini koa rini. Hie tugo sa totoso kekenu sapu ta tavete si gua asa, seunae gua tu koari na rane te Zosua, sa tuna e Nani. 18 Podalae koasa sa rane kekenu koasa inevaṉa, meke kamo koasa rane vina betobeto, si ta tiro sa Tinarae te Tamasa koari doduru rane. Tavetia rini sa inevaṉa koari ka zuapa rane, meke koasa rane vina vesu si tavetia rini sa vinarigara tinukuna, gugua tugo sapu ta hivae koasa Tinarae te Tamasa.