3
Cara sábaroquë Jesos yogaguibegajiri ira camabocori.
(Mt 12.9-14; Ir 6.6-11)
1 Icanaji Jesos aisati pongotsiquë cara yapatotaiga joríojegui. Tsomagui, ainta sërari camabocori poro ibaco. 2 Ainta matsiguenga inetsaiguëri ira Jesos aroca iragaguibegajiri sábaroquë. Icogaiguë ingantocotaiguëri: “Itarobacaaque Jesos sábaroquë. Te inguemisantiro isanguenare Moisés. Te ingomeite”. 3 Aro Jesos icanqueri ira sërari camabocori:
—Atsi paratingue yaca aganguisatiquë cara iraniaiguëmi omagaro.
4 Aique icantaiguëri ira matsiguenga:
—Yamai nosamitaiguëmi: ¿Pairo isanguenaque Moisés pairo caninatatsi anganque sábaroquë? ¿Caninataqueco angantiro ora caninaro, oraco angantiro ora te ongomeite? ¿Aganiatiri matsiguenga oraco agamaguëri?
Imairetaiganaque. 5 Aro inetsaguetaiguëri Jesos, iguisasërequeri aisati yogasëreca tenta iraninte inguemisantiri. Aro icanqueri sërari ira camabocori:
—Pintimagonaguitima pobaco.
Aro itimagonaguitanaca. Aito cara ibeganaa ocaninatanai ibaco. 6 Aro isotocaiganaque bariseo cara pongotsiquë cara yapatotaiga joríojegui. Iátasitaiguëri iratirite Eroris, yosamitobaca:
—¿Pairoroco anganqueri Jesos, agamaguëri?
Cara iquenguitsatomonti Jesos aisati yoguibeganti cara angaarequë.
(Mt 4.23-25; 12.15-21; Ir 6.17-19)
7 Aro iáiganaque Jesos aisati irogomerejegui cara onamijaquë angaare, aisati yoguiataiganaqueri tojai Garireasati, aisati tojai Joreasati, 8 aisati tojai Jerosaresati, tojai Iromeasati, aisati tojai antatiquerosati, aisati tojai Tirosati aisa Sirósati. Cara iquemocotaiguëri Jesos cara itasonganti, iroro ipocasitobitaigapëri tojai matsiguenga. 9 Jesos icanqueri irogomere:
—Pomapënaro pitotsi, notetimaro arota quero itsinaquina tojai matsiguenga.
10 Aroquenta yoguibiaguequeri tojai matsiguenga, itsinatsinaitobaca janaitatsiripague, icogaiguë irotsagatiri Ira Jesos. 11 Ira matsiguenga inantagueca camagari, cara iniaiguëri Jesos yobaticagueritotasipari. Icaimaiguë camagari:
—Jesos, Obiro Itomi Tosorintsi.
12 Aro icantasantaiguëri camagari Jesos:
—¿Pairo picomantëcobiriquina? Pomairetaigue, quero picomantëgotina.
Icoigaiguëri irogomere Jesos.
(Mt 10.1-4; Ir 6.12-16)
13 Aique iáque Jesos cara oguitojaquë, icaimaiguëri irogomere ira icoigaiguë, aro iátasiiguëri. 14 Icoigaiguë icarati 12, icantaiguëri:
—Piguiataiguena, pintsibataiguena. Najitaiguëmi nagátane. Aiquenta nagátaguequemi pinguenguitsatomotagueantë. 15 Aisati nagabiaquemi arota pigátaiguëri camagari pijocaiguëri.
16 Icoigaiguëri 12: Simón aisati ijiqueri Peroro; 17 aisati Santiago itomi Sebereo, aisa Joan ireinti Santiago; ijitaiguëri ira pitirooti Boaneriji ora cantatsi yosiacaro omanarontsi; 18 aisati Antiris, Jeripe, Baritoromé, Mateo, Tomás, aisati Santiago itomi Arijeo, Tareo, Simón ira nintasantiro ibaísite; 19 aisati Joras Cariotisati ira ágagantëri Jesos.
Ora ijitocotaiguëri Jesos matsiguenga.
(Mt 12.22-24; Ir 11.14-15)
20 Ipigaigapaa pongotsiquë Jesos aisati irogomere. Aitosati yapatobiritaigapari tojai matsiguenga irooti cara te irapabintae Jesos teatisati irogomere. 21 Cara iquemocoqueri imatsiguenga Jesos, iátasitaigabitaari iráganairime ibangosonoriquë. Icantobaca:
—Te iraneicotajima Jesos; intsome áganairi.
22 Aisati ipocasitaigapëri Jerosaresati irianti ogomeantiro isanguenare Moisés, icantocotasitaigapari:
—Ica sërarica inancari Berisebó aisati ijita Satanás itingomi camagari. Iroro ijogantaguëtari camagari.
Yotabitaiguëri bariseo Jesos.
(Mt 12.25-32; Ir 11.16-23; 12.10)
23 Aro Jesos icaimaiguëri matsiguenga. Cara ipocaigapë, icantaigabaqueri quingabaguirentsiquë:
—¿Atiroco ingantima Satanás irojocajima iriati? Quero icantiro. 24 Aroca irógobaguima matsiguenga timaigatsi quibatsiquë, ¿Queroco itsongabacaga? 25 Aisa icanta matsiguenga pongotsiquë, queroca iquengaiga, querootisati itiomotobaga caninasati. 26 Tesonori iromitocotina Satanás cara nojoguetiri camagari. Ipëgatina. Arome Satanás inguisaiguërime igamagarite, ¿Atiroco ingantima intingomibintaiguëmarime camagarijegui? Querome iquengaiga querome pini iragáantane Satanás. 27 Ira Satanás aisati icantari ibega sërari sintsiri. Aiti ibiane, ichaapite, itongomento, omagaro ora yomisantantaro ibango querota icositiri pairoraca irasi. Carari iribocapëca basini sërari sintsirisonori, irabisapëri isintsire, iragabiapëri, iraguëshotapëri, irágopitapëri irógomento ora yabentabeca, irágopitapëri pairoraca icogui. Carari queroca yoguëshotiquiri quero yágui pairoraca. 28 Aisonori nangantasantaiguëmi cara Tosorintsi irojocaguetajineri matsiguengajegui ora icantagueti te onganinate aisati ora icantasitagueta, quero iguisasëretajiri, 29 carari quero icábintsiri ira cantëgotaguetasitaro Isëre Caninaro. Iriátë Sharincabeniquë.
30 Icanqueri Jesos negaca aroquenta icantocotaguetasicari matsiguenga cara inancari Jesos camagari.
Icomantë Jesos pairi imatsiguengasonori.
(Mt 12.46-50; Ir 8.19-21)
31 Piátasiqueri iniro Jesos aisati ireinti. Yaratingaigapë sotoquë, icaimagantaiguëri Jesos. 32 Tsomagui, isobiaque Jesos yogometaigaseguiri arosonori matsiguenga sobicaigatsi ishongaigacari. Aro icomantaiguëri:
—Parepa piniro aisati pirentijegui. Ainta sotoquë; icogaiguini irinibataigapëmi.
33 Yotabitaiganaqueri Jesos:
—¿Pairoroco inato? ¿Pairiroco igueegui?
34 Aro inetsaguequeri ira sobicomotaigaseguiri icantaiguëri:
—Ocaegui iroro inato, icaegui iriro igueegui. 35 Pairiraca cantatsi ora icocaqueri Tosorintsi, irianti nomatsiguengasonori: najitaiguëri igue, aisati tsio, aisati inato.