17
1 Sa vina betona sa qua tinoa si tata kamo,
na lopu boka siṉo va leana si rau.
Loketoṉa pule si koa ba sa lovu mo.
2 Vari likohae nau ri tie ṉoṉovala si rau,
meke dogoria rau sapu kana hola au rini si rau.
3 Kei Tamasa, mu lavelave nau, na viaqu si rau.
Na loke tie pule kote zuka i sari qua zinama.
4 Ele va nosoi Goi dia binalabala pude lopu giligilana si arini,
mu lopu va malumi pude va kilasa au rini.
5 Be keke tie si ta tabara poata pude ṉovali sari nana baere,
si kote ari nana koburu vagia sa vina kilasa.
6 E Tamasa ele va sisire nia pozaqu koari na tie,
meke mae loroa rini sa isumataqu.
7 Moqo sari mataqu pa kinabo,
meke sa tiniqu si viviqe guana maqomaqo mo.
8 Sari na tie toṉoto si hodahodaka nau rini,
meke zutu au rini kekeṉoṉo gua sapu lopu vahesia rau sa Tamasa, gua.
9 Ba sari tie toṉoto si kote tuqe va nabu koari na dia hahanana,
meke sarini pu via limadia si kaqu koa ṉiṉira hola la tu.
10 Be doduru arini si mae turu pa kenuqu,
si lopu keke si kaqu dogoria rau sapu kote gilagilana.
11 Sari qua rane si ele hola, sari qua hiniva si lopu ta evaṉa,
meke gua tugo sapu okoro ni sa buloqu.
12 Ba sari qua baere si rane guni nia rini sa boṉi,
meke sa huporo si kalalasa guni nia rini.
13 Be guana sa qua siraṉa sapu koa hola si sa popoa mo tadi tie matedi,
si vasina kote eko si rau meke puta pa hinuporo.
14 Kote na tamaqu guni nia rau sa lovu,
meke sari uloso si na tinaqu meke na tasiqu vineki.
15 Pavei pule kaiqa siraṉa sapu koa hola koa rau?
Esei boka va dogoro poni au keke lolomo?
16 Lokari, sa lineana te Tamasa sapu gua rovea rau si kote gore turaṉia mo rau la pa lovu,
kote magogoso varigara pa pepeso.”