1 Meke sipu ele hola sari kaiqa rane, si evaṉia sa tie kopu napo vaeni, meke sa ṉati tie kinakina bereti tanisa baṉara pa popoa Izipi si keketoṉa sapu lopu qetu nia sa baṉara. 2 Ke bugoroni sa baṉara sari karua ṉati tie hire, 3 meke vata pusi sa baṉara sari karua pa vetu tanisa tie kopu, tie ta pusidi, vasina tugo sapu ta kopue se Zosepa. 4 Meke va kopuni sa tie kopu koe Zosepa sari karua tie, pude tokani, meke koa seunae si arini pa vetu varipusi.

5 Keke boṉi si hopeke putagita sari karua tie pa korapa vetu varipusi, sa tie tavetavete kolo vaeni, meke sa ṉati tie kinakina bereti tanisa baṉara pa popoa Izipi, meke lopu vari kekeṉoṉoi tugo ginuadi sari na dia pinutagita. 6 Meke sipu la dogori Zosepa si arini pana munumunu si doṉo talotaṉa si arini. 7 Ke nanasi sa sari karua, “Na vegua ke guana doṉo kuliusu tu si gamu kara ṉinoroi?” gua si asa.

8 Meke olaṉa sari karua, “Hopeke putagita si gami karua, meke loke tie tani si boka va bakala ponini gami sari mami pinutagita,” gua sari karua.

Meke zama se Zosepa, “E Tamasa mo boka tozi va bakali sari na pinutagita. Mi tozi nau sari na mia pinutagita,” gua si asa.

9 Ke zama sa tie tavetavete kolo vaeni, “Koasa qua pinutagita si koa nana si keke huda vaeni sapu koa pa kenuqu. 10 Meke ka ṉeta sari na lelaṉana sa huda vaeni asa, sipu liho si asa, si vura mae sari na havorona meke lopu sana sagana sari na vuana. 11 Meke taṉinia qua pa limaqu sa kapa tanisa baṉara, meke henai rau sari na vua vaeni meke mono lani rau pa korapa kapa, meke vala nia rau koasa baṉara si asa,” gua si asa.

12 Meke zama se Zosepa, “Hie sa rinupahana sa mua pinutagita: Sari ka ṉeta lelaṉa huda vaeni si sari ka ṉeta rane tugo,” gua si asa. 13 “Koasa rane vina ṉeta si kaqu vata rupahigo sa baṉara si goi, meke va turu pulego pa mua tinavete. Meke kaqu ade la nia goi pa limana sa nana kapa, gua tugo sapu hoke taveti goi visoroihe, sipu koa na tie tavetavete kolo vaeni tanisa si goi. 14 Ba mu tataru nau, mamu balabalau, pana koa valeana si goi. Mu toka nau mamu tozi au koasa baṉara, pude va vurau koasa vetu varipusi hie,” gua si asa. 15 “Ura ele ta holuholue taloa si rau pa popoa tadi na tie Hiburu, meke gua tugo sapu lopu hite tavetia rau si keketoṉa sapu garoqu pude ta veko nia rau pa vetu varipusi tani pa popoa Izipi,” gua si asa.

16 Meke sipu avosia sa ṉati tie kinakina bereti, sapu leana sa rinupahana sa pinutagita tanisa tie tavetavete kolo vaeni si zama la koe Zosepa si asa, “Arau ba putagita tugo, meke kotui rau pa batuqu sari ka ṉeta pili bereti, gua 17 Meke koasa pili sapu hake ulue, si koa dia soku votivotiki kinina ginani tanisa baṉara, ba mae sari na kurukuru tapuru meke gani i si arini,” gua si asa.

18 Meke olaṉa se Zosepa, “Hie sa rinupahana sa mua pinutagita asa. Sari ka ṉeta pili si sari ka ṉeta rane tugo. 19 Koari ka ṉeta si kaqu vata rupahigo sa baṉara si goi, meke kupa ia ruamu. Beto asa si kote va sigotia sa sa tinimu koa keke dedegere huda, meke kote mae sari na kurukuru tapuru meke gania ri sa tinimu,” gua si asa.

20 Ego, koasa rane, pa mudidi ri ka ṉeta rane si tavetia sa baṉara sa nana rane podo, pude tadi doduru nana ṉati palabatu koasa nana binaṉara gua, meke vata rupahia sa sa tie tavetavete kolo vaeni, meke sa ṉati tie kinakina bereti, meke turaṉa lani sa pa kenudia ri nana ṉati palabatu si arini, 21 Meke vala pule nia sa baṉara koa sa tie tavetavete kolo vaeni sa nana tinavete koana, pude tavetavete pude kopu kolo vaeni tanisa baṉara, gua. 22 Ba huqi va matea sa baṉara sa ṉati tie kinakina bereti, gua puta tugo sapu zama nia Zosepa koasa. 23 Ba namu muliṉi hola nia tu sa tie tavetave kolo vaeni se Zosepa, meke lopu hite balabala ia sa si asa.