1 Susurak ia numa au mai, Paulus. Manetualain here nala au ena, fo dadi uu Yesus Karistus nedenun. Ma kaꞌa Sostenes oo haitua hara masodak soa-neu ei boe. 2 Au surak susurak ia fee ei, ndia Manetualain hatahori kamaheren marai kota Korentus. Ana here nala ei ena, fo dadi miu Ndia hatahori lolo-laon, nahuu ei mamahere neu Yesus Karistus ena. Ana oo tao ei dadi lolo-laok sama leo basa hatahori kamaherek laen nara rai bee a mesan boe. Ara oo roke tulun ita Lamatuan Yesus Karistus ena boe, fo Manetualain helu-bartaa memak kana numa lele uluk mai ena fo nae nadenun mai. De Ana oo dadi neu ita Lamatuan ma sira Lamatuan boe.✡ Nedenuk kara Tutuin 18:1; Yoel 2:32

3 Au hule-haradoi neu Manetualain, ita Aman, ma Yesus Karistus, ita Lamatuan. Au oke-hule fo Ara ratudu Sira dale susuen neu ei, mita fo ei bisa leo-laꞌo no mole-damek ma lino-lendek.

4 Tungga-tungga au asaneda ei, au kokolak ua au Lamatuang ae, “Makasi noꞌun seli soa-neu hatahori Korentus asa nemeheheren!” Manetualain natudu Ndia dale susuen soa-neu ei ena, nahuu ei mamahere makandoo neu Yesus Karistus fo Ana nadenun mai ena. 5 De Ana fee ei mabeꞌi makalalaꞌok ues mata-matak kara ena, nahuu ei makaesa mia Ndia. Naa, tao nala ei mamasuꞌi nai ei dalem. Huu naa de ei malela no tebe-tebe basa hata fo nenenin lenak laꞌe-neu Ndia eno-dala masodan. Ei oo bubuluk dalak bee lolen lenak fo mafada hatahorir laꞌe-neu Karistus boe. 6 Basa dedeꞌak kara raa ratudu rae, basa hata fo ai mafada ei laꞌe-neu Karistus naa ena, raoka ratea nai ei dalem ena. Huu naa ei bei mamahere mae, basa dedeꞌak kara raa tetebes. 7 Dadi ei simbo mala basa hata fo neulauk ena, fo Manetualain Dula-dalen baꞌe fee Ndia hatahorin nara. Ta kuran hata esa boe na. De ei mahani a mia faik naa, fo neu ko Manetualain buka natudu ita Lamatuan Yesus Karistus soa-neu basa hatahorir. 8 Karistus naa, ndia nae tao barakai ei fo makatataka makandoo losa Ana fali mai nai dae-bafok ia. No dalak naa, ei ta tuda, ma ta hambu hatahori fo ndae salak neu ei. 9 Ita bisa tamahere neu Manetualain Dedeꞌa-kokolan, nahuu hata fo Ana kokolak, na, Ana taon dadi. De neu ko Ana nau tao basa dedeꞌak kara iar fee ei. Ana ndia nasosoi dalak fo ei bisa malela no malole Ndia Anan, ndia ita Lamatuan Yesus Karistus.

10 Toranoo susue nggara ein! Nai dedeꞌak ia, au kokolak unik ita Lamatuan Yesus Karistus naden. De au oke no tebe-tebe fo ei hahae mareresi leo. Tehuu maote tebe-tebe fo ei leo-laꞌo dalek esa, boso mabingga-baꞌek. Ei muste duduꞌa naruk, mita fo ei basa ngga bisa maena duduꞌak esak ka.

11 Au kokolak talo naa, huu hambu hatahori numa kaꞌa inak Kloe uma isin, mai tui au nae, ei ketuk bei mareresi makandoo. 12 Ei mareresi, de ketuk rae, “air ia, kaꞌa Paulus hatahorin!” Ma ketuk rae, “air ia, kaꞌa Apolos hatahorin!” Ma ketuk bali, rafafada aok rae, “air ia, tungga kaꞌa Peꞌu!”* Susura Malalaok dedeꞌa Yunani surak nae, “Kefas”. Kefas naa, nade laen numa Petrus mai. Laen bali rae, “air ia nenene kada Karistus mesa kana!”✡ Nedenuk kara Tutuin 18:24

13 Ei duduꞌam talo bee? Karistus nufanelun ta bisa rabingga-baꞌek. Do, ei duꞌa mae, naa au ndia mate nai ai ngganggek soa-neu ei? Taa! Do, neu sarani ei, ara pake au nadeng fo fee ei maso dadi miu au hatahoring, do? Ta bisa dadi, hetu? 14 Au oke makasi neu Manetualain, huu neu au ua ei numa naa, au ta sarani hatahori. Kada kaꞌa Krispus no kaꞌa Gayus ndia au sarani.✡ Nedenuk kara Tutuin 18:8; 19:29; Roma 16:23 15 No dalak naa, ta hambu hatahori bisa nae, “Ara sarani au pake Paulus naden, de au dadi uu Paulus hatahorin.” 16 (Ee, au dei fo asaneda. Au oo sarani hatahori noꞌuk ka numa Stefanus uma isin boe. Tehuu au ta asaneda mete te hambu hatahori laen bali fo au saranin, do taa.)✡ 1 Korentus 16:15

17 Huu Karistus ta nadenu au fo uu sarani hatahori. Au ue huung naa, ndia afada hatahorir laꞌe-neu Ndia Hara Lii Malolen. Tehuu mete ma au afada hatahori talo naa, Ana ta nau au kokolak pake dedeꞌa binir fo atudu au malelang, do, atudu oka-huun fo ta hohoꞌak kara. Mete ma au kokolak talo naa, naa tao nakuran koasa numa tutuik laꞌe-neu Karistus mamaten numa ai ngganggek lain.

18 Hambu hatahori duꞌa nae, basa dedeꞌak fo ita tuik laꞌe-neu Karistus mamaten numa ai ngganggek lain naa, nggoa bebek sudi selik kana. Tehuu hatahori matak leo naak, neu ko ana lenggo feꞌe numa Manetualain mai. Naa te soa-neu ita, Karistus mamaten naa, natudu Manetualain koasan fo tao nasoi-nasoda ita numa ita sala-singgon mai. 19 Naa, sama leo Manetualain mana toꞌu dedeꞌan, nade Yesaya surak nita nae,

20 Fai bakahulun, memak Manetualain kokolak talo naa. De hatematak ia, ana dadi talo bee ena? Hatahori malelak kara dadi talo bee? Meser anggamar dadi talo bee? Ma hatahori mana parani madedeꞌak kara, dadi talo bee? Hena nenene, ee! Manetualain tao nala sara sama leo hatahori nggoa bebek ena! Ana feꞌa heni basa duduꞌa-aꞌafik mana naokak nai dae-bafok ia, ma tao sara sama leo ta raena sosoa-ndandaak hata esa boe na.✡ Ayub 12:17; Yesaya 19:12; 33:18; 44:25

21-22 Manetualain malelan naa, ta neni babanggak sudi selik kana. Leo mae hatahori dae-bafok tao aon malelak, sira duduꞌa-aꞌafin mesa kasa ta manduku-mandaik fo ara bisa ralela tebe-tebe neu Manetualain. Leo mae talo naa, tehuu Manetualain pake Ndia malelan ena, fo sosoi dalak soa-neu hatahori dae-bafok. Fai bakahulun, Ana duꞌa ena nae, “Leo mae hatahori dae-bafok duꞌa nae, Au nedenung nggara kada hatahori nggoa bebek a mesan, tehuu leo mae talo bee oo, Au muste adenu hatahori fo reu rafada sara dedeꞌa ndoos laꞌe-neu Au boe.” Manetualain naketu basa nae pake hara heheluk fo Ndia nedenun nara rafadak naa ena, fo hatahorir bisa ramahere neu Ndia. Ana nau pake dalak naa, fo tao nasoi-nasoda hatahorir numa sala-singgon nara mai.

Tehuu hatahori dae-bafok duꞌa rae Manetualain dalan naa, nggoa bebek. Huu naa de ara ta nau tao matak neu Ndia nedenun. Hatahori Yahudir nau roke kada tanda heran a mesan, fo ara bisa mete-rita Manetualain koasan. Ma hatahori Yunanir nau nenene kada dedeꞌa malelak kara fo mana maso duduꞌa-aꞌafik neulauk a mesan, tungga sira mesa kasa duduꞌan. 23 Leo mae talo naa, tehuu ai fo mana dadi Lamatuak nedenun nara, kada laꞌok miu mafada hatahorir mae, “Manetualain nadenu Karistus ena, ndia Hatahori fo Ana helu-bartaa memak kana numa lele uluk mai ena, fo nae nadenun mai. Basa de hatahori laen nara paku risan numa ai ngganggek lain.” Neu hatahori Yahudir ramanene tutuik naa, ara rae timba henin, huu tungga sira duduꞌan, Hatahori fo Manetualain nae nadenuk mai naa, ta bisa mate. Neu hatahori Yunanir ramanene tutuik naa, ara duꞌa, “Tutuik nggoa bebek mateꞌen, ee!” 24 Tehuu hambu hatahori fo Manetualain here memak kana, fo dadi neu Ndia enan. Ketuk ruma hatahori Yahudir mai, ma ketuk ruma hatahori ta Yahudir mai. Tungga sira raa, Karistus mamaten natudu sara ena nae, Manetualain koasan moꞌon sudi selik kana, ma Ndia malelan naa, ta neni babanggak sudi selik kana. 25 Leo mae hatahori dae-bafok kara duꞌa rae, Manetualain dalan naa nggoa bebek, tehuu Ndia malelan bei lena heni sara. Ma leo mae ara duꞌa rae, Manetualain ta naena koasa hata esa boe na, tehuu Ndia koasan moꞌon bei lena heni sara.

26 Toranoo susue nggara ein! Mita fo ei bisa malela au kokolang ia, masaneda ei nenggetuu-nemberiim, neu Manetualain here nala ei fo dadi miu Ndia enan. Tungga hatahori dae-bafok timba-tain, nai ei taladam mara ta hambu hatahori malelak noꞌuk ka, ta hambu hatahori ta hohoꞌak noꞌuk ka, ma ta hambu hatahori noꞌuk ka numa nufaneluk mai raena nade moꞌok. 27 Tehuu Manetualain here nae pake hatahori bee fo hatahori dae-bafok henggenee nae, nggoa bebek sudi selik kana, fo nakamamaek hatahori fo mana tao aon malelak. Ma Ana oo here nau pake hatahori bee fo hatahori dae-bafok henggenee nae, ta naena koasa hata esa boe na, fo nakamamaek hatahori fo mana tao aon naena koasa boe. 28 Ana here nala hatahori kadiꞌik ta resi fulinggamuk, ma hatahori dae-bafok hii rakaloloek kasa. Manetualain nau pake sara fo tao hatahori bee fo tao aon ta hohoꞌak, dadi sama leo sira ta raena sosoa-ndandaak hata-hata bali. 29 Dadi, neu hatahorir rasare mbali Manetualain, neu ko ta hambu esa boe na bisa femba tenden nae, ndia naa, ta hohoꞌak.

30 Manetualain mesa kana ndia nasosoi dalak fo ei bisa maso dadi miu Yesus Karistus hatahorin. Manetualain ndia tao fo Yesus dadi Hatahori fo fee Ndia malelan soa-neu ita. Yesus naa, ndia nasosoi dalak fo ita bisa mole-dame to Manetualain. Yesus naa, ndia tao ita bisa tasoda no ndoos ma lolo-laok. Ma Ana ndia nakamboꞌik ita numa sala-singgok koasan mai. 31 Dadi ita muste tao sama leo neni surak nai Manetualain Susura Malalaon nae,