Dos Moppiyon Dinoggan no id Sulat ni
MARCOS
Unna nod Bosan
Dos id sulat ka-ay'n libru, si Marcos. Iddos mgo minuvu no mowwet kos sinorollan to Biblia, mid ikahi no si Marcos, sikandin en si Juan Marcos no ig-agaw ni Bernabe (Colosas 4:10) no id duma ongki Pablo riyot unnon iponawon dan to kodponudtuu to Moppiyon Dinoggan (Pinuungan 12:25; 13:5). Nosorollan ta mandad no ini si Marcos, id duma ki Pedro (1 Pedro 5:13), woy ukit kandin, nosorollan ni Marcos iddos moka-atag to pinuungan woy nonaw tod Longaggon.
Inin libru, id sulat din atag to konna mgo Judio, labbi ron iddos mgo toho Roma, de-en waa rin oraroy opila ka-ay'n libru iddos mgo bersikulu pomon diyot Tapoy'n Tandu, iling taddot id puungan onni Mateo woy Lucas. Id paabbotlabbot din mandad ka-ay iddos kohulugan to dumon mgo kahi woy botasanon to mgo Judio, su amoy od koovottan taddot konna mgo Judio (3:17; 5:41; 7:1-4, 11, 34).
Wora oraroy sulata ni Marcos iddos moka-atag to kodnonaw ni Disas. Iyon din oray'n id sulat, iddos moka-atag to mgo mokososoobbun pinuungan din. Oyya su id kopi-i ni Marcos no id pokita iddos kotuusan ni Disas, iling to kodbawi tod pongkovohokan, kodbadnow taddot id poomatoy ron, ahad pa iddos kodposinsya to saa.
Sokkad no dakkoon dontulon to kodsulat ni Marcos ka-ay, idda en so kodpaabbotlabbot no si Disas, Tohodtobbus woy Anak to Monama (1:1, 11, 24; 3:11; 5:7; 8:29; 9:7; 14:61-62; 15:39). Woy dontulon din mandad no od inniyat keta nod dumoruma ki Disas ahad ondan kos od kotomanan ta (8:34-38; 10:29-31).
Dos mgo Nokota-aw:
Dos nonaw ni Juan no Tohodboutismu woy dos kodboutismu rin ki Disas (1:1-13)
Dos tigkonayan to kodnonaw woy pinuungan ni Disas diyot Galilea (1:14 taman to 9:50)
Dos pinuungan ni Disas no id tigkanoy riyot Galilea taman to Jerusalem (10:1-52)
Dos kotompusan no simana ni Disas woy dos kopotayan din (11:1 taman to 15:47)
Dos kodbadnow ki Disas (16:1-8)
Dos kodpokita ni Disas woy dos kodbatun kandin diyot datas to langit (16:9-20)
1
Dos Nonaw ni Juan no Tohodboutismu
(Mateo 3:1-12; Lucas 3:1-18; Juan 1:19-28)
1 Na, ini en kos tigkonayan to Moppiyon Dinoggan moka-atag ki Disas Krays no Anak to Monama. 2 No-ikahi riyot id posulat to Monama ki propeta Isaias no,
“Id popiyod ku kos koddin tohodponudtuu nod unna kikow* Dos kahi no, kikow nod tommanon ka-ay, si Disas Krays. amoy od panoy to kod-inguma ru.”* Od kovasa ini riyot Malaquias 3:1.
3 Oyyos duwon monokkaan bawos diyot noka-awoy-awoy'n lugaa no mid ungketen to,
“ ‘Ponaya row kos pusung dow atag tod Longaggon, woy tulidda row kos od ukitan din!’ ”* Od kovasa ini riyot Isaias 40:3.
4 Notuman en idda, su id inguma si Juan no Tohodboutismu no riyon id oubpa to noka-awoy-awoy'n lugaa. Id nonaw sikandin to mgo minuvu, kahi rin to, “Sondit kow woy tanan kowd to mgo saa row woy poboutismu kow amoy'd posinsyan kow to Monama.” 5 Na, mid undiyot kandin iddos mgo minuvu no id pomon diyon to intirut prubinsya to Judea woy pomon diyot bonuwa to Jerusalem. Id ponudtuu ran iddos mgo saa ran, woy id poboutismu ran ki Juan diyot Oweg to Jordan. 6 Iddos umpak ni Juan, binovallan pomot bowvuu to kamelyo woy dos ollon din, binovallan pomot kindaa to oyama.* Dos umpak ni Juan no Tohodboutismu, iling to umpak ni propeta Elias. Od kovasa ini riyot 2 Hari 1:8. Nokod-iling mandad iddos id poponudtuu to Monama ki Juan taddot ki Elias, oyya su id ponudtuu ran diyot mgo minuvu iddos moka-atag to kodsilut to Monama woy dos moka-atag to kodsondit woy kodtanan to mgo saa. Iyon koka-an din, mgo apang woy tonnob. 7 Na id posaddoo si Juan diyot mgo minuvu, kahi rin to, “Duwon od tundug koddi no lampas pa koddi, su konna a ollog ahad kod-akas da en to sandalyas din. 8 Od boutismuwan ku sikiyu to oweg, piru sikandin, Uhis no Ispiritu kos id boutismu rin koniyu.”
Dos Kodboutismu ki Disas
(Mateo 3:13-4:11; Lucas 3:21-22; 4:1-13)
9 Na riyot timpu to kodboutismu ni Juan, mid inguma si Disas pomon diyot bonuwa to Nazaret no sakup to prubinsya to Galilea, woy id boutismuwan sikandin ni Juan diyot Oweg to Jordan. 10 To id go-un don si Disas diyot oweg, idda ron en, nokita rin no nopokes kos langit woy id lonna iddos Uhis no Ispiritu riyot kandin iling to soopati. 11 Na, duwon bawos pomon diyot datas to langit no mid ungketen to, “Sikkow en kos Anak ku no id dokollan ku to ginawa woy oraroy a no nahaa kikow.”
12 To nopongnga boutismu-i si Disas, idda ron en, id po-undiyon sikandin to Uhis no Ispiritu to noka-awoy-awoy'n lugaa. 13 Na, daom to oppat-no-puun allow, id ubpa sikandin diyot noka-awoy-awoy'n lugaa no riyon en iddos mgo monnanap to puwaason, woy id geddaman sikandin ni Moivuyan. Piru mid undiyot ki Disas iddos mgo ponolihan amoy'd tuhanuu kandin.
Dos Kod-umow ni Disas taddot Oppat no Tohodngongaap nod Kovovallan no mgo Tinodduwan Din
(Mateo 4:12-22; Lucas 4:14-15; 5:1-11)
14 Na, to noprisu si Juan, id livod si Disas diyot Galilea amoy'd ponudtuu to Moppiyon Dinoggan to Monama. 15 Kahi rin to, “Ini ron en kos timpu no id ponudtuu to mgo propeta dangan, oyyos asow ron kos kodharit Monama. Sondit kow woy tanan kowd to mgo saa row, woy pomokaya row kos Moppiyon Dinoggan.”
16 Sokkad no allow, laggun tid ipanow si Disas diyot ibpit to Lanow't Galilea, nokita rin iddos oruwon toosuwod no si Simon woy si Andres. Id ooppan dan to pukut, su mgo tohodngongaap me-en sikandan. 17 Kahin Disas kandan to, “Duma kow koddi. Konnad ngaap kos od ingutollon dow, ko konna, od nonawwan ku sikiyu nod ingutoo to mgo minuvu.” 18 Idda ron en, id tonanan dan iddos mgo pukut woy id duma ran kandin.
19 Na, ponayun mid ipanow si Disas diyot ko-unnan boyow, woy nokita rin iddos oruwa mandad no toosuwod no si Santiago woy si Juan no mgo anak ni Sebedeo. Id ounsad sikandan diyot bollangay no id oupiya to mgo pukut. 20 Idda ron en, id umow sikandan ni Disas no od duma kandin. Na, id tonanan dan iddos amoy ran no si Sebedeo riyon to bollangay duma taddot mgo minuvu no id popuung dan, woy mid duma ran mandad ki Disas.
Dos Kodpoleggua ni Disas to Busow no id Lasud diyot Sokkad no Minuvu
(Lucas 4:31-37)
21 Na, id undiyon onsi Disas to bonuwa to Capernaum. Woy riyon to Allow't Kod-imolloy, id usok si Disas diyot simba-an to mgo Judio woy mid nonaw to mgo minuvu. 22 Nosoobbuwan dan taddot kodnonaw rin su duwon en kotungud, konna iling taddot mgo tohodnonaw to Suhu ni Moises.
23 Na riyot simba-an to mgo Judio, duwon sokkad no minuvu no id losuran to busow woy id pomehes, kahi rin to, 24 “Disas no toho Nazaret, ondak lavut du konami? Id undini ka vo amoy'd silutan koy nikkow? Id kilaa a kikow, su sikkow en kos Uhis no Anak to Monama.”
25 Na id sugga ni Disas iddos busow, kahi rin to, “Po-onong-onong ka! Leggua kad kandin!”
26 Idda ron en, id pokookoo to busow iddon minuvu, woy ayas mid pomehes to waa pa sikandin id leggua riyot minuvu. 27 Nosoobbuwan iddos langun no minuvu woy id po-ikohiyoy ran to, “Eh, ondan man ini? Lammi inin nonaw, su duwon kotungud din nod sugga to mgo busow woy id leggua en!” 28 Pomon tadda, go-os nokoso-ob iddos moka-atag ki Disas diyot mgo lugaa no nokolingkus to intirut prubinsya to Galilea.
Id Bowiyan ni Disas iddos Mo-uraan Novohokan
(Mateo 8:14-17; Lucas 4:38-41)
29 Na, to id leggua onsi Disas diyot simba-an to mgo Judio, mid undiyon sikandin to baoy onni Simon woy Andres, duma ongki Santiago woy Juan. 30 Dutun, iddos ba-ay no onuhang ni Simon, id oilogga su id momonit. To mid inguma ron si Disas, id ponudtulan sikandin to mgo minuvu atag taddot novohokan. 31 De-en id poroniyan ni Disas iddos novohokan, woy id somaddan din kos bollad woy id po-onnow rin. Na idda ron en, no-uliyan sikandin woy id sondad kandan to koka-an.
32 To od kosagkup don, id piyod to mgo minuvu riyot ki Disas iddos langun nod kovohokan woy dos id ponlosuran to busow. 33 Langun to mgo minuvu riyot bonuwa, nolivuung diyot lama to baoy. 34 Na, no-uliyan ni Disas iddos mo-uraan minuvu no duwon nokod-osso-osson bohok, woy id poleggua rin iddos mo-uraan busow, woy waa po-osenga ni Disas iddos mgo busow, su nokokilaa ran man ko ondoy sikandin.
Id Nonaw si Disas diyot Galilea
(Lucas 4:42-44)
35 Mosukirom poron, mid onnow si Disas woy id undiyon to noka-awoy-awoy'n lugaa amoy od dasaa rutun. 36 Na, id nonangkap kandin onsi Simon. 37 To nokita ran don sikandin, mid ikahi ran to, “Od nongkapon ka to langun no minuvu.”
38 Piru kahin Disas kandan to, “Od undiyon ki pa to dumon bonuwa no morani ka-ay, su amoy id pokoponudtuu ku mandad kandan iddos Moppiyon Dinoggan oyyos ini en kos dontulon to kod-undini ku.”
39 De-en id lingkus ni Disas iddos langun no bonuwa riyon to Galilea. Id ponudtuu rin kos kahit Monama riyot mgo simba-an to Judio, woy id poleggua rin iddos mgo busow no id lasud diyot mgo minuvu.
Id Bowiyan ni Disas iddos Minuvu no duwon Bohok no Et-et
(Mateo 8:1-4; Lucas 5:12-16)
40 Na, duwon sokkad no minuvu no duwon bohok no et-et no id porani ki Disas. Mid lingko-od sikandin diyot isowwan din woy id po-eru-eru, kahi rin to, “Nokosaddoo a nod poko-uli ka ka-ay't molibmit no bohok ku otik id kopi-i ru.”
41 Pomon to oray'n no-eruwan si Disas kandin, id somaddan din iddos minuvu woy id ikohiyan din to, “Oyya, id kopi-i ku en. Na od ko-uliyan kad.”
42 Idda ron en, worad iddos et-et din woy no-uliyan don sikandin. 43 To waa pa po-iponawa ni Disas iddos minuvu, id loglohottan din sikandin, kahi rin to, 44 “Yo ru vo ponudtuu ini riyot ahad ondoy, ko konna, undiyon ka to tohodbuwis amoy'd ontongngan din kos lawa ru. Woy boggoy ka to buwis no id suhu ni Moises amoy'd posivonnaa riyot mgo minuvu no no-uliyan kad.”
45 Piru mid ipanow iddos minuvu woy id posaddoo rin iddos langun no pinuungan ni Disas, de-en nokoso-ob iddos dinoggan. Na pomon tadda, dii ron od poko-undiyon si Disas to dumon bonuwa, su otid kokita sikandin to mgo minuvu, od livuungan en sikandin. Purisu diyon da sikandin id oubpa to noka-awoy-awoy'n lugaa, piru id pon-undiyon dad en to kandin iddos mgo minuvu no pomon diyot nokod-osso-osson lugaa.
*1:2 Dos kahi no, kikow nod tommanon ka-ay, si Disas Krays.
*1:2 Od kovasa ini riyot Malaquias 3:1.
*1:3 Od kovasa ini riyot Isaias 40:3.
*1:6 Dos umpak ni Juan no Tohodboutismu, iling to umpak ni propeta Elias. Od kovasa ini riyot 2 Hari 1:8. Nokod-iling mandad iddos id poponudtuu to Monama ki Juan taddot ki Elias, oyya su id ponudtuu ran diyot mgo minuvu iddos moka-atag to kodsilut to Monama woy dos moka-atag to kodsondit woy kodtanan to mgo saa.